AMARHUBO 91

₁Umuntu ohlezi ekusithekeni kongoPhezulu

nokhosele emthunzini woSabekako,

₂uthi kuSomnini: “Ubuphephelo bami nerholo lami,

uZimami engimethembako.”

₃Ngambala yena uyakuhlenga esifwini somthiyi,

iye, kubhubhani orhayilako.

₄Ukufihla ngeensiba zakhe,

ngaphasi kwamaphikwakhe ufunyana ubuphephelo,

ubuqotho bakhe busihlangu nomthangala.

₅Angeze wesaba ukwesabeka kobusuku

namkha imisubela ephapha emini,

₆nanyana ubhubhani ogega ebumnyameni,

iye, umbulalazwe obhubhisa emini ekulu.

₇Ikulungwana ingawa eqadi kwakho,

ngitjho netjhumi leenkulungwana ngesidleni sakho,

kodwana ubhubhani angeze ehlela kuwe.

₈Uzamqala kwaphela ngamehlwakho,

ubone ukubuyiselelwa kweenkhohlakali.

₉Ngambala wena Somnini usiphephelo sami!

Nakube wenze ongoPhezulu isiphephelo sakho,

₁₀akunabumbi obuzakwehlela

nemikhokha ezakutjhidela etendeni lakho.

₁₁Mbala, uzakuyala iingilozi zakhe ngawe,

zikulonde eendleleni zoke zakho;

₁₂zikuthwale ngezandla zazo

ukuze inyawo lakho lingakhutjwa lilitje.

₁₃Uzakubhadula phezu kwebhubezi nephiphi,

ugadange ibhubezana nenyoka.

₁₄USomnini uthi:

“Ongikhathalelako ngizamsindisa,

ngimvikele ngombana wazi ibizo lami.

₁₅Lokha nangibizako ngizamphendula;

ngibe naye eensizini,

ngimhlenge bengimuphe idumo.

₁₆Ngizamsuthisa ngepilo ede,

ngimbonise isindiswami.”