Amaqhinga wokubulala uJesu
(Mt 26:1-5; Lk 22:1-2; Jwan 11:45-53)
1Nje-ke besele kumalanga amabili kwaphela bona kube liPhasika kanye nomnyanya wesiKwa esinganaNgumelo. Abaphristi abakhulu nabafundisi bomthetho bebathiya amaqhinga wokubamba uJesu ngesidu, bambulale. 2Bakhuluma bodwa bathi: “Akungabi ngesikhathi somnyanya ngombana abantu bangaguruzela.”
UJesu uzeswa ngamafutha eBhethaniya
(Mt 26:6-13; Jwan 12:1-8)
3Kwathi uJesu aseBhethaniya azigedle ngekumbeni yendoda ebekuthiwa nguSimoni onekhwekhwe, kweza umfazi aphethe isikurwana se-alabhastara sinamakha wentengo ephezulu, enziwe ngenarada yamambala. Wephula isikurwaneso, wathela amakha phezu kwehlokwakhe. 4Abanye egade bakhona basilingeka bathi: “Kudlalelwani ngamakha kangaka na? 5Amakha la, bekangathengiswa ngemali engaphezu komrholo womnyaka bese imali leyo inikelwa abadududu.” Yeke bamkhalimela ngokumkhahlameza.
6UJesu wathi: “Mliseni, nimtshwenyelani na? Ungenzele into ehle. 7Abadududu nizokuhlala ninabo njalo phakathi kwenu, yeke ningabasiza ngesinye nesinye isikhathi enifuna ngaso. Kodwana mina angeze naba nami njalo. 8Wenze akghona ukukwenza: Uzese umzimbami ngamakha ngaphambi kwesikhathi, walungiselela ukubulungwa kwami. 9Ngiqinisile ngiyanitjela bona kuphi nakuphi lapha kutjhunyayelwa khona ivangeli ephasini loke, lokho akwenzileko kuzakhulunywa ngakho kube sikhumbuzo ngaye.”
UJudasi uvuma ukuthengisa uJesu
(Mt 26:14-16; Lk 22:3-6)
10UJudasi Iskariyodi ongomunye wabalitjhumi nambili, watjhinga kubaphristi abakhulu kobana akhaphele uJesu kibo. 11Bakuthabela khulu ukuzwa lokho, bebamethembisa ukumnikela imali. Yeke walindela ithuba lokumkhaphela.
UJesu ugoma iPhasika nabafundi bakhe
(Mt 26:17-25; Lk 22:7-14,21-23; Jwan 13:21-30)
12Ngelanga lokuthoma lomnyanya wesiKwa esinganaNgumelo, nabegade kumkhuba wokuhlaba imvana yePhasika, abafundi bakaJesu bambuza bathi: “Ufuna siyokulungiselela kuphi lapha uzakugomela khona iPhasika na?”
13Yeke wathumela ababili ebafundini bakhe, wathi kibo: “Khambani niye ngedorobheni, nizakuhlangatjezwa mumuntu otjethe umjeka wamanzi ehlombe. Mlandeleni. 14Lapha angena khona, nithi kumninimuzi, ‘Umfundisi uyabuza bona liphi ilawu labayeni, lapha yena nabafundi bakhe bazakugomela khona iPhasika na?’ 15Uzanitjengisa ilawu elikhulu elingaphezulu, elilungeselelwe ngakho koke. Yenisilungiselele lapho-ke.”
16Abafundi bakhamba-ke, baya ngedorobheni, bafumana kunjengombana uJesu bekabatjelile. Yeke balungiselela iPhasika.
17Kuthe bona kuhlwe, uJesu wafika nabafundi bakhe. 18Kwathi basazigedle etafuleni bagoma, uJesu wathi: “Ngiqinisile ngiyanitjela bona omunye kinapha uzongikhaphela; iye, loyo onghwatha nami.”
19Bathoma ukutlhuwa, bambuza ngokulandelana bathi: “Kungaba ngimi loyo na?”
20Wathi kibo: “Ngomunye wabalitjhumi nambili, ngiloyo otjheba isikwa ngesitjeni sinye nami. 21INdodana yoMuntu izakukhamba njengombana kutloliwe ngayo. Kodwana maye emuntwini okhaphela iNdodana yoMuntu! Bekuzakuba ngcono kuye thana ubengakabelethwa!”
