I MARENA 6

₁Ya be e se e le dilemo tse makgolo a mane a nang le mashome a robileng meno e le mmedi bana ba Iseraele ba tswile naheng ya Egepeta, ha Salomone a qala ho haha ntlo ya Jehova, e le ka selemo sa bone sa ho busa ha hae Iseraeleng, ka kgwedi ya Sife, e leng kgwedi ya bobedi.

₂Ntlo eo morena Salomone a ileng a e hahela Jehova, bolelele ba yona ya eba ditswe tse mashome a tsheletseng, bophara e le ditswe tse mashome a mabedi, bophahamo e le ditswe tse mashome a mararo. ₃Mathule a ka pele ho tempele, bolelele ba wona ya eba tswe tse mashome a mabedi, ho lekana le bophara ba ntlo, bophara ba wona e le ditswe tse leshome pela ntlo. ₄A etsetsa ntlo difensetere tse haheleditsweng ka dithupa. ₅A haha leboteng la ntlo dikamore tse kallaneng tse le potang, a di haha maboteng a ntlo, tsa sika tempele le sehalaledisiso; a etsa dikamore tse kathoko kahohle. ₆Kamore tse katlase bophara ba tsona e ne e le ditswe tse hlano, tse hare bophara ba tsona e le ditswe tse tsheletseng, tsa boraro bophara ba tsona e le ditswe tse supileng; hobane o ne a hahile ka majwe a ntshang dintlha lerakong lohle la ntlo, hore difate di se kene marakong a ntlo. ₇Ntlo ha e hahuwa, ya hahuwa ka majwe a lokisitsweng a eso ho tliswe teng, ho se ke ha utlwahala noto, leha e le selepe, leha e le mosebetsi o mong wa tshepe, ha ntlo e ntse e hahuwa. ₈Monyako wa dikamore tse hare o ne o le lehlakoreng le letona la ntlo; ho ne ho nyolohelwa kamoreng tse hare ka methatinyana e matswedintsweke, mme ho ne ho kenwa dikamoreng tse boraro, ha ho tsuwa ho tse hare. ₉A haha ntlo jwalo, a e phetha, a kwahela ntlo ka difate le ka dipolanka tsa kedare. ₁₀Haele dikamore tse kallaneng, tse potang ntlo yohle, a di etsa di ena le bolelele ba ditswe tse hlano; di ne di kopane le ntlo ka difate tsa kedare.

₁₁Yaba lentswe la Jehova le tlela Salomone, la re: ₁₂Haele bakeng sa ntlo eo o e hahang, ekare ha o tsamaya ka melao ya ka, o tiisa dikahlolo tsa ka, o boloka ditaelo tsa ka tsohle, o tsamaya ka tsona, ke tla o etsetsa ka pallo eo ke e boleletseng ntatao Davida. ₁₃Ke tla dula hara bana ba Iseraele, ke se ke ka furalla setjhaba sa ka sa Iseraele.

₁₄Salomone a haha ntlo jwalo, a ba a e phetha. ₁₅A sireletsa mabota a ntlo ka dipolanka tsa kedare, ho qala ka fatshe ho ntlo, ho isa sehlohlolong sa marako, a a sireletsa ka difate; le fatshe ho ntlo a kata ka dipolanka tsa kiprese. ₁₆Hara ntlo, a kgaola sebaka sa ditswe tse mashome a mabedi maboteng, a sireletsa mabota a sona ka dipolanka tsa kedare ho tloha fatshe, a se etsa sehalalelo, e leng sehalaledisiso. ₁₇Ho setseng ha ntlo, e leng tempele e kapela sehalaledisiso, bolelele ba yona ya eba ditswe tse mashome a mane. ₁₈Dikedare tse kahare ho ntlo tsa betlwa dithola le palesa tse thuntseng; e ne e le kedare feela, ho sa bonahale majwe.

₁₉A lokisa sehalaledisiso ka tlung, a tle a bee areka ya selekane sa Jehova ho sona. ₂₀Boholo ba sehalaledisiso ya eba ditswe tse mashome a mabedi, bophara ba sona e le tswe tse mashome a mabedi, le bophahamo ba sona e le ditswe tse mashome a mabedi; a se maneha ka kgauta e hlwekileng; le aletare a e apesa ka dikedare. ₂₁Salomone a maneha le lebota la ntlo ka kgauta e hlwekileng; a feha lesela ka mahlaahlela a kgauta pela sehalaledisiso seo a se manehileng ka kgauta. ₂₂A maneha ntlo yohle ya kgauta, a ba a phetha ntlo yohle; le yona aletare yohle e pela sehalaledisiso, a e maneha ka kgauta.

₂₃Kahara sehalaledisiso, a etsa dikerubime tse pedi tsa mohlwaare; bolelele ba e nngwe le e nngwe e le ditswe tse leshome. ₂₄Lepheo le leng la kerubime, bolelele ba lona e ne e le ditswe tse hlano, bolelele ba lepheo le leng la kerubime e le ditswe tse hlano; ho kgutla pheletsong ya lepheo le leng, ho isa pheletsong ya le leng, e ne e le ditswe tse leshome. ₂₅Kerubime ya bobedi, bolelele ba yona e ne e le ditswe tse leshome; dikerubime tse pedi di ne di le tekano e le nngwe le bolelele bo le bong. ₂₆Bolelele ba kerubime e nngwe e ne e le ditswe tse leshome, le ba kerubime ya bobedi bo le bokalo. ₂₇A bea dikerubime hara ntlo, di otlolotse mapheo a tsona, lepheo la e nngwe le kgitla lebota, mme lepheo la kerubime e nngwe le kgitla lebota le leng; a mang mapheo a tsona a ne a amane mahareng a ntlo. ₂₈A ntoo maneha dikerubime ka kgauta.

₂₉A ntoo betlela maboteng wohle a ntlo ditshwantsho tsa dikerubime, le tsa dipalema, le tsa dipalesa tse thuntseng, ho qala kahare, ho isa kantle. ₃₀A maneha fatshe ho ntlo ka kgauta, ho qala kahare, ho isa kantle.

₃₁A etsetsa monyako wa sehalaledisiso mamati a mohlwaare a bulwang hare, fate tse hodimo le tse mahlakoreng tsa nka karolo ya bohlano ya lebota. ₃₂Mamati a mabedi a etswa ka mohlwaare; teng a betla ditshwantsho tsa dikerubime, le tsa dipalema, le tsa dipalesa tse thuntseng, a di maneha ka kgauta; a maneha le dikerubime le dipalema ka kgauta.

₃₃A ntoo etsetsa monyako wa tempele difate tsa mohlwaare, tse nkang karolo ya bone ya lerako. ₃₄Menyako e mmedi ya etswa ka kiprese; mamati a mabedi a monyako o mong a bulelwa kahohle, le mamati a mabedi a monyako o mong a bulwa jwalo le wona. ₃₅A betla teng dikerubime, le dipalema, le dipalesa tse thuntseng, a di kwahela ka kgauta e manehilweng hodima ditshwantsho.

₃₆A thea lebala le kahare ka majwe a betlilweng a kolohantsweng ka boraro, le ka lethathamo la difate tsa kedare.

₃₇Motheo wa ntlo ya Jehova wa thewa ka selemo sa bone sa ho busa ha Salomone, ka kgwedi ya Sife; ₃₈ka selemo sa leshome le motso o mong, ka kgwedi ya Bule, e leng kgwedi ya boroba meno e le mmedi, ntlo ya phethwa hohle le ka tshwanelo yohle. A e haha ka dilemo tse supileng.