IZAGA 22

₁Ibizo elihle lithandeka khulu kunomnono omnengi;

ukuhlonipheka kungcono kunesiliva negolide.

₂Abanjingileko nabachakileko bafana ngalokhu:

Boke njalo badalwe nguSomnini.

₃Ovuthiweko nabona ingozi uyabhaca,

kodwana abanganalwazi bayaragalala, bahlupheke.

₄Umphumela wokuzithoba nokwesaba uSomnini

uletha umnono, idumo nepilo.

₅Endleleni yokonakala kunameva nezifu,

kodwana owelusa umphefumulwakhe uba kude nalokho.

₆Nawukhulisa umntwana ngendlela azakukhamba ngayo,

nasele akhulile, angeze aphambuka kiyo.

₇Injinga ibusa phezu kweenchaka,

nobolekako ulikhoboka lobolekisanako.

₈Otjala okuphambeneko, uvuna ihlekelele

neswazi letukuthelwakhe lizakutjhabalaliswa.

₉Umuntu onesisa uzakubusiswa,

ngombana ukugoma kwakhe ukwabelana nabadududu.

₁₀Nawuqotjha isinyefuli, kuphuma ukucabana,

ukumangalelana nehlamba kuyaphela.

₁₁Othanda ihliziyo emsulwa nonekulumo enezwelo,

uzakuba mngani wekosi.

₁₂Amehlo kaSomnini aqaphele ilwazi,

uphambanisa amezwi wongathembekiko.

₁₃Ivila lithi: “Kunebhubezi ngaphandlapha!

Ngizokubulawa eendledlaneni!”

₁₄Umlomo kanondindwa umugodi otjhingako wesifu,

onikelelwe nguSomnini urhohlomela ngakiwo.

₁₅Ubudlhadlha bubotjhelelwe ehliziyweni yomntwana,

kodwana iswazi lokuyala libutjhidisela kude naye.

₁₆Ogandelela ochakileko ngehloso

yokwandisa umnonwakhe,

nopha abanjingileko izipho,

bobabili njalo bagcina bachakile.

₁₇Yelela bese ulalela izitjho zabahlakaniphileko,

beka ingqondwakho kengikufundisako,

₁₈ngombana kuzakarisa nawukubeka ehliziywenakho,

kuhlale kulungiselelekile emlonyenakho.

₁₉Nawe ngikwazisa zona namhlanjesi

ukuze ithemba lakho libe kuSomnini.

₂₀Angithi ngikutlolele izitjho ezimatjhumi amathathu,

iye, izitjho zokweluleka nokuhlakaniphisa,

₂₁bonyana zikufundise iqiniso namezwi wokwethembeka

ukuze ube nependulo enqophileko kabakuthumileko.

₂₂Ungadlelezeli ochakileko ngombana umbona achakile

begodu ungagadangeli odududu ebandla.

₂₃Mbala uSomnini uzamumela onjalo emlandwini,

adlelezele labo abamdlelezelako.

₂₄Ungakhi ubungani nomuntu onehliziywana,

ungazimanyanisi nomuntu orhaba ukuthukuthela,

₂₅nakungasinjalo uzakufunda imikhubakhe,

ufake ipilwakho engozini yesifu.

₂₆Ungabi hlangana nabenze isibopho

ngesiga sokuqhawulana,

iye, labo abenza isithembiso malungana neenkolodo.

₂₇Nakube awunalitho lokukhokha,

kubayini omkolodako akuthathele umbhedakho

uqalile na?

₂₈Ungatjhidisi isikhonkhwani sekadeni

esabekwa boyihlomkhulu.

₂₉Uyambona umuntu onekghono emsebenzinakhe na?

Nguye-ke ozakusebenza phambi kwamakhosi,

akazukusebenza phambi kwabantukazana.