UMARKOSI 11

₁Kwathi nabatjhidela eJerusalema, bafika eBhethifage neBhethaniya, entabeni ye-Oliva, uJesu wathumela babili babafundi bakhe phambi kwakhe, ₂wathi kibo: “Khambani niye emzini ophambi kwenu, nizakuthi naningenako, nifumane udumbanyana ongazange akhwelwe, abotjhwe lapho. Mtjhaphululeni nimlethe lapha. ₃Nakukhona onibuzako athi, ‘Nikwenzelani lokhu?’ nimtjele nithi, ‘IKosi iyamdinga, izambuyisa msinyana.’ ”

₄Bakhamba-ke, bamfumana udumbanyana ngaphandle endledlaneni abotjhiwe hlanu komnyango. Kwathi nabasamtjhaphululako, ₅abantu ebebajame lapho babuza bathi: “Nenzani, nitjhaphulula udumbana lo na?”

₆Babaphendula ngendlela uJesu abayala ngakhona, abantwabo babalisa bakhamba. ₇Baletha udumbanyana kuJesu, babeka izambatho zabo phezu kwakhe, wakhwela. ₈Abantu abanengi baqhisa izambatho zabo endleleni, abanye baqhisa phambi kwakhe amahlahla abawephule emasimini. ₉Labo ebebakhamba phambili nalabo ebebamlandela barhuwelela bathi:

₁₁UJesu wangena eJerusalema, waya ngethempelini. Waqala koke ebekungapho kodwana njengombana besele kuhlwile, waphuma waya eBhethaniya nabalitjhumi nambili.

₁₂Ngelanga elilandelako, nabasuka eBhethaniya, uJesu bekaphethwe yindlala. ₁₃Kudanyana naye wabona umuthi wamakhiwani onamakari. Wayokuqala bona uthelile na. Nafika kiwo akhange afumane ilitho, ngaphandle kwamakari wodwa ngombana bekungasiso isikhathi samakhiwani. ₁₄Yeke wathi kiwo: “Akungasabi nomuntu ozakugoma iinthelo kuwe godu!”

Abafundi bakhe bamizwa asitjho lokho.

₁₅Ekufikeni kwabo eJerusalema, uJesu wangena ngethempelini, wathoma waqotjha labo ebebathengisa nebebathenga lapho. Wagubuda iintafula zalabo ebebananiselana ngemali, neenhlalo zalabo ebebathengisa amazuba. ₁₆Azange avumele nanyana ngubani bona avundle nepahla ethengiswako ngesirhodlweni sethempeli. ₁₇Wabafundisa wathi kibo: “Angithi kutloliwe kwathiwa, ‘Indlwami izakubizwa bona yindlu yokuthandaza yezizwe zoke.’? Kodwana nina niyenze irharha labahlanguli.”

₁₈Abaphristi abakhulu nabafundisi bomthetho bakuzwa lokho bafuna amaqhinga wokumbulala; bamesaba ngombana boke abantu barareka ngeemfundiso zakhe.

₁₉Kuthe nakurhwaqelako, baphuma ngedorobheni.

₂₀Ekuseni nabadlulako godu, babona umuthi wamakhiwani utjhwabe ukusukela emirajinawo. ₂₁UPitrosi wakhumbula wathi kuJesu: “Rabi, qala! Umuthi owunikeleleko loya utjhwabile.”

₂₂UJesu wamphendula wathi: “Kholwani kuZimu. ₂₃Ngiqinisile ngiyanitjela bona loyo othi entabeni le, ‘Khamba uyoziphosela ngelwandle’, angazazi ehliziywenakhe, kodwana akholwe bona lokho akutjhoko kuzakwenzeka, ngambala uzakwenzelwa khona. ₂₄Ngalokho ngiyanitjela bona nanyana yini eniyikhombela ngomthandazo, kholwani bona seniyifumene, ngambala izakuba ngeyenu. ₂₅Njalo lokha nanijamako nithandaza, libalelani nanyana ngubani eninamavundo naye ukuze noYihlo osezulwini anilibalele izono zenu. ₂₆Kodwana naningalibaleliko, noYihlo osezulwini angekhe anilibalele izono zenu.”

₂₇Godu bafika eJerusalema, bekwathi uJesu asakhamba ngesirhodlweni sethempeli, abaphristi abakhulu nabafundisi bomthetho kanye nabaphathi beza kuye, ₂₈bambuza bathi: “Uzenza ngamandla kabani izintwezi na? Njekhona ngubani okunikele igunya lokwenza lokhu na?”

₂₉UJesu waphendula wathi: “Ngizanibuza umbuzo owodwa. Ngiphendulani, nami ngizanitjela bona ngizenza ngawaphi amandla izintwezi. ₃₀Umbhabhadiso kaJwanisi bewuvela ezulwini namkha ebantwini na? Ngiphendulani!”

₃₁Bakhulumisana bodwa bese bathi: “Nasingathi, ‘Ezulwini,’ uzakuthi, ‘Alo-ke yini beningamkholwa na?’ ₃₂Alo, kghani sithi, ‘Ebantwini’ ”? Gade besaba abantu ngombana boke bebasithi uJwanisi mphorofidi wamambala. ₃₃Yeke baphendula uJesu bathi: “Awa, asazi.”

UJesu wathi kibo: “Arha-ke, nami angizonitjela-ke bona ngiwathathaphi amandla engenza ngawo izintwezi.”