Athalia, mofumahadi wa Juda.
1Athalia, mma Akasia, ha a bona hobane mora hae o timetse, a tloha, a timetsa lesika lohle la borena. 2Empa Josheba, moradi wa morena Jorame, kgaitsedi ya Akasia, a nka Joase, mora Akasia, a mo utswa hara bana ba morena mohla ba bolawang, a mo pata kamoreng ya malao, e le yena le moanyesi wa hae; ba mo patela Athalia jwalo, a tle a se ke a bolawa. 3Ka mokgwa o jwalo, ba patwa ba babedi tlung ya Jehova ka dilemo tse tsheletseng, mme Athalia a busa naha.
4Ka selemo sa bosupa, Jehojada a romela, a lata balaodi ba makgolo le matona le bahlabani, a ba biletsa ka tlung ya Jehova; a hlaba selekane le bona, a ba hlapantsha ka tlung ya Jehova, a ntoo ba bontsha mora morena. 5A ba laela, a re: Ke sena seo le tla se etsa: Ba karolo ya boraro ba lona ba kenang tshebeletsong ka Sabatha, ba tla lebela ntlo ya morena. 6Ba karolo e nngwe ya boraro ba tla ema monyako wa Sure; ba karolo e nngwe ya boraro ba eme monyako o kamora dititimi. Le tla lebela ntlo, le thibe. 7Dihlopha tse pedi hara lona bohle tse tswang ka Sabatha di tla lebela ntlo ya Jehova, haufi le morena. 8Le tla teela morena hare, e mong le e mong a tshwere dihlomo tsa hae ka letsoho la hae, mme ya kenang diemeng a bolawe. Le latelle morena, leha a etswa, leha a kena.
9Balaodi ba makgotla ba etsa ka taelo tsohle tsa moprista Jehojada, ba nka e mong le e mong banna ba hae ba kenang tshebeletsong ka Sabatha hammoho le ba tswang ka Sabatha, ba tla ho moprista Jehojada. 10Moprista a nea balaodi ba makgolo marumo le dithebe tsa morena Davida, tse neng di le ka tlung ya Jehova. 11Dititimi tsa ema di ena le dihlomo tsa tsona matsohong a tsona, ho qala ntlheng ya le letona la ntlo ho isa ntlheng ya le letshehadi la ntlo, mabapa le aletare le ntlo, di teetse morena hare. 12Moprista a tlisa mora wa morena, a mo rwesa moqhaka le bopaki; ba mmea morena, ba mo tlotsa; mme ba opa ka diatla, ba re: Ha ho phlele morena!
13Athalia ha a utlwa ditlatse tsa dititimi le tsa setjhaba, a kena hara setjhaba ka tlung ya Jehova. 14A tadima, a bona morena a eme pela tshiya ka mokgwa wa teng, le mahosana le ba letsang diterompeta ba le pela morena, setjhaba sohle sa naha se thabile, se letsa diterompeta. Ebile Athalia o hahola diaparo tsa hae, a memetsa, a re: Jo! phetohelo! phetohelo! 15Ebile moprista Jehojada o laela balaodi ba makgolo, e leng balaodi ba makgotla, a re ho bona: Mo ntsheng liemeng; ya mo latelang, le mmolaye ka lerumo. Hobane moprista o ne a itse: A se ke a bolaelwa tlung ya Jehova. 16Ba mo suthela tsela, a kgutlisetswa tlung ya morena ka tsela ya dipere, mme a bolaelwa teng.
17Jwale, Jehojada a hlaba selekane mahareng a Jehova le morena le setjhaba, hore e fele e be setjhaba sa Jehova, le selekane mahareng a morena le setjhaba. 18Yaba setjhaba sohle sa naha se kena ka tlung ya Baale, sa e qhaqha; dialetare le ditshwantsho tsa teng ba di robaka dikoto, ba di qeta; ba bolaya le Matthane, moprista wa Baale, pela dialetare. Moprista a ntoo bea bahlahlobi hodima ntlo ya Jehova. 19Hape, a ya le balaodi ba makgolo, le matona, le dititimi, le setjhaba sohle sa naha, ba theola morena tlung ya Jehova, ba mo isa tlung ya morena ka tsela e yang monyakong wa dititimi, a ba a dula teroneng ya marena. 20Setjhaba sohle sa naha sa thaba, motse wa dula ka kgotso leha ho ne ho tswa bolawa Athalia ka lerumo pela ntlo ya morena.
21Joase o ne a le dilemo tse supileng, ha a qala ho busa.
