I DIKRONIKE 15

₁Davida a ikgahela matlo motseng wa Davida, mme a lokisetsa areka ya Modimo ditulo, mme a e hlomela tente.

₂Yaba Davida o re: Ha ho ya tshwanetseng ho jara areka ya Modimo haese Balevi; hobane ke bona bao Jehova a ba kgethileng hore ba jare areka ya Modimo le ho etsa tshebeletso ya yona ka ho sa feleng. ₃Davida a phuthela Baiseraele bohle Jerusalema ho ya lata areka ya Jehova, le ho e tlisa ditulong tseo a di lokiseditseng yona. ₄Davida a phutha bara ba Aarone le Balevi: ₅ho bara ba Kehathe, ya eba Uriele, hlooho, le banababo, e le batho ba lekgolo le nang le mashome a mabedi; ₆ho bara ba Merari, e le Asaia, hlooho, le banababo, batho ba makgolo a mabedi a mashome a mabedi; ₇ho bara ba Gershome, e le Joele, hlooho, le banababo, batho ba lekgolo le mashome a mararo; ₈ho bara ba Elitsafane, e le Shemaia, hlooho, le banababo, batho ba makgolo a mabedi; ₉ho bara ba Hebrone, e le Eliele, hlooho, le banababo, batho ba mashome a robileng meno e le mmedi; ₁₀ho bara ba Usiele, e le Amminadabe, hlooho, le banababo, batho ba lekgolo le nang le leshome le metso e mmedi.

₁₁Davida a bitsa Tsadoke le Abiathare, baprista, le Balevi Uriele, Asaia, Joele, Shemaia, Eliele, le Amminadabe, ₁₂a re ho bona: Le dihlooho tsa matlo a bontata Balevi; itlhwekiseng, e le lona le banababo lona, mme le late areka ya Jehova, Modimo wa Iseraele, le e tlise moo ke e lokiseditseng teng. ₁₃Kahobane le ne le le siyo lekgetlong la pele, Jehova, Modimo wa rona, o entse sekgeo hara rona, kahobane re ne re sa ka ra mmatla ka ho ya ka taelo ya hae.

₁₄Yaba baprista le Balevi ba itlhwekisetsa ho ya lata areka ya Jehova, Modimo wa Iseraele. ₁₅Bara ba Balevi ba jara areka ya Modimo mahetleng a bona ka dithupa tse ho yona, jwalokaha Moshe a ne a laetse, ka polelo ya Jehova. ₁₆Davida a bolella balaodi ba Balevi hore ba hlopholle banababo bona, e leng dibini, hore ba eme ka diletsa, e leng diviole, le diharepa, le disimbala, tseo ba tla di letsa ka matla, ba etse modumo wa thabo ka tsona. ₁₇Balevi ba emisa Hemane, mora Joele, le ho banabao Hemane, Asafe, mora Berekia, le ho bara ba Merari, banababo bona, Ethane, mora Kushaia; ₁₈ba ena le banababo bona ba hlopha sa bobedi, Sakaria, Bene, Jaasiele, Shemiramothe, Jehiele, Unni, Eliabe, Benaia, Maaseia, Matthithia, le Elifele, le Mikneia, le Obed-Edomo, le Jeiele, balebedi ba menyako. ₁₉Dibini Hemane, Asafe le Ethane, di ne di tshwere le disimbala tsa koporo, tseo di di letsang. ₂₀Sakaria, Asiele, Shemiramothe, Jehiele, Unni, Eliabe, Maaseia, le Benaia ba ne ba tshwere diharepa tse kgole tse robileng meno e le mmedi, ho tsamaisa pina ka tsona. ₂₁Matthithia, le Elifele, le Mikneia, le Obed-Edomo, le Jeiele, le Asasia, ba ne ba tshwere diharepa tse kgole tse robileng meno e le mmedi ho tsamaisa pina. ₂₂Kenania, motsamaisi wa Balevi bakeng sa dipina, o ne a ruta tsona, hobane o ne a le masene ho tsona. ₂₃Berekia le Elkana e ne e le balebedi ba menyako bakeng sa areka. ₂₄Baprista Shebania, Josafate, Nethaneele, Amasai, Sakaria, Benaia le Eliesere, ba ne ba letsa diterompeta pela areka ya Modimo, mme Obed-Edomo le Jehia e ne e le balebedi ba menyako bakeng sa areka.

₂₅Davida le baholo ba Iseraele le balaodi ba dikete ba ya lata areka ya selekane sa Jehova tlung ya Obed-Edomo ka thabo. ₂₆Ke ka thuso ya Modimo Balevi ba tsebileng ho jara areka ya selekane sa Jehova; ba ntoo hlaba dipoho tse supileng le dipheleu tse supileng. ₂₇Haele Davida, o ne a apere kobo ya lene e ntle, le bona Balevi bohle ba jereng areka, le dibini, le Kenania, motsamaisi wa diletsa hara dibini; Davida o ne a apere efoda ya lene. ₂₈Baiseraele bohle ba lata areka ya selekane sa Jehova jwalo ka ditlatse le ka ho letsa diphala, ka diterompeta le disimbala, le ka ho letsa diviole le diharepa.

₂₉Areka ya selekane sa Jehova ha e fihla motseng wa Davida, Mikale, moradi wa Saule, ha a nyarela ka fensetere, a bona morena Davida a tlala, a hobela, mme a mo nyedisa ka pelong ya hae.