ULEVITIKUSI 25

₁USomnini wakhuluma noMosi phezu kwentaba yeSinayi wathi ₂akakhulume nama-Israyeli athi kiwo: “Lokha naningena enarheni engizoninikela yona, inarha leyo kufuze iphumule ukuphumula kweSabatha elahlukaniselwe uSomnini. ₃Iminyaka emithandathu nizakutjala amasimenu, nihlunge isidiribe senu benikhe iinthelo zaso. ₄Kodwana umnyaka wekhomba uzakuba ngoweSabatha, okuliSabatha elihlukaniselweko kuSomnini. Ngomnyaka loyo anizukutjala amasimenu namkha nihlunge isidiribe senu. ₅Ningavuni amakhakhazela wokulinyiweko namadiribe esidiribeni senu esingakahlungwa. Kuzakuba mnyaka wokuphumula okukhethekileko kwenarha. ₆Okuzimilela ngomnyaka weSabatha kudleleni khonapho, nina, amakhoboka namakhobokakazenu, iinsebenzi kanye neenthekeli ezigogobele phakathi kwenu. ₇Godu kuzakuba kukudla kwefuywenu kanye neenlwana zommango ezisenarhenenu.”

₈“Zibaleleni iminyaka elikhomba yamaSabatha okutjho iminyaka elikhomba ebuyelelwe kalikhomba, kube minyaka ematjhumi amane nethoba. ₉Nje-ke kuzakuthi lokha inyanga yekhomba nayinamalanga alitjhumi nivuthele ipalapala izwakale eendaweni zoke. Zwakalisani ipalapala enarhenenu yoke ngelanga letethelelo. ₁₀Nihloniphe umnyaka wamatjhumi amahlanu welimo, niwucwengise ngokumemezela ukusulwa kwesikolodo enarheni yoke kizo zoke izakhamuzi. Kuzakuba mnyaka wokubuyisela kini, lapha omunye nomunye wenu azakutjhaphuluka khona abuyele elifeni lakhe nemndeninakhe. ₁₁Umnyaka wamatjhumi amahlanu uzakuba mnyaka wokubuyisela kini, okumnyaka lapha ningeze natjala, navuna amakhakhazela namkha isidiribe esidiribeni senu esingakahlungwa. ₁₂Njengombana kumnyaka wokubuyisela nje, kufuze ube ngocwengileko kini. Nizakudla kwaphela okuzimilela emasimini.

₁₃“Emnyakeni wokubuyisela lowo, omunye nomunye wenu akabuyele endaweni yelifa lakhe. ₁₄Lokha nanisiselana nabantu bekhenu ngendawo yelifa, ningadlelezelani. ₁₅Inani lokusisa lihloswa sibalo seminyaka ngemva komnyaka wokubuyisela, okutjho bona inani lesivuno seminyaka eseleko ngaphambi komnyaka wokubuyisela ngilo elihlosa inani lokusisa. ₁₆Ubunengi beminyaka eseleko buzakutjho ukuphakama kwenani lokusisa, kuthi ubuncani beminyaka eseleko kube kukwehla kwenani ngombana kuhlekuhle kusiselwana isivuno kwaphela. ₁₇Ngokwesaba uZimakho ungadlelezeli umuntu wekhenu ngombana mina nginguSomnini uZimenu.

₁₈“Nanenza iimiso zami, nilonde imithethwami beniyenze, nizakuphila niphephile enarheni. ₁₉Inarha izakuthela iinthelo zayo, nidle nisuthe begodu nizakuhlala kiyo niphephile. ₂₀Mhlambe ningazibuza nithi, ‘Alo, ngomnyaka wekhomba sizokudlani ngombana singeze satjala namkha sivune?’ ₂₁Lalelani-ke, ngomnyaka wesithandathu ngizonehlisela isibusiso sami ukuze isivuno somnyaka lowo sibambelele iminyaka emithathu. ₂₂Nanitjalako ngomnyaka wobunane, nizabe nisalokhu nidla isivuno esidala bekube mnyaka wethoba. Iye, nizakudla isivuno esidala bekube sikhathi sesivuno somnyaka wethoba. ₂₃Inarha ayingathengiswa, ayisiswe kwaphela ngombana ingeyami, nina niziinkhonzi neenthekeli kimi. ₂₄Ilungelo lokuhlenga inarha engininikele yona bona ibe lilifa lenu alihlonitjhwe.”

₂₅“Nangabe umfowenu uyakhwahla bese usisa ingcenye yamasimakhe, kuzakufanela bona umhlengi oseduze naye aye kiloyo okusiswe kuye afese ahlenge isimu yomfowabo leyo. ₂₆Nakube umfo loyo akanaye ongamhlengela yona, kodwana yena athome ukuhluma bese uba nalokho angayihlenga ngakho isimu leyo, ₂₇akabale inani leminyaka yamasiso bese ukhokha iminyaka eseleko ngaphambi komnyaka wokubuyisela kiloyo amsisiseleko. Nje-ke uzabese ubuyisa ubunikazi belifa lakhe. ₂₈Kodwana nangabe akahlumi ukuze akghone ukuzihlengela isimu leyo, izakuhlala ezandleni zaloyo okusiswe kuye bekube mnyaka wokubuyisela. Ubunikazi besimu leyo abubuyiswe bese umuntu loyo ubuyela elifeni lakhe ngomnyaka wokubuyisela.

