I DIKRONIKE 5

₁Bana ke bara ba Rubene, letsibolo la Iseraele. E ne e le yena letsibolo; empa kahobane a ne a silafaditse malao a ntatae, boholo ba hae ba ho tswalwa bo ne bo neilwe bara ba Josefa, mora Iseraele; leha ho le jwalo, e ne e se hore Josefa a ngolwe mangolong a meloko ka ho re o na le boholo ba ho tswalwa. ₂Hobane ke Juda ya ileng a feta banababo, mme ke ho yena ho tswileng morena; leha ho le jwalo, ditokelo tsa boholo ba ho tswalwa e ne e le tsa Josefa.

₃Bara ba Rubene, letsibolo la Iseraele, ke Henoke, Pallu, Hetsrone, le Karmi. ₄Bara ba Joele ke mora hae Shemaia, le Gogo mora hae, le Shimei mora hae, ₅le Mikea, mora hae, le Reaia mora hae, le Baale mora hae, ₆le Beera mora hae, eo Tilgathe-Pilnesere, morena wa Assiria, a ileng a mo isa kgolehong; e ne e le kgosana ya Barubene. ₇Meloko ya banababo, ha ho balwa lesika la meloko ya bona, e moholo e ne e le Jeiele, le Sakaria, ₈le Bela mora Asase, mora Shema, mora Joele, ya neng a ahile Aroere, ho ya fihla Nebo le Baale-Meone; ₉ka nqa botjhabela, o ne a ahile naheng e fihlang moeding wa lefeella, ho tloha nokeng ya Eufrate; hobane mehlape ya bona e ne e atile haholo naheng ya Gileade. ₁₀Mehleng ya Saule, ba futuhela Bahagarene, ba ba bolaya, mme ba aha ditenteng tsa bona, naheng yohle e nqa botjhabela ho Gileade.

₁₁Bana ba Gade bona ba ne ba ahile mabapa le Barubene, naheng ya Bashane, ho ya kgutla Salka: ₁₂e moholo ke Joele, ya mo hlahlamang ke Shafame, le Jaenai, le Shafathe naheng ea Bashane. ₁₃Banababo, bana ba ntlo ya bontata bona, ke Mikaele, Meshullame, Sheba, Jorai, Jaekane, Sia, le Ebere; ba ne ba supile. ₁₄Ke bao bana ba Abikaele, mora Huri, mora Jarowa, mora Gileade, mora Mikaele, mora Jeshishai, mora Jahdo, mora Buse; ₁₅Aki, mora Abdiele, mora Guni, ke kgosana ya matlo a bontata bona. ₁₆Ba kile ba aha naheng ya Gileade, Bashane, le metseng ya teng, le merakeng yohle ya Sarone, meeding ya yona. ₁₇Kaofela ha bao ba ne ba ntse ba balwa masikeng a bona mehleng ya Jothame, morena wa Juda, le mehleng ya Jeroboame, morena wa Iseraele.

₁₈Bara ba Rubene, le Bagade, le ba mothapo o mong wa Manasse, bao e neng e le bahale, banna ba hlomelang thebe le sabole, ba fulang ka seqha, ba tsebang ntwa, e ne e le dikete tse mashome a mane a metso e mene tse nang le makgolo a supileng le mashome a tsheletseng, ba neng ba ka nna ba futuha. ₁₉Ba hla ba futuhela Bahagarene, le Jethure, le Nafishe, le Nodabe. ₂₀Ba ya ba tlatsitswe, mme Bahagarene ba neelwa matsohong a bona, le bohle bao ba neng ba na le bona; hobane bao ba ne ba howeleditse ho Modimo ba le ntweng, mme wa ba utlwa, ke hobane ba ne ba beile tshepo ya bona ho wona. ₂₁Ba hapa le makgomo a bona, dikamele tse dikete tse mashome a mahlano, le dinku tse makgolo a mabedi a mashome a mahlano a dikete, le diesele tse kete tse pedi, ba bolaya le batho ba lekgolo la dikete. ₂₂Ha fela ha bolawa ba bangata, hobane ntwa e ne e le ya Modimo. Mme ba aha tulong tsa bona ho fihlela mohla kgoleho.

₂₃Le bona bana ba mothapo o mong wa Manasse ba aha naheng eo; ba aha ba tletse ho tloha Bashane ho ya Baale-Hermone, le Senire, le thabeng ya Hermone. ₂₄Dihlooho tsa matlo a bontata bona ke Efere, le Jishei, le Eliele, le Asriele, le Jeremia, le Hodavia, le Jahdiele, e neng e le bahale, banna ba tumileng, dihlooho tsa matlo a bontata bona. ₂₅Ba kwenehela Modimo wa bontata bona, mme ba latela medimo ya ditjhaba tsa naha eo, tseo Modimo o neng o di timeditse pela bona. ₂₆Yaba moo Modimo wa Iseraele o susumetsang pelo ya Pule, morena wa Assiria, le pelo ya Tilgathe-Pilnesere, morena wa Assiria, mme a tlosa Barubene, le Bagade, le ba mothapo o mong wa Manasse, a ba isa Hala, le Habore, le Hara, le nokeng ya Gosane, ho fihlela kajeno.