I BAKORINTHE 12

₁Haele ka dineo tsa Moya, banabeso, ha ke rate hoba le ka hloka hlalohanyo ya tsona. ₂Le a tseba hoba le ne le le bahetene ba hulelwang ditshwantshong tse sa bueng, kamoo le neng le hulanngwa kateng. ₃Ke moo ke le tsebisang hoba ha ho motho, ya buang ka Moya wa Modimo, ya ka bitsang Jesu anathema, mme ha ho e mong ya ka bitsang Jesu Morena, haese ka Moya o Halalelang.

₄Dineo tsona di arohane, empa Moya o mong feela. ₅Ditshebeletso le tsona di arohane, empa Morena o mong feela. ₆Le diketso di arohane, empa Modimo o mong feela, o sebetsang tsohle ho bohle.

₇Mme ponahatso ya Moya e newa e mong le e mong, e tle e be molemo wa bohle. ₈Hobane e mong o newa ke Moya puo ya bohlale; e mong o newa puo ya tsebo ke Moya wona oo. ₉E mong o fuwa tumelo ke wona Moya oo; e mong o fuwa ke Moya wona oo dineo tsa ho fodisa. ₁₀E mong o newa tshebetso ya mehlolo, e mong boporofeta, e mong temoho ya meya, e mong dipuo tse mefuta, e mong phetolo ya dipuo. ₁₁Tseo tsohle di sebetswa ke wona Moya oo o leng mong feela, o ntseng o abela e mong le e mong kamoo o ratang kateng.

₁₂Hobane jwalokaha mmele o le mong, mme o ena le ditho tse ngata, mme ditho tsohle tsa mmele o leng mong, leha di le ngata, e le mmele o le mong feela, Kreste le yena o jwalo. ₁₃Hobane rona bohle re kolobeditswe Moyeng o le mong, hore re be mmele o le mong, leha e le Bajuda, leha e le Bagerike, leha e le ba ruilweng, leha e le ba sa ruwang; mme bohle re nositswe Moyeng o le mong.

₁₄Efela mmele hase setho se le seng, empa ke ditho tse ngata. ₁₅Hoja leoto le ka re: Erekaha ke se letsoho, ha ke wa mmele, na hase la mmele leha ho le jwalo na? ₁₆Mme tsebe leha e be e ka re: Erekaha ke se leihlo, ha ke wa mmele, na hase ya mmele leha ho le jwalo na? ₁₇Hoja mmele wohle e ka ba leihlo, kutlo e ka ba kae? Ha mmele wohle e ka ba kae? Ha mmele wohle e ka ba kutlo, kutlo ya nko e ka ba kae na? ₁₈Mme jwale, Modimo o beile ditho mmeleng, se seng le se seng sa tsona, kamoo o ratileng kateng. ₁₉Hola tsohle ke setho se le seng feela, mmele o ka be o le kae? ₂₀Empa jwale, ditho di ngata, mmele wona o mong. ₂₁Leihlo le ke ke la re ho letsoho: Ha ke o hloke; hape, hlooho e ke ke ya re ho maoto: Ha ke le hloke. ₂₂Tjhe, empa ditho tsa mmele tseo e kang di fetisa ka ho fokola, ke tsona tse hlokwang haholo. ₂₃Mme ditho tsa mmele tseo re lekanyang hoba ha di na ho hlonephuwa, ke tsona tseo re di apesang ka hlonepho, mme ditho tsa rona tse leng mpe, ke tsona tse nang le hlompho e tlodisang. ₂₄Hobane ditho tsa rona tse ntle ha di batle kgabiso; empa Modimo o kopantse mmele jwalo, o hlomphisitse ka ho fetisa ho neng ho hloka hlompho; ₂₅hore kgaohano e tle e se ke ya eba teng mmeleng, ditho di mpe di baballane. ₂₆Mme setho se seng ha se utlwa bohloko, ditho tsohle di utlwa bohloko le sona; leha setho se seng se tlotliswa, ditho tsohle di thaba le sona.

₂₇Haele lona, le mmele wa Kreste, mme le ditho tse ding tsa hae. ₂₈Mme bao Modimo o ba beileng kerekeng, pele ke baapostola, ba bobedi ke baporofeta, ba boraro ke baruti, ho ntoo ba ba mehlolo, le dineo tsa phodiso, le ditshebeletso, le ditsamaiso, le mefuta ya dipuo. ₂₉Na bohle ke baapostola? Na bohle ke baporofeta? Na bohle ke baruti? Na bohle ba na le neo ya mehlolo? ₃₀Na bohle ba na le dineo tsa phodiso? Na bohle ba bua dipuo? Na bohle ba na le neo ya ho fetola dipuo na?

₃₁Hara dineo tseo, a le keng le tjhesehelleng tse fetisang ka molemo; empa ke sa tla le bontsha tsela e fetisisang.