Isidlo seKosi sakusihlwa
(Mt 26:26-30; Lk 22:15-20; 1 Kor 11:23-25)
22Kuthe basagoma, uJesu wathatha isikwa, wathokoza, wasihlephula wapha abafundi bakhe, wathi: “Thathani, lokhu mzimbami.”
23Yeke wathatha ikapho, wathokoza kuZimu, wabanikela, boke basela. 24Wathi kibo: “Lokhu ziingazi zami zesivumelwano eziphalakele abanengi. 25Ngiqinisile ngiyanitjela bona angekhe bengisasela godu isithelo sesidiribe bekube kumhlana ngisisela sisitjha embusweni kaZimu.”
26Kwathi sele bavume ingoma yokuthokoza, baphuma baya entabeni ye-Oliva.
UJesu ubona ngaphambili ukuphikwa nguPitrosi
(Mt 26:31-35; Lk 22:31-34; Jwan 13:36-38)
27UJesu wathi kibo: “Nizokukhubeka noke ngombana kutloliwe bona:
“ ‘Ngizakumadlha umelusi,
izimvu ziphadlhalale.’
28Kodwana emva kobana ngivukile,
ngizanandulela ngiye eGalile.”
29UPitrosi wathi kuye: “Nanyana boke bangakhubeka, kodwana mina angekhe.”
30UJesu wathi: “Ngiqinisile ngiyakutjela bona ngobusukobu, ngaphambi kobana umkukurumbu ulile kabili, uzabe ungiphike kathathu.”
31Kodwana uPitrosi waphikelela wathi: “Ngitjho nanyana sele kungibiza bona ngife nawe, angekhe ngakuphika.”
Boke batjho njalo.
UJesu uthandaza eGetsemani
(Mt 26:36-46; Lk 22:39-46)
32Baya endaweni ebizwa bona yiGetsemani, uJesu wathi ebafundini bakhe: “Hlalani lapha ngisayokuthandaza.” 33Wathatha uPitrosi, uJakopo kanye noJwanisi wakhamba nabo. Wathoma ukukhathazeka khulu, waba lisizi. 34Wathi kibo: “Ummoyami ulisizi khulu bekube sekufeni. Salani lapha nihlale niqaphile.”
35Wadlulela phambidlana wawela phasi, wathandaza bonyana nakukghonekako i-awara leli limdlule. 36Wathi: “Aba! Baba! Zoke izinto ziyenzeka kuwe. Susa ikapho le kimapha, nokho akungabi ngokwentandwami kodwana kube ngeyakho.”
37Yeke wabuyela ebafundini bakhe, wabafumana balele. Wathi kuPitrosi: “Simoni, ulele na? Ubhalelwe kulinda i-awara linye nje na? 38Lindani, nithandaze ukuze ningangeni ekulingweni. Ummoya uyavuma, kodwana inyama ibuthakathaka.”
39Wakhamba godu wayokuthandaza, watjho godu amezwi lawo. 40Wathi nabuyako godu wabafumana balele ngombana amehlwabo gade azele ubuthongo. Azange bazi bona bangathini kuye.
41Wabuya kwesithathu wathi kibo: “Nisalele, nisaphumule na? Kuhlezi kwanjesi! Isikhathi sesifikile. Qalani, iNdodana yoMuntu ikhatjhelwe ezandleni zezoni. 42Vukani! Nambani sikhambeni! Nangu umkhaphelami asiza!”
Ukubotjhwa kwakaJesu
(Mt 26:47-56; Lk 22:47-53; Jwan 18:3-12)
43Kwathi asakhuluma njalo, veliyani uJudasi ongomunye wabafundi bakhe abalitjhumi nambili. Begade akhamba nesiqubuthu esihlome ngeensabula nangeembhuku sithunywe baphristi abakhulu, abafundisi bomthetho kanye nabaphathi. 44Yeke umkhapheli bekabanikela isiboniso wathi: “Loyo engizamcwanga nguye, mbambeni, nikhambe naye nimqaphile.”
