II DIKRONIKE 20

₁Kamora tseo, bana ba Moabe le bana ba Ammone ba ena le Bamaone ba bang, ba futuhela Josafate. ₂Josafate a behelwa, ha thwe: O futuhelwa ke sera se seholohadi, se tswang Siria mose wane ho lewatle; e se e le bana Hatsatsone-Thamare, e leng Ene-Gedi. ₃Josafate a tshoha, a hla a batla Jehova, mme a tsebisa Bajuda bohle hore ba itime dijo. ₄Yaba Bajuda ba phuthehela ho rapela Jehova, mme ha tsuwa metseng yohle ya Juda ho tla batla Jehova.

₅Josafate a ema phuthehong ya Juda le Jerusalema, tlung ya Jehova, pela mathule a matjha, a re: ₆Jehova, Modimo wa bontata rona, na hase wena Modimo mahodimong? Na hase wena o busang mebuso yohle ya lefatshe? Na matla le bonatla ha di letsohong la hao, hore ho se be motho ya ka o hlolang? ₇Na hase wena, Modimo wa rona, o neng o falatse baahi ba lefatshe lena pela setjhaba sa hao sa Iseraele, o bileng wa le nea ditloholo tsa Abrahama, motswalle wa hao, hore e be la tsona kamehla na? ₈Ba fedile ba ahile teng, ba bile ba o hahetse sehalalelo teng, hore e be sa lebitso la hao, ba re: ₉Ha re ka tshoha re hlahelwa ke kotsi, kapa ke lerumo, kapa kahlolo, leha e le lefu la sewa, kapa tlala, re tla nne re itlhahise pela ntlo ena le pela hao, etswe lebitso la hao le le tlung ena, mme re tla howeletsa ho wena re le mahareng a mahlomola a rona, mme o tla re mamela, o be o re pholose! ₁₀Bona jwale, bana ba Ammone le Bamoabe le ba thaba ya Seire, e leng bao a sa kang wa dumella Baiseraele ho kena ha bona, mohla ba tswang lefatsheng la Egepeta, ba mpa ba ba fapoha, mme ba se ke ba ba timetsa, ₁₁bona, ke bana ba tlile ho re putsa ka ho tla re leleka fatsheng la hao leo o re neileng lona, re tle re le rue. ₁₂Oho, Modimo wa rona, na o ke ke wa ba ahlola na? Hobane ha ho matla ka ho rona a ho lwana le sera seno se seholohadi se re futuhelang; hape ha re tsebe hore na e ka kgona re etseng? empa mahlo a rona a tadimile wena.

₁₃Bajuda bohle ba ema jwalo pela Jehova, hammoho le bana ba bona ba banyenyane, le basadi ba bona le bara ba bona. ₁₄Jwale, moya wa Jehova wa tlela Jahasiele, mora Sakaria, mora Benaia, mora Jeiele, mora Matthania, Molevi, wa bara ba Asafe, wa mo tshwara hara phutheho. ₁₅A re: Mamelang, lona, Bajuda bohle, le lona, baahi ba Jerusalema, le wena, morena Josafate! Ho itswe ke Jehova: Se tshabeng, mme le se ke la tepeletswa ke sera se seholohadi seno, hobane ntwa hase ya lona, ke ya Modimo. ₁₆Hosasane, le theoheleng ho bona; ke bane, ba ya hlwa ka moepa wa Tsitse; le tla teana le bona phellong ya sekgutlo, maloka le lefeella la Jeruele. ₁₇Le ke ke la tshwanela ho lwana ntweng ena; le mpe le hlahe, mme le ikemele hona teng, le tle le bone poloko ya Jehova ya nang le lona. Oho, lona Bajuda, le ba Jerusalema, se tshabeng, le se ke la tepella. Hosasane, le tswele ho bona, hobane Jehova o tla ba le lona.

₁₈Yaba Josafate o inamisa sefahleho, a se kobotetsa fatshe, le Bajuda le baahi ba Jerusalema ba itihela pela Jehova, ba kgumamela Jehova. ₁₉Balevi ba bara ba Bakehathe le ba bara ba Bakore ba ema ho boka Jehova, Modimo wa Iseraele, ka mantswe a maholo, a phahameng.

