AMARHUBO 132

Somnini, cabangela uDavida,

ngazo zoke iinhlupheko abekezele kizo,

₂nangalokho akufunga kuSomnini,

iye, lokho akuthembisa kongonamandla kaJakopo,

₃ngokuthi: “Angisobe ngangena ngendlinami,

namkha emalalwenami.

₄Angizukuvumela amehlwami alale,

namkha iinkhopha zami zicimeze

₅bengifunyanele uSomnini indawo,

iye, ubuhlalo bongonamandla kaJokopo.”

₆Qala, sezwa ngomfaji sise-Efrata;

sawufunyana esifundeni seJeyarimu.

₇Ngalokho asiyeni endlinakhe,

siguqe esinabelweni seenyawo zakhe.

₈Sikima Somnini!

Yewuye endawenakho yokuphumula,

wena nomfaji wamandlakho.

₉Inga abaphristi bakho

bangembathiswa ukulunga

nabathembekileko bakho bahlokome.

₁₀Ngebanga lencekwakho uDavida,

ungafulatheli umzeswakho.

₁₁Ngeqiniso uSomnini wafunga kuDavida

isifungo angeze asiphendukela.

Wathi: “Omunye wamadodana wedini lakho,

ngizambeka esihlalweni sakho sobukhosi.

₁₂Nangabe amadodanakho

agcina isivumelwano sami

neemfundiso engizawafundisa zona,

khona-ke, amadodanawo,

azakuhlala esihlalweni sakho sobukhosi mlibe.”

₁₃Mbala, uSomnini ukhethe iZiyoni;

wathanda bona ibe sihlalo sakhe;

₁₄wathi: “Le yindawami yokuphumula isiphelani;

lapha, ngizakuhlala khona,

ngombana ngikuthandile.

₁₅Ngizakubusisa ukudla kwayo ngokuphuphumako;

ngisuthise abachakileko bayo ngesikwa.

₁₆Abaphristi bayo ngizabembathisa isindiso,

abathembekileko bayo bahlokome ngokwethaba.

₁₇Lapho-ke ngizakukhulisa amandla kaDavida;

ngilungisele umzeswami isibani.

₁₈Izitha zakhe ngizazembathisa ihlazo,

kodwana isihlohlo sakhe sihlale siqhakazile.”