KWEBEROMA 6

₁Alo-ke sizakuthini na? Kufanele sirage siphile esonweni ukuze kuvame umusa na? ₂Nakanye! Thina esesafa esonweni, singaraga njani siphile kiso na? ₃Kghani anazi bonyana soke thina esabhabhadiselwa kuKrestu Jesu, sabhabhadiselwa ekufeni kwakhe na? ₄Nje-ke sabulungwa kanye naye ngokubhabhadiselwa ekufeni ukuze kuthi njengombana uKrestu avuswa ekufeni ngephazimulo kaBaba, ngokunjalo nathi sikhambe epilweni etja.

₅Nangabe besihlanganiswe naye ekufeni kwakhe, ngambala sizokuhlanganiswa naye nekuvukeni kwakhe. ₆Siyazi bona umuntu wethu omdala wabethelwa naye esiphambanweni ukuze kuthi umzimba wesono ulahlwe, singabe sisaba makhoboka wesono ₇ngombana nanyana ngubani ofileko, ukhululiwe emandleni wesono. ₈Kodwana nakube sife noKrestu, siyakholwa bonyana sizokuphila naye. ₉Siyazi bonyana njengombana uKrestu avuswa kabafileko, angekhe abuye afe godu, nokufa akusenawo amandla phezu kwakhe. ₁₀Ukufa akufako, wakufela esonweni kwaba kanye; kodwana ukuphila akuphilako, ukuphila kuZimu. ₁₁Ngokunjalo-ke nani kufanele nizithathe njengabafileko mayelana nesono, kodwana niphile kuZimu ngoKrestu Jesu.

₁₂Nje-ke ningasavumeli isono bona sibuye sibuse imizimba yenu ebhubhako besinenze bona nithobele iinkanuko zayo. ₁₃Ningabe nisanikela izitho zenu zomzimba esonweni kobana sizisebenzise njengeensetjenziswa zobukhohlakali, kodwana zinikeleni kuZimu njengalabo ababuyiswe ekufeni basiwa ekuphileni, ninikele izitho zemizimba yenu kuZimu njengeensetjenziswa zokulunga. ₁₄Ngaleyondlela isono angeze sabusa phezu kwenu njengombana ningasingaphasi komthetho kodwana ningaphasi komusa.

₁₅Alo sizakuthini na? Sizakona ngombana batjho asisingaphasi komthetho kodwana singaphasi komusa na? Nakanye! ₁₆Kghani anazi bona lokha nanizinikela kinanyana ngubani njengamakhoboka alalelako, niba makhoboka waloyo enimthobelako na? Ningaba makhoboka wesono esirholela ekufeni namkha nibe makhoboka wokulalela okurholela ekulungisisweni. ₁₇Kodwana akadunyiswe uZimu kobana nina enakhe naba makhoboka wesono, sele ningabalalelako ukuthoma ehliziyweni ukuya endleleni yesifundo enamukeliswa sona, ₁₈nokobana nikhululiwe esonweni, naba makhoboka wokulunga. ₁₉Ngikhuluma ngendlela ejayelekileko ngebanga lobuthakathaka benyama yenu. Njengombana nakhe nanikela izitho zenu njengamakhoboka wokusilapheleko esiphambekweni esikhulu khulu, nje-ke nikelani izitho zenu njengamakhoboka wokulunga kikho ukucwengiswa.

₂₀Lokha nanisesemakhoboka wesono, benitjhaphulukile mayelana nokulunga. ₂₁Alo, nazuzani nje ngezinto esele nineenhloni ngazo namhlanjesi na? Isiphetho sezintwezo kukufa. ₂₂Kodwana gadesi njengombana sele nikhululiwe esonweni benaba makhoboka kaZimu nje, umvuzo eniwufunyanako kucwengiswa. Isiphetho salokho kuphila okungapheliko. ₂₃Umvuzo wesono kukufa; kodwana isipho somusa kaZimu sikuphila okungapheliko ngoKrestu Jesu iKosethu.