₂₀Ba tsoha e sa le hosasa, mme ba tswela nqa lefeelleng la Tekowa; ba re ba sa tswa, Josafate a ema, a re: Mmameleng, lona Bajuda, le lona baahi ba Jerusalema! Ke re: Tshepang Jehova, Modimo wa lona, le tle le tiye; le dumele baporofeta ba hae, le tle le atlehe. ₂₁A etsa morero le setjhaba; yaba o bea dibini tse tla binela Jehova di apere ka bokgabane bo kgethehileng, di eteletse makgotla pele, di re: Bokang Jehova, hobane mohau wa hae o hlola ka ho sa feleng!

₂₂Ba re ba sa qala ho etsa dipina le dithoko, Jehova a bea balalli ba ho lwantsha bana ba Ammone le Bamoabe le ba thaba ya Seire ba futuhetseng Bajuda; mme ba hlolwa. ₂₃Bana ba Ammone le Bamoabe ba lwantsha ba ahileng thabeng ya Seire ho ba neela anathema le ho ba timetsa; mme eitse hobane ba qetele ho timetsa baahi ba Seire, ba tlatsana ho timetsana ba nnotshi.

₂₄Eitse ha Bajuda ba fihla phahameng, moo lefeella le ka bonwang teng, ba tadima nqa sereng, mme ba bona e le ditopo tse rapaletseng fatshe, ho se le a mong ya phonyohileng. ₂₅Eitse ha Josafate le setjhaba sa hae ba tla ho hapa kgapo, ba fumana diphahlo tse ngata mahareng a ditopo le mesebetsi ya bohlokwa; ba ikgapela yona, ba ba ba sitwa ho e jara, ba qeta matsatsi a mararo ba ntse ba thotha thepa, hobane e ne e le kgolo. ₂₆Ka tsatsi la bone, ba phuthehela sekgutlong sa Beraka, mme teng ba boka Jehova; ke kahoo sekgutlo seo se reilweng lebitso la Beraka (poko), le kajeno ke lona. ₂₇Yaba batho ba Juda le ba Jerusalema ba kgutla, ba boela Jerusalema ka thabo, Josafate a ba eteletse pele; hobane Jehova a ne a ba thabisitse ka ho ba namolela direng tsa bona. ₂₈Ba kena Jerusalema, ka tlung ya Modimo, ka diviole le diharepa le diterompeta.

₂₉Letsoso la Modimo la wela mebuso yohle ya mafatshe a kamathoko, ha e utlwa kamoo Jehova a lwantshitseng dira tsa Iseraele kateng. ₃₀Mmuso wa Josafate wa phomola, mme Modimo wa hae wa mo nea phomolo ka nqa tsohle.

₃₁Josafate a nna a busa Juda. O ne a le dilemo tse mashome a mararo a metso e mehlano ha a qala ho busa, mme a busa ka dilemo tse mashome a mabedi a metso e mehlano Jerusalema; lebitso la mmae e ne e le Asuba, moradi wa Shilhi.

₃₂A nna a tsamaya ka mehlala ya Asa ntatae, a se ke a e kgeloha, a nna a etsa tse lokileng pela mahlo a Jehova. ₃₃Feela, dinqalo tse diphahameng ha di a ka tsa tloswa, hobane setjhaba se ne se eso ho sekamise dipelo tsa sona ho batla Modimo wa bontata sona.

₃₄Haele ditaba tse ding tsa Josafate, tsa ho qala le tsa ho qetela, di ngodilwe bukeng ya ditaba tsa Jehu, mora Hanani, e neng e kenngwe bukeng ya marena a Iseraele.

₃₅Kamora tseo, Josafate, morena wa Juda, a ikopanya le Akasia, morena wa Iseraele, ya neng a phela ka bokgopo; ₃₆a ikopanya le yena ho etsa dikepe tse tla ya Tarshishe, mme ba etsa dikepe Etsione-Gebere. ₃₇Empa Eliesere, mora Dodava, wa Maresha, a porofetela Josafate, a re: Erekaha o ikopantse le Akasia, Jehova o se a sentse mosebetsi wa hao. Yaba dikepe di a robeha, tsa sitwa ho ya Tarshishe.