IZAGA 17

₁Kungcono ukudobhelela iintshutshuru,

ube nokuthula,

kunekumba ezele idili,

kodwana khibe kunenturhu.

₂Inceku ehlakaniphileko izakubusa

phezu kwendodana enganasimilo,

ihlanganyele ilifa njengomunye wabafo.

₃Isincibilikiseli senzelwa isiliva

nekehla yomlilo ingeyegolide;

umhloli weenhliziyo nguSomnini.

₄Owenza okumbi ulalela iimbhena ezonakeleko,

umleyimanga uyelela ilimu elilimazako.

₅Ohlekisa ngesichaka unyaza umenzaso,

nohleka ihlekelele uzakuhlunguphazwa.

₆Iinzukulwana zisihlohlo ebantwini abadala,

nababelethi baligugu ebantwaneni babo.

₇Ikulumo ehle ayisifaneli isidlhadlha,

kangangani-ke emamanga emlonyeni wesikhulu.

₈Isifumbathiso sifana nelitje lomlingo

emehlweni wosiphetheko,

ucabanga bona uyaphumelela

kikho koke akwenzako.

₉Ositha isiphambeko ukhuthaza ithando;

ovumbulula isikhubekiso wahlukanisa abangani.

₁₀Ukukhalima kuyazika konengqondo,

ukudlula imivuvu elikhulu phezu kwesidlhadlha.

₁₁Omumbi nabanga ukuhlubuka,

uzakunikelelwa ngesithunywa esinelunya.

₁₂Kungcono ukuqalana nonomrhaso othathelwe abantwana,

kunokuqalana nesidlhadlha esiduda ebudlhayeleni baso.

₁₃Nakube umuntu ubuyisela okuhle ngokumbi,

ubumbi abusoze baphuma emzinakhe.

₁₄Ukuthoma inturhu, kufana nokubhoboza amanzi,

yeke, lisa indaba ngaphambi kobana kuthome ukulwa.

₁₅Omela isikhohlakali bona simsulwa

nolahla olungileko bona usikhohlakali,

bobabili njalo basinyenyiso kuSomnini.

₁₆Buyini ububhadekelo bemali nayisesandleni sesidlhadlha na?

Ingaba kuthenga ukuhlakanipha khibe asinangqondo?

₁₇Umngani uhlala athembekile,

iye, ungumfo obelethelwe iinkhathi ezibudisi.

₁₈Umuntu ogijimela ukuzibopha,

abe sibambiso somunye, akanangqondo.

₁₉Othanda isiphambeko, uthanda ukucabana;

onomlomo omkhulu uzibizela ihlekelele.

₂₀Onehliziyo eyonakeleko akaphumeleli,

nonelimu elikhohlisako uwela engozini.

₂₁Obeletha isidlhadlha usesizini,

akunathabo kumbelethi wesidlhadlha.

₂₂Ihliziyo enamileko iyintatha ehle,

kodwana umphefumulo oqobekileko womisa amathambo.

₂₃Isikhohlakali sizithathela isifumbathiso ngencilini

ukuphambanisa iindlela zomthetho.

₂₄Onengqondo ubeka ukuhlakanipha phambi kwakhe,

kodwana amehlo wesidlhadlha asepelazwe.

₂₅Umntwana osidlhadlha ulisizi kuyise

nobumunyu kombelethileko.

₂₆Akusikuhle ukuhlawulisa umuntu omsulwa

namkha ukubetha iinkhulu ngokungakafaneli.

₂₇Owazi ilwazi ulonda amezwakhe

nonommoya ophasi umumuntu ozwisisako.

₂₈Ngitjho nesidlhadlha

sithathwa inga sihlakaniphile nasizithuleleko,

kuthiwe sinengqondo nasivale umlomo.