AMARHUBO 71

₁Kuwe Somnini, ngiyaphephela,

yeke ungavumi ngingene ehlazweni.

₂Ngokulunga kwakho ngenyule, ungihlenge,

beka indlebakho kimi, ungisindise.

₃Yiba lidwala kimi,

irharha lokuphephela ngesikhathi soke.

Uyaleze bonyana ngisinde!

Mbala, ulidwala nerholo lami!

₄Zimami, ngisindise esandleni seenkhohlakali,

iye, ekubanjweni ngabangakalungi nabagandeleli

₅ngombana ulithemba lami, Somnini, Somandla.

Kwebutjheni bami ngithembele kuwe;

₆ngizesame kuwe kwekubelethweni kwami.

Nguwe owaqunta inongo nangibelethwako.

Ukudumisa kwami kukuwe soke isikhathi.

₇Ngibe sibonelo kabanengi

ngombana wena usiphephelo sami esiqinileko.

₈Umlomami uzele idumo

nokukubabaza ilanga loke.

₉Ungangilahli esikhathini sokuluphala,

ungangitjhiyi lokha amandlami naphelako

₁₀ngombana izitha zami zikhuluma ngami

nalabo abeluse ipilwami bazwana ngami,

₁₁bathi: “UZimu umtjhiyile!

Mlandeleni, nimbambe

ngombana akanamenyeli!”

₁₂Zimu, ungabi kude nami!

Zimami, rhaba ungisize!

₁₃Abajamelene nami abakhene bebapheliswe,

abangisongelako bembeswe ihlamba nehlazo.

₁₄Mina ngizakuhlala ngethemba,

ngirhagala ekukudumiseni.

₁₅Umlomami uzakukhuluma ngokulunga kwakho

nesindiswakho ilanga loke

ngombana angibazi ubukghwari bokutlola.

₁₆Ngize kobana ngikhulume godu

ngezenzo zakho ezikulu, Somnini, Somandla,

iye, isindiso eyenziwe nguwe wedwa.

₁₇Kwasebutjheni bami Zimu, ungifundisile;

nanje, ngisamemezela iimangaliso zakho.

₁₈Njengombana sengimdala ngithukghele,

ungangitjhiyi Zimu

bengikhulume ngamandlakho eenzukulwaneni,

okutjho ubungorho bakho kibo boke abazakubelethwa.

₁₉Mbala, ukulunga kwakho Zimu,

kufika emazulwini aphakamileko.

Kukhulu okwenzileko Zimu!

Ngubani onjengawe na?

₂₀Wena ungibonise iinsizi ezinengi kanye neenhlekelele.

Yeke vuselela ipilwami godu,

ubuye ungenyule ekuzikeni kwethuna.

₂₁Dlondlobalisa idumo lami,

ujike ungitjhiriye.

₂₂Mina-ke ngizakudumisa ngeharibha;

iye, ngidumise iqiniso lakho, Zimami,

ngikukhalelele ngeharibhana,

wena ongocwengileko wakwa-Israyeli.

₂₃Lokha nangikhalela iindumiso kuwe,

iimbhena zami zizakuhlokoma,

ngokunjalo nomphefumulwami owuhlengileko.

₂₄Iye, nelimu lami lizakuhumuza

ngokulunga kwakho imini yoke

ngombana labo abangisongeleko

babekwe ekukheneni nehlazweni.