AMARHUBO 116

₁Ngiyamthanda uSomnini

ngombana uzwa iphimbo lami,

iye, neenlilo zami.

₂Mbala, ubeka indlebakhe kimi,

nje-ke ngizambiza ipilwami yoke.

₃Ngenganyelwa misinga yokufa,

ivalo lendawo yabafileko langifikela;

ngehlelwa yimbandezelo nesizi.

₄Nje-ke ngabiza ibizo lakaSomnini, ngathi:

“Awu, Somnini, sindisa ipilwami!”

₅USomnini unesirhawu, ulungile,

iye, uZimethu unomusa.

₆USomnini uvikela abathobekileko;

wangisindisa nangithotjiswako.

₇Nje-ke, buyela ekuphumuleni kwakho, mphefumulwami

ngombana uSomnini ukondle kuhle.

₈Mbala wena Somnini,

uhlenge ipilwami ekufeni,

amehlwami eenyembezini

neenyawo zami ekukhutjweni.

₉Ngikhamba phambi kwakaSomnini

enarheni yabaphilako.

₁₀Ngiyakholwa, nanyana ngisithi:

“Ngihlunguphazwe khulu.”

₁₁Mina-ke ngaba namawala ngokuthi:

“Boke abantu banamanga.”

₁₂Yini lokho engingakhokhela ngakho uSomnini,

ngalokho okuhle angenzele khona na?

₁₃Ngizakutjhidela e-aldarini ngekapho yesindiso,

ngibize ibizo lakaSomnini.

₁₄Ngizakugcwalisa iimfungo zami kuSomnini,

iye, phambi kwabantu bakhe boke.

₁₅Ngilemukile bona kuyabiza emehlweni kaSomnini

ukufa kwabathembekileko bakhe.

₁₆Awu, Somnini, ngiyincekwakho!

Njengombana ngiyincekwakho,

indodana yencekukazakho,

ungitjhaphululile emakhamandeleni.

₁₇Kuwe ngizakunikela umnikelo wokuthokoza,

ngibize ibizo lakaSomnini.

₁₈Ngizakugcwalisa iimfungo zami kuSomnini,

iye, phambi kwabantu bakhe boke,

₁₉esirhodlweni sethempeli lakaSomnini

ngaphakathi kwakho, Jerusalema.

Haleluya!