₂₉“Nangabe umuntu usisa indlwakhe engedorobheni elizombelezwe ngomthangala, unesikhathi somnyaka woke sokobana ayihlenge ngemva kokuyithengisa kwakhe. Ilungelo lokuyihlenga lizakuba mnyaka munye. ₃₀Nangayihlengiko bekuphele umnyaka woke swana, khona-ke indlu leyo izakuba lilifa lomthengi isiphelani, iinzukulwana ngeenzukulwana. Akukameli ibuyiselwe kumthengisi ngomnyaka wokubuyisela. ₃₁Kodwana izindlu ezisemizini engakazombelezwa ngomthangala zingathathwa njengegcenye yamasimu wendawo leyo. Zona kunelungelo lokuzihlenga begodu zingatjhatjhululwa ngomnyaka wokubuyisela.

₃₂“AmaLevi wona anelungelo lokuhlenga izindlu ezisemadorobhenawo ngesikhathi soke. ₃₃Nangabe kunomLevi ongahlengi indlu esiswe edorobheni lelifa lawo, kufuze ibuyiswe ngomnyaka wokubuyisela. Lokhu kungebanga lokobana izindlu ezisemadorobheni wamaLevi zililifa lawo kwa-Israyeli. ₃₄Amadlelo asemadorobhenawo akukafuzi asisiswe ngombana alilifa lawo isiphelani.

₃₅“Nangabe umfowenu uyakhwahla bese uhluleka ukuzondla, msize njengombana bewungasiza isikhonzi nesithekeli ukuze akwazi ukuphila nawe. ₃₆Kungabi khona inzalo ombiza yona nawumboleka imali namkha nayibuyisako. Ngokwesaba uZimakho msize ukuze akwazi ukuphila nawe. ₃₇Ungambizi inzalo lokha nawumboleka imali begodu ungafuni ukuzuza nawumthengisela ukudla. ₃₈NginguSomnini uZimenu owanikhupha enarheni yeGibhide bona ngininikele inarha yeKanana ukuze ngibe nguZimu kini.

₃₉“Nangabe umfowenu uyakhwahla bese uzithengisa kuwe, ungamphathi njengekhoboka. ₄₀Kufuze umphathe njengomunye weensebenzi namkha weenthekeli ezihlala nawe. Akusebenzele bekube mnyaka wokubuyisela, ₄₁nje-ke angakhamba, yena nabantwabakhe, abuyele kebekhabo enarheni yaboyisemkhulu. ₄₂Ama-Israyeli aziinceku zami engazenyula enarheni yeGibhide, ngalokho akukafuzi athengiswe njengamakhoboka. ₄₃Ngokwesaba uZimakho ungaphathi umIsrayeli ngokumkhahlameza. ₄₄Nanifuna amakhoboka namakhobokakazi athengeni ezizweni ezinye, ₄₅godu ningawathenga phakathi kwabaphalali abakhonze kini kanye nemindeninabo ebelethelwa enarhenenu nehlala nani. Wona-ke alilifa lenu ₄₆begodu ningawatjhiyela abantwabenu bona abe lilifa labo. Akanisebenzele nini nanini. Kodwana ama-Israyeli wona okubafowenu angakhahlamezani.

₄₇“Nangabe umfowenu uyakhwahla bese azithengise esikhonzini namkha kumphalali onjingileko nanyana eenzukulwaneni zabo ₄₈usese nelungelo lokobana ahlengwe emva kokuzithengisa kwakhe. Kufuze ahlengwe ngomunye wabafowabo: ₄₉Umfowabo kayise, indodana yomfowabo kayise namkha omunye womndeni wekhabo angamhlenga. Kanti-ke nangabe kuyenzeka ahlume angazihlenga yena ngekwakhe. ₅₀Uzakubonisana naloyo omthengileko, kubalwe ukusukela ngomnyaka azithengisa ngawo bekube mnyaka wokubuyisela: Inani lokuhlengwa kwakhe lizakuya ngesibalo seminyaka eseleko ekusebenzeni kwakhe lapho. Inanelo libe njengelesisebenzi. ₅₁Nangabe kusasele iminyaka eminengi, kufuze kuthi emalini athengwe ngayo abuyise ingcenye yayo ngokweminyaka eseleko leyo njengesihlengo sakhe. ₅₂Kodwana nakusele iminyaka embalwa ngaphambi komnyaka wokubuyisela kufuze kutjhejwe lokho: Isihlengo asibe njengokweminyaka eseleko. ₅₃Emnikazinakhe akabe njengomqatjhwa womnyaka ngomnyaka; niqalisise bona umthengi lo akamkhahlamezi na. ₅₄Nangabe akukghoneki bona ahlengeke ngeendlelezo, ngomnyaka wokubuyisela kufuze atjhaphuluke nabantwabakhe ₅₅ngombana kimi ama-Israyeli aziinceku. Iye, aziinceku zami engazenyula enarheni yeGibhide. NginguSomnini uZimenu.”