ULEVITIKUSI 3

₁“Nakube umnikelo womuntu kumnikelo wetjhebiswano awuthethe emhlambini weenkomo, akube ngeduna namkha esikazi emsulwa, ilethwe phambi kwakaSomnini. ₂Umuntu loyo uzakubeka isandla sakhe phezu kwehloko yomhlabelwakhe. Kuzakufanele bonyana awuhlabe phambi komnyango wetende lokuhlanganela bese kuthi amadodana ka-Aroni okubaphristi bafafaze iingazi zawo mahlangothi woke we-aldari. ₃Emhlabelweni wetjhebiswano umuntu loyo kufuze alethe umnikelo okhethekileko kuSomnini. Lokho kutjho umhlwehlwe owembese iinredlo nakho koke okuphathelene nawo, ₄iziso zombili nomhlwehlwe wakhona, amanoni wesifunzi kanye nepundu yesibindi ekufuze ikhutjhwe neziso. ₅Amadodana ka-Aroni akatjhise koke lokho e-aldarini phezu kweenkuni ezivuthako ngemva kobana enze umhlabelo wokutjhiswa. Lokho kumnikelo okhethekileko, owamukeleka kuSomnini.

₆“Nakube umnikelwakhe uwuthethe emhlambini wezimvu namkha weembuzi bona kube mhlabelo wetjhebiswano, khona akube ngeduna namkha esikazi emsulwa, ilethwe kuSomnini. ₇Nakube unikela ngeqamanyana, akalilethe phambi kwakaSomnini, ₈abeke isandla sakhe phezu kwehloko yomhlabelwakhe lowo, awuhlabe phambi komnyango wetende lokuhlanganela. Amadodana ka-Aroni afafaze iingazi zawo mahlangothi woke we-aldari. ₉Emhlabelweni wetjhebiswano umuntu loyo kufuze alethe amanoni njengomnikelo okhethekileko kuSomnini. Lokho kutjho woke umsila ononileko oquntwe emngolweni, umhlwehlwe owembese iinredlo nakho koke okuphathelene nawo, ₁₀iziso zombili nomhlwehlwe wakhona, amanoni wesifunzi kanye nepundu yesibindi ekufuze ikhutjhwe neziso. ₁₁Umphristi uzakutjhisa koke lokhu phezu kwe-aldari. Lokho kukudla okumnikelo okhethekileko wakaSomnini.

₁₂“Nakube unikela ngembuzi, akayilethe phambi kwakaSomnini, ₁₃abeke isandla sakhe phezu kwehloko yomhlabelwakhe lowo, awuhlabe phambi komnyango wetende lokuhlanganela. Amadodana ka-Aroni afafaze iingazi zawo mahlangothi woke we-aldari. ₁₄Emnikelwenakhe umuntu loyo kufuze alethe umnikelo okhethekileko kuSomnini. Lokho kutjho umhlwehlwe owembese iinredlo nakho koke okuphathelene nawo, ₁₅iziso zombili nomhlwehlwe wakhona, amanoni wesifunzi kanye nepundu yesibindi ekufuze ikhutjhwe neziso. ₁₆Umphristi uzakutjhisa koke lokhu phezu kwe-aldari. Lokho kukudla okumnikelo okhethekileko, owamukeleka kuSomnini.

“Woke umhlwehlwe ngowakaSomnini. ₁₇Lokhu kusimiso sanini nanini eenzukulwaneni ngeenzukulwana lapha nizakuhlala khona: Ningalingi nidle umhlwehlwe, amanoni namkha ububende.”