UNUMERI 18

₁USomnini wakhuluma no-Aroni wathi: “Wena namadodanakho kanye nekoro yekhenu enawe nizakuthwala isiphambeko esenziwe endaweni ecwengileko. Kodwana wena namadodanakho kwaphela nizakuthwala isiphambeko sobuphristi. ₂Utjhideze abafowenu okutjho ikoro yamaLevi okuyindlu kayihlo ukuze bahlanganyele nawe, bakusize lokha wena namadodanakho nanilotjha phambi kwetende elinobufakazi. ₃Bazakwenza imisebenzi obanikela yona etendeni loke, kodwana bangatjhideli ezitjeni ezicwengileko namkha e-aldarini. Nange bangatjhidela bazakufa bese nani niyafa. ₄Bazakuhlanganyela nawe, baqale itende lokuhlanganela bebenze yoke imisebenzalo kodwana ongasi mphristi angatjhideli kini ₅lokha nanisebenza ngezitja ezicwengileko namkha e-aldarini. Ngendlela leyo nizabe nikhandela ilaka lakaSomnini bona lingehleli phezu kwama-Israyeli godu. ₆Yelela-ke, mina Somnini ngikhethe abafowenu amaLevi phakathi kwama-Israyeli njengesipho senu. Bona bahlukaniselwe uSomnini bonyana benze umsebenzi wetende lokuhlanganela. ₇Kodwana wena namadodanakho akanye nawe nizakwenza umsebenzenu wobuphristi omayelana nakho koke okuphathelene ne-aldari nendawo engemuva kwesiyaya setjhila. Lokho kumsebenzenu. Ubuphristi ngibunikele nina njengesipho, nje-ke nanyana ngubani otjhidela eduze angasi mphristi, uzakubulawa.”

₈Godu uSomnini wathi ku-Aroni: “Mina Somnini, ngimi engikunikele umsebenzi ophathelene neminikelo esibiko, okutjho izipho ezikhethekileko zama-Israyeli. Ngikunikele zona bona kube sisabelo sakho namadodanakho nini nanini. ₉Eminikelweni yoke ecwenge khulu uzakufunyana okungakatjhiswa e-aldarini. Iye, yoke iminikelo ecwenge khulu ephuma eminikelweni yeenthoro, emihlabelweni yehlambululo neyehlawulo ingeyakho namadodanakho. ₁₀Nizayidla njengomnikelo ocwenge khulu. Boke abaduna phakathi kwabaphristi banelungelo lokuwudla. Kumnikelo ocwengileko kini. ₁₁Nakhu okhunye godu okungokwakho: Isabelo esibekiweko eminikelweni yoke esibiko ama-Israyeli ayiletha kuSomnini, ngesakho. Ngisinikele wena namadodanakho kanye namadodakazakho njengesabelo senu nini nanini. Woke ohlambulukileko endlinakho angadla kiso. ₁₂Koke okuhle kwesivuno sokuthoma samafutha we-oliva, kwewayini nokweenthoro okulethwa ma-Israyeli kuSomnini, ngikunikela wena. ₁₃Isilumo sakho koke okusemasiminabo asiletha kuSomnini, sizakuba ngesakho. Woke ohlambulukileko endlinakho angadla kiso. ₁₄Godu okuzilelwa ngakho uSomnini kwa-Israyeli kungokwakho. ₁₅Koke okuduna okuphume qangi esibelethweni, kwabantu nekweenlwana okulethwe kuSomnini, kuzakuba ngokwakho. Nokho-ke amazibulo wabantu neweenlwana ezingakahlambuluki, niwahlenge. ₁₆Lokha izibulo nalinenyanga yinye kumele ubeke inani lokuhlengwa elimagremu amatjhumi amahlanu nalikhomba wesiliva ukuya ngesilinganiso sendawo ecwengileko. ₁₇Kodwana amazibulo weenkomo, izimvu neembuzi angahlengwa ngombana acwengile. Fafaza iingazi zawo phezu kwe-aldari, utjhise imihlwehlwe yawo kube mnikelo okhethekileko, owamukeleka kuSomnini. ₁₈Inyama yawo izakuba ngeyakho njengombana isifuba esiphakanyiswa nomlenze wangesidleni kungokwakho. ₁₉Yoke iminikelo esibiko elethwa ma-Israyeli kuSomnini, ngiyinikela wena, amadodanakho namadodakazakho kube sisabelo sakho nini nanini. Lokho kusivumelwano esijanyiswe ngetswayi ngehlangothini lakaSomnini mayelana nawe neenzukulwana zakho.”

₂₀Godu uSomnini wathi ku-Aroni: “Angeze waba nelifa hlangana nama-Israyeli begodu nesabelo sesimu angeze ube naso phakathi kwawo. Mina Somnini ngisisabelo sakho nelifa lakho phakathi kwama-Israyeli.

₂₁“Koke kwetjhumi kwa-Israyeli, ngikunikele amaLevi bona kube lilifa lawo lokuwavuza emsebenzinawo wokulotjha etendeni lokuhlanganela. ₂₂Kusukela nje, ama-Israyeli akukafaneli atjhidele etendeni lokuhlanganela ngombana nakenza njalo azakuthwala isono bese ayafa. ₂₃Kodwana maLevi azakwenza umsebenzi wetende lokuhlanganela begodu azakuthwala isiphambeko esenziwa kilo. Lokhu kuzakuba simiso sanini nanini eenzukulwaneni zawo. AmaLevi angeze aba nelifa hlangana nama-Israyeli ₂₄ngombana ngiwanikele kwetjhumi okulethwa ma-Israyeli kuSomnini bona kube lilifa lawo. Kungalokho ngithe kiwo angeze aba nelifa hlangana nama-Israyeli.”

₂₅USomnini wakhuluma noMosi wathi ₂₆akakhulume namaLevi athi kiwo: “Lokha nanamukela kwetjhumi kuma-Israyeli engininikele khona bona kube ngokwenu, khuphani kwetjhumi emnikelweni lowo kube ngokwakaSomnini. Lokho kuzakuba ngokwetjhumi kokwetjhumi. ₂₇Umnikelwenu wokwetjhumi lowo uzakubalwa ngasuthi mnikelo weenthoro ophuma eselelweni senu newayini kanye namafutha we-oliva aphuma ebutlhodlhelweni benu. ₂₈Ngendlela leyo nani nizakhupha kuSomnini umnikelo wokwetjhumi kwakho koke kwenu enikwamukela kuma-Israyeli. Nje-ke nizakuthatha umnikelo kaSomnini lowo niwunikele u-Aroni umphristi. ₂₉Eminikelweni yoke eninikelwa yona, nikelani uSomnini umnikelo ongowakhe. Lokho kuzakuba mnikelo ocwengileko kuSomnini kikho koke okuhle kweminikelo.”

₃₀Godu uSomnini wakhuluma noMosi wathi akakhulume namaLevi athi: “Lokha nina maLevi naninikela okukhethekileko kweminikelo leyo bese ithathwa ingasuthi sivuno esivela eselelweni nebutlhodlhelweni, ₃₁okuseleko ningakudlela nanyana kukuphi, nina nezindlu zenu. Lokho kumvuzo wenu mayelana nomsebenzi wokulotjha etendeni lokuhlanganela. ₃₂Angeze naba nomlandu ngawo naniwudlako ikani nje nanithome ngokunikela okukhethekileko kwawo kuSomnini. Ngalokho ningasilaphazi izipho ezikhethekileko zama-Israyeli ukuze ningafi.”