45Khonapho uJudasi waya kuJesu wathi: “Rabi!” wamcwanga. 46Amadoda lawo ambamba uJesu, ambopha. 47Omunye walabo ebebajame lapho warhwatjha isabulakhe, wamadlha inceku yomphristi omkhulu, wasusa indlebayo. 48UJesu wathi kibo: “Alo-ke bekufanele bona nize neensabula neembhuku ukuzongibamba sengathi ngimhlanguli na? 49Imihla yoke benginani, ngifundisa ngeenrhodlweni zethempeli, akhange ningibambe. Kodwana kufanele bona imitlolo izaliseke.”
50Khonapho boke bamtjhiya babaleka.
51Kwaba nesokana elalingakembathi ilitho kwaphela lizisonge ngelineni, elalandela uJesu. Kwathi lokha nabambambako, 52isokanelo labaleka labe latjhiya nelinenanyana leyo lapho.
UJesu phambi kwebandla labaphristi
(Mt 26:57-68; Lk 22:54-55,63-71; Jwan 18:13-14,19-24)
53Basa uJesu kumphristi omkhulu. Boke abaphristi abakhulu, abaphathi, nabafundisi bomthetho bahlangana. 54UPitrosi wamlandela kudanyana, wabe wayokungena ngesirhodlweni somphristi omkhulu. Wahlala lapho nabaqaphi, azothisa emlilweni. 55Abaphristi abakhulu kanye nebandla loke bafuna ubufakazi ngoJesu ukuze bambulale, kodwana babutlhoga. 56Abofakazi abanengi bafakaza amanga ngoJesu, kodwana ubufakazi babo akhange buthomane.
57Yeke amadoda athileko asikima, ethula ubufakazi bamala ngoJesu athi: 58“Simzwile nakasithi: ‘Ngizakugiriza ithempeli elakhiwe ngezandla kuthi ngamalanga amathathu ngakhe elinye elingakakhiwa ngezandla!’ ” 59Khonapho ubufakazi babo akhange buthomane.
60Umphristi omkhulu wasikima hlangana nabo, wabuza uJesu wathi: “Awuzukuphendula na? Yini into abantwaba abayifakaza ngawe le na?”
61Kodwana uJesu wazithulela, akhange aphendule. Umphristi omkhulu wambuza godu wathi: “UnguKrestu, iNdodana yoBusisiweko na?”
62UJesu waphendula wathi: “Iye nginguye;
“begodu nizakubona iNdodana yoMuntu
ihlezi ngesigomeni sakaSomandla,
isiza ngamafu wezulwini.”
63Umphristi omkhulu watlebhula izambatho zakhe, wathi: “Sisabafunelani abofakazi abanye na? 64Nizizwele ukunyefula kwakhe. Alo, nithini na?” Boke bamlahla ngomlandu wokubulawa.
65Yeke abanye bathoma ukumkhafulela, bamvala amehlo, bamphosa amaguduva, bathi kuye: “Phorofida!” Boke abaqaphi bamthatha, bamdula.
UPitrosi uphika uJesu
(Mt 26:69-75; Lk 22:56-62; Jwan 18:15-18,25-27)
66Kwathi uPitrosi asese senzasi ngesirhodlweni, kweza omunye wabantazana abaziinsebenzi zomphristi omkhulu. 67Kuthe lokha nabona uPitrosi azothisa, wamqalela eduze wathi: “Nawe gade unoJesu umNazaretha loya.”
68Kodwana wakuphika lokho, wathi: “Angazi begodu angilemuki bona ukhuluma ngani.” Watjho njalo wabe waphuma ngesango.
69Kwathi lokha umntazana osisebenzi nambonako, wathi ebantwini ebebajame lapho: “Ngambala umrhali lo ungomunye wabo.” 70Godu uPitrosi waphika.
Ngemva kwesikhatjhana abantu ebebajame lapho, bathi kuPitrosi: “Kwamambala ungomunye wabo ngombana ungumGalile.”
71Wathoma ukuthukana, wafunga wathi: “Ngithi angiyazi indoda enikhuluma ngayo le!”
72Khonokho umkukurumbu walila kwesibili. UPitrosi wakhumbula ilizwi uJesu ebegade alikhulume kuye lokuthi: “Ngaphambi kobana umkukurumbu ulile kabili, uzabe sewungiphike kathathu bona awungazi.” Waphahluka, walila.
