UNUMERI 9

₁USomnini wakhuluma noMosi erhalawumbeni leSinayi ngenyanga yokuthoma yomnyaka wesibili emva kokuphuma kwama-Israyeli enarheni yeGibhide wathi: ₂“Yenza ama-Israyeli bona agidinge umnyanya wePhasika ngesikhathi esibekiweko salo. ₃Kufuze libe ngelanga letjhumi nane enyangeni le, kube ngamarhwaqela ngesikhathi esibekiweko. Ligidingeni ngokuya ngazo zoke iimiso zalo nemithethwalo yoke.”

₄UMosi wawatjela njalo-ke ama-Israyeli ngokugidingwa kwePhasika. ₅Mbala kwathi ngenyanga yokuthoma mhlana zilitjhumi nane, ama-Israyeli agidinga iPhasika ngamarhwaqela erhalawumbeni leSinayi. Ama-Israyeli enza koke kwaba njengendlela uSomnini ayala ngayo uMosi.

₆Kodwana bekukhona amadoda asilapheleko ngebanga lokobana gade athinte isidumbu somuntu. Ngalokho wona akhange aphumelele ukugidinga iPhasika, yeke mhlokho aziveza phambi kwakaMosi no-Aroni, ₇athi kibo: “Nasinje, sibe ngabasilapheleko ngebanga lokuthinta isidumbu somuntu. Alo, singakhandelwa yini bona sinikele umnikelo kaSomnini ngesikhathi sawo esijanyisiweko phakathi kwama-Israyeli na?”

₈UMosi wathi kiwo: “Lindani khengiyokwizwa bona uSomnini uzokuyala athini ngani.”

₉USomnini wakhuluma noMosi wathi ₁₀akakhulume nama-Israyeli athi: “Nangabe omunye wenu namkha weenzukulwana zenu usekhambeni kude namkha usilaphele ngebanga lokuthinta isidumbu, kodwana ufuna ukugidinga iPhasika lakaSomnini, ₁₁kufuze aligidinge ngamarhwaqela mhlana inyanga yesibili inamalanga alitjhumi nane. Alidle ngesikwa esinganangumelo neenrhabelo ezibabako. ₁₂Angatjhiyi litho lalo begodu angephuli ithambo lakhona. Agidinge iPhasika kulandelwe zoke iimiso zalo. ₁₃Kodwana nangabe umuntu ohlambulukileko begodu ongekho ekhambeni wala ukugidinga iPhasika, uzakujutjwa ebantwini bekhabo ngombana akakanikeli umnikelwakhe ngesikhathi sawo kuSomnini. Kwamambala umuntu loyo uzazizwa ngesono sakheso.

₁₄“Nangabe kunesikhonzi phakathi kwenu esithanda ukugidinga iPhasika, asiligidinge ngokweemiso nemithethwalo. Nibe nesimiso sinye esikhonzini namkha emuntwini wendabuko kwa-Israyeli.”

₁₅Kwathi mhlana kujanyiswa ithaberinakeli, ilifu lembesa ithaberinakelelo, okulitende lobufakazi. Nakuhlwako bekuyokusa ilifelo belibonakala linjengekehla yomlilo ngehla kwethaberinakeli. ₁₆Bekunjalo-ke ngaso soke isikhathi: Emini belembeswa lilifu, kuthi ebusuku ilifelo libonakale linjengekehla yomlilo. ₁₇Bekuthi lokha ilifu naliphakamako, ama-Israyeli afuduke, kuthi lokha ilifu nalijamako, ama-Israyeli ahlome amatendawo lapho. ₁₈Ama-Israyeli bekafuduka ngomyalo kaSomnini begodu ahlome amatendawo ngomyalwakhe. Ngesikhathi soke ilifu nalisajame ngehla kwetende, ama-Israyeli gade angasuki. ₁₉Ngitjho nanyana ilifu belingajama amalanga amanengi ngehla kwethaberinakeli, ama-Israyeli gade agcina umyalo kaSomnini, angasuki. ₂₀Kwesinye isikhathi ilifu belijama amalangana ngehla kwethaberinakeli, nanyana kunjalo ama-Israyeli bekahlala ekampeni. Bekakhamba kwaphela ngomyalo kaSomnini. ₂₁Kwesinye isikhathi ilifu belijama ukusuka ntambama bekube sekuseni. Bese kuthi lokha ilifu nalikhuphukako ekuseni, nawo afuduke. Ngitjho nanyana ilifelo belingahlala ubusuku nemini, naliphakamako nawo bekakhamba. ₂₂Nangabe malanga amabili, inyanga namkha isikhathi eside ilifu lijamile, ama-Israyeli nawo gade angasuki ekampenapho. Kodwana bekasuka kwaphela ilifu naliphakamako. ₂₃Bekahloma amatendawo namkha asuke kwaphela ngomyalo kaSomnini. Alalela iimiso zakaSomnini ayala uMosi ngazo.