IZAGA 5

₁Ndodanami, lalelisisa ukuhlakanipha kwami,

ubeke indlebakho elemukweni lami,

₂ukuze ulonde ingqondo ehle

neembhena zakho zimumathe ilwazi.

₃Yelela, iimbhena zakanondindwa ziwuluka iliju

norhwalabhakhe ubutjhelelezi ukudlula amafutha.

₄Kodwana ekugcineni unondindwa loyo

ubaba njengomrhalagani,

ubukhali ukudlula isabula ebukhali

mahlangothi woke.

₅Iinyawo zakhe zehlela ekufeni,

amagadangwakhe atjhinga endaweni yabafileko.

₆Ugobanisa imizilakhe

ukuze akulahlekise emtlhaleni wokuphila,

wena angeze wakwazi lokho.

₇Nje-ke ndodanami, yewungilalele;

ungaphambuki emezwini womlomami!

₈Khambela kude naye,

ungatjhideli esangweni lekumbakhe,

₉ukuze ungazehlisi isithunzi kabanye

nejamo lakho ngomfazi osihlola,

₁₀iye, nemiqhamuka ingazisuthisi ngelifa lakho,

bese imijulukwakho iphelele ekumbeni yomfazi otjhili.

₁₁Ekupheleni usale ungasenanto,

uqume lokha nasele umzimbakho ukhehlile,

₁₂uzakuthi: “Maye, ngazonda ukusolwa!

Ihliziywami yanyaza ukukhalinywa!

₁₃Akhange ngilalele abafundisi,

nanyana ngibeke indlebe ebelulekini bami.

₁₄Ngipheze ngabhujiswa nya

ehlanganweni nemphakathini.”

₁₅Sela amanzi emphathamanzinakho,

uzikholise ngomthombakho ogelezako.

₁₆Kumele imithombakho iphuphumele ngaphandle

nemiselakho eendledlaneni na?

₁₇Akube ngokwakho wedwa,

ungakwabelani nemiqhamuka.

₁₈Asibusiswe isiyalu sakho,

uthokoze emfazini wobutjha bakho,

₁₉ihlangukazimataka ethandekako,

iye, imbuzikazi yeentaba!

Inga amabelakhe angakwanelisa soke isikhathi,

uhlanyiswe lithando lakhe njalo.

₂₀Ndodanami, kubayini uhlanyiswe ngunondindwa?

Kubayini ugone isifuba sesihlobongi na?

₂₁Mbala iindlela zomuntu

zisemtarini phambi kwakaSomnini.

Yena uhlolisisa yoke imizilakhe.

₂₂Isikhohlakali sibanjwa macalaso,

iinkawule zesono saso zisibambe tli.

₂₃Sifa ngokuswela ukuzibamba

ngombana sibhaduzeliswa budlhayelakazi baso.