UNUMERI 12

₁UMiriyamu no-Aroni bahleba uMosi ngebanga lokuthatha kwakhe umfazi omuKutjhe, bathi: “Kazi uthethe umKutjhe!” ₂Godu bathi: “Ingabe mbala uSomnini ukhulume kwaphela ngoMosi? Kanti akakakhulumi nangathi godu na?” USomnini wakwizwa lokho.

₃NakunguMosi yena bekazithobe ukudlula boke abantu abaphila ngaphasi komthunzi welanga.

₄Khonapho uSomnini wakhuluma noMosi no-Aroni kanye noMiriyamu wathi: “Yeyi nina, ngobuthathu benu njalo, yizani etendeni lokuhlanganela!”

Mbala baphuma beza bobathathu. ₅Nje-ke uSomnini wehla ngesika yelifu wajama emnyango wetende lokuhlanganela, wafese wabiza u-Aroni noMiriyamu. Batjhidela-ke bobabili. ₆USomnini wathi kibo: “Akhese nilalele la: Nakube kukhona umphorofidi hlangana nani, mina-ke Somnini ngizazazisa kuye ngombono, ngikhulume naye ngebhudango. ₇Nokho akusinjalo ngencekwami uMosi, yena ungothembekileko emsebenzinami woke. ₈Yena ngikhuluma naye bunqopha, ubuso nobuso ingasi ngekulumo yokugwagwanisa. Iye, yena uyakwazi ukuzibonakalisa kwami. Kubayini-ke nina ningakhange nesabe ukuhleba incekwami uMosi na?”

₉Ubukhali bakaSomnini bavutha phezu kwabo, wase uyabatjhiya. ₁₀Lithe lisuka nje ilifu phezu kwetende, qala, uMiriyamu gade sele akghamathele ikhwekhwe amhlophe njengesithwathwa. Uthe u-Aroni nakathi uphendukela kuye, madekhethu unekhwekhwe! ₁₁Nje-ke wabikela uMosi wathi: “Maye, babethu! Bengithi akhe ngikhulume. Ngiyakubawa hle, ungasihlunguphazi ngobudlhayela esone ngabo. ₁₂UMiriyamu akangabi njengobelethwa ahlongakele, ophuma esibelethweni sakanina sele onakele.”

₁₃Nje-ke uMosi walila kuSomnini wathi: “Zimu ngiyakuncenga, mphilise hle.”

₁₄USomnini waphendula uMosi wathi: “Nangabe gade akhafulelwe nguyise ebusweni, bekangazukuhlala amalanga alikhomba arhubutjhekile na? Yeke akavalelwe amalanga alikhomba ngaphandle kwekampa, kuthi emva kwalokho abuyiswe.”

₁₅Nje-ke uMiriyamu wavalelwa ngaphandle kwekampa amalanga alikhomba. Ngesikhatheso abantu akhange bathathe ikhambo, bekwabuyiswa uMiriyamu. ₁₆Emva kwalokho abantu bafuduka eRhatserothi bafese bahloma amatendabo erhalawumbeni leParana.