UZAKARIYA 12

₁Isiphorofido. Ilizwi lakaSomnini lijamelene no-Israyeli.

₂“IJerusalema ngizoyenza ikapho yesiyeziyezi yabo boke abantu abayizombelezileko. UJuda naye bazamfikela nabathumba iJerusalema. ₃Mhlokho, lokha izizwe zoke zephasi nazihlanganyele iJerusalema, ngizakwenza idorobheli libe lidwala elibudisi kizo zoke izizwezi. Boke abalinga ukulisusa bazazikhubaza kwamambala. ₄Mhlokho ngizakurhadla enye nenye injomani ngevalo bese ngirhadla nomkhwelayo ngobuhlanya.” Kutjho uSomnini. “Ngizakuthi nangisaphosa ilihlo phezu kwendlu kaJuda njalo, ngiphophaze zoke iinjomani zesizwe. ₅Yeke abarholi bakwaJuda bazakuthi eenhliziyweni zabo, ‘Abantu beJerusalema bakakarele kuSomnini uMninimandlawoke uZimabo.’ ₆Mhlokho iinkoro zakwaJuda ngizazenza zifane nedengela lamalahle elidlhwinywe hlangana namaqobetjhana, zibe njengesihlothi esivuthako hlangana neentjherefu. Zizakuqothula ngapha nangapha zoke izizwe ezizizombelezileko, kodwana iJerusalema izakuhlala injalo endawenayo.”

₇USomnini uzakusindisa abantu bakwaJuda qangi ukuze idumo lendlu kaDavida nabahlali beJerusalema lingadluli lakwaJuda. ₈Mhlokho uSomnini uzakuvikela abantu beJerusalema, norholopheleko hlangana nabo uzakuba nesibindi njengoDavida, kuthi indlu kaDavida ibe njengeendalwa zezulu, iye ibe njengengilozi kaSomnini, irhole abantu beJerusalema.

₉Lokha nangibuthela zoke izizwe ezizokusahlela eJerusalema bona ngizibhubhise, ₁₀ngizakuthulula ummoya womusa newokurabhelela phezu kwendlu kaDavida nebantwini abahlala eJerusalema. Bazakufuna isizo kimi, balilele loyo ebamhlabako njengomuntu nalilela ukuhlongakala komntwana okukuphela kwakhe, njengomuntu odabuka abe munyu ngokuhlongakala kwezibulo. ₁₁Mhlokho isililo eJerusalema sizakuba sikhulu, sizakuba ngathi kulilelwa uHadadi-Rimoni emrhuleni weMegido. ₁₂Inarha yoke izakulila, ikoro ngekoro: ikoro yendlu kaDavida, ikoro yendlu kaNathani, ₁₃ikoro yendlu kaLevi, ikoro kaTjhimeyi, ₁₄nazo zoke iinkoro ezinye. Amadoda azakulila wodwa nabafazi balile bodwa.