IZAGA 14

₁Unokuhlakanipha uzakhela ikumba,

kodwana unobudlhadlha uyigiriza ngezandla zakhe.

₂Okhamba ngobuqotho wesaba uSomnini,

kodwana osendleleni ephambukileko uyamnyaza.

₃Umlomo wesidlhadlha usibangela iswazi emhlana,

kodwana iimbhena zabahlakaniphileko ziyabavikela.

₄Lapha kunganankomo khona,

kunekerebhe yamabele kwaphela;

kodwana ngamandla weenkomo,

kuba nesivuno esinengi.

₅Ufakazi weqiniso akaleyi amanga,

kodwana wekohliso uphafuza amanga.

₆Isinyefuli sifuna ukuhlakanipha, singakufumani;

kodwana ilwazi liyazehlela konengqondo.

₇Tjhida emuntwini osidlhadlha

ngombana akunalwazi eembheneni zakhe.

₈Ukuhlakanipha kovuthiweko kumbonisa indlela,

kodwana ubuwiliwili beendlhadlha buyazikhohlisa.

₉Iindlhadlha zinyefula umnikelo werhobhe,

kodwana phakathi kwabaqotho kunommoya omuhle.

₁₀Ihliziyo yazi ubumunyu bayo,

nephandle angeze lahlanganyela itokozwayo.

₁₁Indlu yeenkhohlakali izokutjhabalaliswa,

kodwana itende labaqotho lizakuphumelela.

₁₂Kunendlela ebonakala ilungile emuntwini,

kodwana isiphetho sayo sikukufa.

₁₃Ngaphakathi kwesihleko ihliziyo ingase ibe buhlungu,

netokozo ingaphelela esizini.

₁₄Owonakeleko uzakufunyana umvuzo weendlela zakhe

nomuntu olungileko avuzwe ngokwekambakhe.

₁₅Onganalwazi ukholwa nanyana yini,

kodwana ovuthiweko uyaqaphelisisa amagadangwakhe.

₁₆Ohlakaniphileko uyayelela, atjhide kokumbi,

kodwana isidlhadlha siyatepeleka sizilahlele phasi.

₁₇Onguhliziywana wenza ubudlhayela,

nomuntu onobuqili uyazondwa.

₁₈Abanganalwazi bazuza ubudlhadlha,

kodwana abavuthiweko bathweswa isihlohlo selwazi.

₁₉Abambi bazokuguqa phambi kabalungileko

nabakhohlakeleko emasangweni wolungileko.

₂₀Abachakileko bagegedwa ngitjho nababantu bekhabo,

kodwana abanjingileko banabangani abanengi.

₂₁Onyaza wekhabo uyona,

kodwana ubusisiwe onesisa koswelako.

₂₂Abatlama okumbi bayadurha,

kodwana abatlama okuhle

bazuza ukwethembeka neqiniso.

₂₃Woke umsebenzi obudisi uletha inzuzo,

kodwana ikulumo engayindawo irholela ebuchakeni.

₂₄Umnono wabahlakaniphileko sihlohlo sabo,

kodwana ubudlhadlha beendlhadlha budlhadlha.

₂₅Ufakazi weqiniso uhlenga amaphilo,

kodwana ophafuza amanga umkhohlisi.

₂₆Ukuhlonipha uSomnini

kunikela umuntu isiqiniseko samambala;

lokho kubuphephelo ebantwaneni bakhe.

₂₇Ukwesaba uSomnini kumthombo wokuphila,

kudedisa umuntu ezifwini zokufa.

₂₈Abantu abanengi balidumo lekosi;

ngaphandle kwabantu, isikhulu asinabuyo.

₂₉Obuthaka ekusilingekeni unokuzwisisa okukhulu,

kodwana isififana sikhombisa ubudlhadlha.

₃₀Ihliziyo enokuthula ikuphila komzimba,

kodwana umrhawu usidliso emathanjeni.

₃₁Ogandelela abachakileko unyaza uMbumbi wabo,

kodwana onesisa koswelako uhlonipha uZimu.

₃₂Ophambeneko uwiswa bukhohlakali bakhe,

kodwana olungileko uphephela ebuqothweni bakhe.

₃₃Ukuhlakanipha kuhlala ehliziyweni yonengqondo,

ngitjho neendlhadlha ziyakwazi lokho.

₃₄Ukulunga kuphakamisa isizwe,

kodwana isono silihlazo ebantwini.

₃₅Ikosi ithokoziswa yinceku ehlakaniphileko,

kodwana itukuthelwayo iphezu kwelihlazo.