AMARHUBO 82

UZimu wajama ehlanganweni yezulwini

kobana agwebe hlangana nabozinyana:

₂Mina Somnini ngathi kibozinyana,

“Kuzabe kube nini nigweba ngokungakalungi,

nikhetha ubuso beenkhohlakali na?

₃Vikelani amalungelo wohluphekileko nentandani,

niphathe isichaka nodududu ngokulunga.

₄Hlengani ohluphekileko nokhwahlileko,

nibenyule esandleni sabakhohlakeleko.”

₅“Kodwana abozinyana abanalwazi nokuzwisisa;

bakhamba ebumnyameni;

yeke zoke iinsekelo zephasi ziyasikinywa.

₆Ngalokho mina ngathi, ‘Nina nibozinyana,

ningaphasi kongoPhezulu noke nje.

₇Nanyana nibozinyana,

nizakufa njengabantu boke;

niwe njengazo zoke iinduna.’ ”

₈Sikima wena Zimu, ugwebe iphasi

ngombana zoke izizwe zingezakho.