AMARHUBO 72

Zimu, yipha umbusi imithethwakho

nokulunga kwakho kozesiweko.

₂Kwanga angagweba abantu bakho ngokulunga,

iye, abeyame kuwe ngokufaneleko.

₃Kwanga iintaba zingakhiqiza ukuthula ebantwini

nemibundu ithele ukulunga.

₄Kwanga angajamela indaba yabazeyame ngawe;

iye, asindise abachakileko;

kodwana aphohloze ogandelelako.

₅Inga kungathi kusakhanya nenyanga isadarhile,

abantu bakho bakwesabe,

iye, iinzukulwana ngeenzukulwana.

₆Inga umbusi angafana nezulu

eliwulukela etjanini obusikiweko

nanjengomfefezwana othambisa iphasi.

₇Kwanga emihlenakhe kunganda ukulunga,

kuvame ukuthula, inyanga ingasabikhona.

₈Kwanga angabusa ukusuka elwandle ukuya kelinye,

kusukela emlanjeni omkhulu

ukuya epelazwe;

₉abahlali berhalawumbeni bakhothame phambi kwakhe,

izitha zakhe zikhothe ithuli.

₁₀Kwanga amakhosi weTharatjhitjhi

neweligwini angaletha kuye umthelo;

amakhosi weTjheba neSeba amlethele izipho;

₁₁iye, woke amakhosi aguqe phambi kwakhe;

zoke izizwe zizinikele kuye.

₁₂Yena wenyela abadududu nabalilako,

iye, abakhwahlileko nabanganabani.

₁₃Ukhathalela ababuthakathaka nabadududu;

asindise nabatlhogako.

₁₄Ekugandelelweni nenturhwini uyabahlenga,

ipilwabo iligugu emehlwenakhe.

₁₅Kwanga angasiphilela!

Inga angaphiwa igolide leTjheba,

athandazelwe njalonjalo,

ahlale abusisekile ilanga loke.

₁₆Inga kungabakhona inala enarheni,

ngitjho neenqongweni zeentaba,

iinthelo zakhona ziyathazele njengemithi yeLibhanoni,

abantu emadorobheni baphalaze

njengotjani emmangweni.

₁₇Kwanga ibizo lakhe lingahlala mlibe,

idumo lakhe lijame ije kusakhanya;

kwanga zoke izizwe

zingakhanukela ukubusiswa njengaye,

zimbize bonyana ungobusisekileko.

₁₈Akadunyiswe uSomnini uZimu,

iye, uZimu ka-Israyeli,

okunguye yedwa owenza iimangaliso.

₁₉Alidunyiswe isiphelani ibizo lakhe eliphazimulako;

kwanga iphazimulwakhe ingazala iphasi loke.

Amen, iye, Amen.