I DIKRONIKE 26

₁Haele balebedi ba menyako, kamoo ba ileng ba etswa dihlopha kateng ho Bakore, e ne e le Meshelemia, mora Kore, wa bara ba Asafe. ₂Bara ba Meshelemia, letsibolo ke Sakaria, wa bobedi Jediale, wa boraro Sebadia, wa bone Jathniele; ₃wa bohlano Elame, wa botshelela Johanane, wa bosupa Elioenai. ₄Haele bara ba Obed-Edomo, letsibolo la hae ke Shemaia, wa bobedi Josabade, wa boraro Jowa, wa bone Sakare, wa bohlano Nethaneele; ₅wa botshelela Ammiele, wa bosupa Issaskare, wa boroba meno e le mmedi Peulthai; etswe Modimo o ne o mo hlohonolofaditse. ₆Haele mora hae Shemaia, a tswallwa bara bao e bileng ba busang tlung ya ntata bona; hobane e ne e le banna ba matla. ₇Bara ba Shemaia ke Othni, Refaele, Obede, Elsabade, le banababo bona Elihu, le Semakia, banna ba matla. ₈Bao kaofela e ne e le bara ba Obed-Edomo; bona, le bara ba bona, le banababo bona e ne e le bahale, banna ba dinatla tshebetsong; ba Obed-Edomo ba ne ba le mashome a tsheletseng a metso e mmedi. ₉Meshelemia yena o ne a na le bara le banababo, banna ba matla, ba le leshome le metso e robileng meno e le mmedi. ₁₀Hosa, wa bara ba Merari, o ne a na le bara; hlooho ke Simri, leha empa e ne e se yena letsibolo, a mpa a beilwe hlooho ke ntatae; ₁₁wa bobedi ke Hilkia, wa boraro ke Thebalia, wa bone ke Sakaria, bara bohle ba Hosa le banababo ba ne ba le leshome le metso e meraro.

₁₂Dihlopha tseo tsa balebedi ba menyako, ka ho ya ka dihlooho tsa bona, tshebetso ya bona e ne e le ho lebela ntlo ya Jehova hammoho le banababo bona. ₁₃Ba laolelwa monyako o mong le o mong ka lotho, ho qala ka e monyenyane ho isa ho e moholo, ka ho ya ka matlo a bontata bona.

₁₄Lotho ya ntsha Shelemia ho ya monyakong o ka nqa botjhabela; mora hae, Sakaria, monna wa lekgotla, ya hlalefileng, a laolelwa ka lotho ka nqa leboya. ₁₅Obed-Edomo yena a laolelwa ka nqa borwa; bara ba hae bona ba laolelwa matlo a ho bolokela dintho. ₁₆Shuppime le Hosa ba newa ka nqa bophirimela, hammoho le monyako wa Shallekethe, moepeng; balebedi ba bang ba ne ba le malokana le ba bang. ₁₇Ka nqa botjhabela, ho ne ho beilwe Balevi ba tsheletseng, ka nqa leboya ba le bane ka letsatsi le leng le le leng, ka nqa borwa ba le bane ka letsatsi, ba le babedi hape tlung e nngwe le e nngwe ya ho bolokela; ₁₈Parbare, ka nqa bophirimela, ha bewa ba bane pela mmila, ba le babedi hape Parbare.

₁₉Ke tsona dihlopha tsa balebedi ba menyako ho bara ba Bakore le ho bara ba Merari.

₂₀Ho Balevi, Akija a bewa molebedi wa matlotlo a ntlo ya Modimo le wa matlotlo a ntho tse halalelang. ₂₁Haele bara ba Laedane, e leng bara ba Bagershone ka Laedane, bao e neng e le dihlooho tsa matlo a bontata Laedane Mogershone, ₂₂ha nkwa Jehieli; bara ba Jehieli ke Sethame, le Joele ngwanabo, bao e neng e le balebedi ba matlotlo a ntlo ya Jehova. ₂₃Ho Baamrame, le Batjitsehare, le Bahebrone le Bausiele, ₂₄Shebuele, mora Gershome, mora Moshe, e ne e le molebedi wa matlotlo. ₂₅Bao e neng e le banababo ka Eliesere, e ne e le mora hae Rehabia, le mora hae Esaia, le mora hae Jorame, le mora hae Sikri, le mora hae Shelomithe. ₂₆Shelomithe eo le banababo ba bewa balebedi ba matlotlo wohle a dintho tse halalelang tseo morena Davida, le dihlooho tsa matlo, le balaodi ba dikete le ba makgolo, le balaodi ba bang ba makgotla, ba neng ba di kgethetse Jehova; ₂₇ba ne ba di nkile dintweng le kgapong, ba di kgethela kotlo ya ntlo ya Jehova; ₂₈hammoho le tsohle tse neng di kgethetswe Jehova ke Samuele seboni, le Saule, mora Kishe, le Abnere, mora Nere, le Joabe, mora Tseruja, le mang le mang, tsohle tseo tse neng di kgethetswe Jehova, tsa bewa bolebeding ba Shelomithe le banababo.

₂₉Ho Bajitsehare, Kenania le bara ba hae ba bewa mosebetsing o kantle, ba bewa bahlahlobi le baahlodi Iseraeleng. ₃₀Ho Bahebrone, Hashabia le banababo, banna ba bohale ba sekete se nang le makgolo a supileng, ba bewa bahlahlobi ba Baiseraele ba mose o kwano ho Jordane, ka nqa bophirimela, ho sebetsa mesebetsi yohle ya Jehova le mesebetsi ya morena. ₃₁Ho Bahebrone — Bahebrone bao ho ileng ha batlwa masika a bona ka ho ya ka bontata bona, selemong sa mashome a mane sa puso ya Davida, ha ba ha fumanwa hara bona banna ba matla, ba bahale, motseng wa Jasere wa Gileade, — ₃₂Jeria, hlooho, le banababo e neng e le banna ba bahale, ba ne ba etsa kete tse pedi tse nang le makgolo a supileng a dihlooho tsa matlo a bontata bona. Morena Davida a ba bea bahlahlobi ba Barubene, ho sebetsa mesebetsi yohle ya Modimo le mesebetsi ya morena.