IZAGA 1

₂Ngezokwazi ubuhlakani nokuyelelisa,

kanye nokuzwisisa amezwi welemuko;

₃iye, ukuzuza ukulaywa okunokuhlakanipha,

ukulunga, ubulungiswa nokufaneleko.

₄Abanganalwazi zibanikela ilemuko,

omncani ilwazi nokuhlukanisa.

₅Ohlakaniphileko akalalele,

azuze ingqondo

nonekghono afumane indlela yoburholi,

₆ukuze azwisise isaga nesitjho

okutjho amezwi neenrarejo zabahlakaniphileko.

₇Ukwesaba uSomnini kukuthoma kokuhlakanipha,

kodwana isidlhadlha sinyaza ubuhlakani nokusolwa.

₈Ndodanami, lalela isiyeleliso sakayihlo,

ungalahli ifundiso kanyoko;

₉mbala, lokho kuzakuba mbhode

kufaneze ihlokwakho,

kube sigejo entanyenakho.

₁₀Ndodanami, nakube izoni ziyakuyenga,

ungaphiki nazo.

₁₁Nakube zithi, “Namba nathi,

sikhukhuthele iingazi zothileko,

sinanabele umphefumulo omsulwa,

₁₂iye, sibaginye baphila njengokufa,

njengalabo abehlela ethuneni basaphelele;

₁₃sizazifumanela imihlobohlobo yobuphaziphazi,

sizalise iinkumba zethu ngepango,

₁₄nawuphosa ifumbakho kanye nathi

bese sahlukaniselana isikhwama”,

₁₅ndodanami, ungaphiki nazo.

Ungalibhadi emzilenazo,

₁₆ngombana iinyawo zazo,

zigijimela ekoneni,

ziyarhaba ukuthulula iingazi.

₁₇Akusizi ukubeka isifu

khisibe zoke iinyoni zikuqalile.

₁₈Abantwaba bakhukhuthela iingazi zabo,

bananabela ipilwabo!

₁₉Zinjalo iindlela zabo boke

abazifunela inzuzo ngokurhabileko:

Kuthatha ipilo yabanikazi benzuzo leyo!

₂₀Unokuhlakanipha urhuwelela endledlaneni,

uphakamisa iphimbo ematatawini.

₂₁Umemeza ekabeni yeendledlana eziyaluzelako,

akhulume amezwi wokuhlakanipha

ebungenweni bamasango wedorobho athi:

₂₂“Kuzabe kube nini

nina eninganalwazi nithanda ukungabi nelwazi na?

Kuzabe kube nini

iinyefuli zijajuliswa kukokomeja

neendlhadlha zizonda ilwazi na?

₂₃Nangathana khenalalela ukukhalima kwami,

bengizokuthululela ummoya wokuhlakanipha kini,

nginazise amezwami.

₂₄Kodwana ngebanga lokobana nalile nangibizako,

nangayelela nangelula isandla sami,

₂₅nathalalisa zoke iinluleko zami,

nangavuma ukukhalima kwami,

₂₆nami-ke ngizokuhleka ihlekelelenu,

ngininyefule nanehlelwa kukwesaba,

₂₇iye, ukwesaba nakunehlela njengesiwuruwuru,

ihlekelelenu nayivuthela njengesivunguvungu,

nalokha nanembathwa lisizi neenkathazo.

₂₈“Yeke bazangibiza, ngingabaphenduli,

bangifunisise, bangangifumani.

₂₉Njengombana bahloye ilwazi,

bangakhethi ukwesaba uSomnini,

₃₀bangamukeli iseluleko sami,

badelela koke ukukhalima kwami,

₃₁bazakugoma isithelo sendlelabo,

bazaliswe ngomphumela wamaqhingabo.

₃₂Ukuphambuka kwabanganalwazi kuyababulala

nokuzethemba kweendlhadlha kuyazibhubhisa.

₃₃Kodwana ongilalelako, uzakuphila aphephile,

azigedle, angabi nokwesaba ihlekelele.”