IZAGA 23

₁Lokha nawuhlala phasi bona ugome nombusi,

tjheja khulu loyo ophambi kwakho.

₂Bamba umphimbakho,

nakube umumuntu okhaluzako.

₃Ungakhanukeli iinkhanakhana zakhe

ngombana uzazikhupha isithunzi ngazo.

₄Ungatjhabatjhekeli ubunjinga,

yiba nokuhlakanipha ukuze uzithibe.

₅Nawususa amehlwakho kibo,

abuzukunyamalala na?

Ngambala buzazenzela iimpiko ezinjengezedlanga,

buphaphele esibhakabhakeni.

₆Ungagomi ukudla komuntu odimanako,

ungakhanukeli iinkhanakhana zakhe;

₇ngombana uhlala acabanga ngeendleko.

Unje-ke yena, uthi kuwe, “Goma usele!”

kodwana khibe uyakutshima.

₈Uzakuhlanza ngitjho nokuncani okugomileko,

ngalokho uzabe udlale ngamezwi amahle.

₉Ungakhulumi nesidlhadlha,

ngombana sizakunyefula ubuhlakani bamezwakho.

₁₀Ungatjhidisi isikhonkhwani sekadeni,

ungadlelezeli amasimu weentandani,

₁₁ngombana uZimu umHlengazo unamandla;

uzazimela emlandwini ophakathi kwakho nazo.

₁₂Beka ihliziywakho ekuyalweni

neendlebe zakho emazwini welwazi.

₁₃Ungalisi ukukhalima umntwanakho;

akazukufa nawumnunga ngeswazi.

₁₄Wena nawumbetha ngeswazi,

uzabe usindisa umphefumulwakhe ekufeni.

₁₅Mntwanami, nakube ihliziywakho ihlakaniphile,

yeke nami ngizakujabula ehliziyweni.

₁₆Ilingaphakathi lami lizakujekezela,

iimbhena zakho nazikhuluma okufaneleko.

₁₇Ihliziywakho ayingakhanuki beyiyengwe zizoni,

kodwana hlala njalo wesaba uSomnini;

₁₈nje-ke uzakuba nengomuso

nethemba lakho angeze lafeleliswa.

₁₉Lalela mntwanami, uhlakaniphe,

ubeke ihliziywakho endleleni elungileko.

₂₀Ungahlanganyeli nabarhuqa iwayini

nabarhiribidela inyama.

₂₁Mbala iindakwa neenrhiribideli ziyachaka,

ukuyenda kuzembathisa amanikiniki.

₂₂Lalela uyihlo owakubelethako,

unganyazi unyoko nasele aluphele.

₂₃Zuza iqiniso uligugudlhele,

fumana ukuhlakanipha,

ukuyalwa kanye nokuzwisisa.

₂₄Uyise wolungileko unetokozo ekulu,

obeletha ohlakaniphileko uyathokoza ngaye.

₂₅Inga uyihlo nonyoko bangajekezela ngawe,

iye, loyo okubelethileko uyajabula!

₂₆Mntwanami, nginikela ihliziywakho,

amehlwakho uwabeke eendleleni zami,

₂₇ngombana ingwadla imugodi otjhingako wesifu,

nonondindwa uyipetsi emkghotha.

₂₈Nguye okhokhobela amadoda endleleni njengesigebengu,

andise isibalo salawo angasathembekiko.

₂₉Ngubani othi, “Maye!” nothi, “Wo!”?

Ngubani onepikiswano?

Ngubani oneenghonghoyilo?

Ngubani obengakafanelwa maduma?

Ngubani onamehlo abomvu?

₃₀Ngilabo abalibele ngewayini,

abanandipha ngemarhabheni wewayini eliwunyelweko!

₃₁Ungarhuduleli amehlo iwayini nalibomvu,

lokha nalicwazimula ngesiqokweni,

lehle butjhelelezi emphinjeni!

₃₂Ekugcineni liluma njengenyoka,

lifakela isihlungu njengerabi.

₃₃Amehlwakho azakubona imihlolo,

nengqondwakho ihumuzele ngokuphambeneko.

₃₄Uzazizwa inga ulele elwandle,

iye, njengolele phezu kweentambo zomkhumbi.

₃₅Bese uthi: “Ngiduliwe, nokho akhange ngizwe!

Ngibethiwe, kodwana angazi bona kwenzeke nini!

Kanti ngizakuqaquluka nini na?

Ngifuna ukuyoqabula godu!”