ULUKASI 16

₁UJesu watjela abafundi bakhe wathi: “Kwakhe kwaba khona umuntu osikhumkani ogade anomphathi owasolwa ngokusaphaza ipahlakhe. ₂Yeke wambiza wathi kuye, ‘Kuyini lokhu engikuzwako ngawe na? Akhe uziphendulele ngokuphatha kwakho ngombana angeze bewusaba mphathi.’ ₃Umphathi wazitjela wathi, ‘Alo ngizakwenzani-ke gadesi? Ikosami ingemuka umsebenzami. Anginamandla angako wokulima begodu ngineenhloni zokukhombela. ₄Ngiyazi bonyana ngizakwenzani ukuze abantu bakwazi ukungamukela emizinabo nangilahlekelwa msebenzi lapha.’

₅“Yeke wabiza boke abantu abakoloda ikosakhe. Wabuza wokuthoma wathi, ‘Uyikoloda kangangani ikosami na?’ ₆Waphendula wathi, ‘Iinkulungwana ezintathu zamalitha wamafutha we-oliva.’

“Umphathi wathi, ‘Thatha nasi incwadakho yesikolodo, hlala phasi msinyana utlole bona yikulungwana namakhulu amahlanu.’ ₇Yeke wabuza wesibili wathi, ‘Wena ukoloda kangangani?’

“Yena wathi, ‘Ikhulu lemigodla yekoroyi.’

“Umphathi wathi, ‘Thatha nasi incwadakho yesikolodo, itlole ibe matjhumi abunane.’

₈“Ikosi yakhuza umphathayo onganaqiniso ngombana wenze ubugirikijani. Nje-ke abantu bephaseli banobugirikijani obukhulu ekusebenzeni kwabo nabantu abafana nabo kunabantu bokukhanya. ₉Yeke ngiyanitjela bona nisebenzise umnono wephaseli ukuzizuzela abangani ukuze kuthi nabuphelako, namukeleke ekuphileni okungapheliko.

₁₀“Othembeke kokuncani, angathembeka nakokukhulu nongathembekiko kokuncani angeze athembeka kokukhulu. ₁₁Alo-ke, nangabe azange khenethembeke ekuphatheni umnono wephaseli, ningathenjwa njani ngomnono wamambala na? ₁₂Nangabe anizange nethembeke entweni yomunye umuntu, ngubani ozaninikela ipahla bona ibe ngeyenu na?

₁₃“Akunakhoboka elingakhonza emakhosini amabili. Nakungasinjalo, lizokuzonda enye, lithande enye namkha lizinikele kenye, linyaze enye. Angekhe nalotjha uZimu nemali ngasikhathi sinye.”

₁₄AbaFarisi abathanda imali bezwa koke lokho, bakokomeja uJesu. ₁₅UJesu wathi kibo: “Nina nizenza abalungileko phambi kwamehlo wabantu, kodwana uZimu wazi iinhliziyo zenu. Lokho abantu abakuthathela phezulu, kusinyenyiso phambi kwakaZimu.

₁₆“Umthetho nemitlolo yabaphorofidi kwamenyezelwa kufikela ngesikhathi sakaJwanisi. Soloko kwangesikhatheso, kutjhunyayelwa iindaba ezimnandi zombuso kaZimu, yeke, woke umuntu ufuhlezela ukungena endimeni leyo. ₁₇Kulula bonyana izulu nephasi kuphele kunobana kungawa ithorwana yomthetho.

₁₈“Nanyana ngubani otlhala umkakhe bese uthatha omunye, uyahlobonga, nendoda ethatha umfazi otlhaliweko, iyahlobonga.

₁₉“Bekunomuntu ebegade asikhumkani, ambatha izambatho ezibubende nezelineni ecolisiweko ngamalanga. ₂₀Esangweni lakwakhe bekubekwe isikhombeli ebekuthiwa nguLazaru, sikghamathele ikhwekhwe. ₂₁Besirhuluphela ukudobhelela iintshutshuru eziwa etafuleni lesikhumkanesi. Ngitjho nezinja bezifika zizokukhotha iinlonda zaso.

₂₂“Kwafika isikhathi sokobana isikhombeli sihlongakale, iingilozi zafika zasithatha zasibeka hlanu kwaka-Abrahamu. Isikhumkani naso sahlongakala, sabulungwa. ₂₃Sathi nasisendaweni yabafileko lapha besihlunguphazeka khona, saqala phezulu, sabona u-Abrahamu kude le, anoLazaru hlanu kwakhe. ₂₄Sarhuwelela sathi, ‘Baba Abrahamu! Yewungirhawukele, uthumele uLazaru azokutlubhuza umunwakhe ngemanzini apholise ilimu lameli ngombana ngisebuhlungwini obukhulu ngemlilwenapha.’

₂₅“Kodwana u-Abrahamu wathi, ‘Ndodana, khumbula bonyana esikhathini sakho sokuphila wanikelwa zoke izinto ezihle, uLazaru yena wafumana okumbi. Nje-ke uyaduduzwa lapha, kodwana wena usebuhlungwini. ₂₆Ngaphandle kwakho koke lokho, phakathi kwethu nawe kunerharha elikhulu, abafuna ukusuka nganeno beze ngapho abakghoni godu akakho nongeyamela nganeno.’ ₂₇Yeke isikhumkani sathi, ‘Ngiyakurabhela baba, khona-ke thumela uLazaru ekhaya emzini kababa ₂₈ngombana nginabafowethu abahlanu. Akakhambe ayobayelelisa ukuze bangezi lapha endaweni yobuhlungu le.’

₂₉“U-Abrahamu wathi, ‘Abafowenu banoMosi nabaphorofidi, ababalalele.’ ₃₀Isikhumkani saphendula sathi, ‘Awa baba u-Abrahamu, kodwana nange kusuka othileko kabafileko aye kibo, bazakuphenduka.’ ₃₁Kodwana u-Abrahamu wathi, ‘Nakube abakghoni ukulalela uMosi nabaphorofidi, angekhe baphenduka ngitjho nanyana kungavuka umuntu kabafileko.’ ”