II MARENA 17

₁Ka selemo sa leshome le metso e mmedi sa Akase, morena wa Juda, Osea, mora Ela, a qala ho busa Iseraele a le Samaria, a busa ka dilemo tse robileng mono o le mong.

₂A etsa ho leng hobe mahlong a Jehova, empa e seng jwalokaha ho ne ho entse marena a Iseraele a bileng teng pele ho yena. ₃Salmanasare, morena wa Assiria, a mo futuhela, mme Osea ya eba mofo wa hae, a mo ntshetsa le lekgetho. ₄Mohlomong, morena wa Assiria a fihlela phetohelo e le teng ho Osea, kamoo a rometseng manqosa kateng ho So, morena wa Egepeta, le kamoo a sa kang a nna a tlisetsa morena wa Assiria lekgetho kateng, jwalokaha a ne a entse ka selemo se seng le se seng. Yaba morena wa Assiria o mo kwalla teronkong, a mo tlama. ₅Morena wa Assiria a ya le naha yohle ya Iseraele, a futuhela le Samaria, a o thibella ka dilemo tse tharo. ₆Ka selemo sa boroba mono o le mong sa Osea, morena wa Assiria a kena Samaria, a isa Baiseraele kgolehong Assiria, a ba bea Hala, le Habore, le pela noka ya Gosane, le metseng ya Bamede.

₇Ho bile jwalo kahobane bana ba Iseraele ba ne ba sitetswe Jehova, Modimo wa bona, ya neng a ba nyolotse fatsheng la Egepeta, le matsohong a Faro, morena oa Egepeta, ba mpa ba rapetse medimo esele; ₈ba nnile ba tsamaya ka mekgwa ya ditjhaba tseo Jehova a neng a di lelekile pela bana ba Iseraele, le ka eo marena a Iseraele a entseng ka yona. ₉Bana ba Iseraele ba etsa ka sephiring ditaba tse sa kang tsa eba ntle ho Jehova, Modimo wa bona, ba ikgahela nqalo tse diphahameng metseng yohle ya bona, ho tloha ditoreng tsa dibohodi ho fihlela metseng e marako.

₁₀Ba iketsetsa ditshwantsho le diashera maralleng wohle a phahameng, le tlasa difate tsohle tse tala. ₁₁Ba nna ba tjhesa dibano nqalong tsohle tse diphahameng, jwalokaha ho ne ho entse ditjhaba tseo Jehova a di tlositseng pela bona, ba nna ba sebetsa ntho tse mpe ho halefisa Jehova ka tsona; ₁₂ba sebeletsa ditshwantsho tseo Jehova a neng a itse ho bona: Le se ke la di sebeletsa. ₁₃Jehova a nna a omela Iseraele le Juda ka baporofeta ba hae bohle le ka diboni tsohle, a re: Bakang metsamaong ya lona e mebe, le boloke ditaelo tsa ka le ditemoso tsa ka, ka molao wohle oo ke o laetseng bontata lona, oo ke o rometseng ho lona ka bahlanka ba ka, baporofeta. ₁₄Leha ho le jwalo, ha ba ka ba utlwa; ba sataladitse melala ya bona, jwaloka bontata bona ba sa kang ba dumela ho Jehova, Modimo wa bona. ₁₅Ba ba ba lahla melao ya hae, le selekane seo a neng a se hlabile le bontata bona, le ditemoso tsa hae tseo a ba neileng tsona; ba latela masawana, ba ipebola, ba etsisa ditjhaba tse ba teetseng hare, tseo Jehova a neng a ba laetse, a re, ba se ke ba etsa jwaloka tsona. ₁₆Ba furalla melao yohle ya Jehova, Modimo wa bona, ba iketsetsa ditshwantsho tse tsholotsweng, e leng manamane a mabedi, ba etsa le ditshwantsho tsa Ashtarothe, ba kgumamela le makgotla wohle a lehodimo, ba sebeletsa le Baale. ₁₇Ba tjhesa bara le baradi ba bona mollong, ba loya ka boloi, ba noha, ba ineela ho etsa ho leng hobe mahlong a Jehova, hore ba mo halefise. ₁₈Ka baka leo, Jehova a halefela Baiseraele haholo, a ba tlosa pela mahlo a hae, ho se ke ha sala letho, haese leloko la Juda le nnotshi. ₁₉Le bona Bajuda ha ba ka ba boloka ditaelo tsa Jehova, Modimo wa bona; le bona ba ya ka mekgwa eo Baiseraele ba e entseng. ₂₀Ebile moo Jehova a lahlang moloko wohle wa Iseraele, a ba kenya matshwenyehong, a ba neela matsohong a bahlorisi, a ba a ba lahlela hole le sefahleho sa hae. ₂₁A kgaola Baiseraele ho ntlo ya Davida; ba ipeela morena, e le Jeroboame, mora Nebathe, Jeroboame yena a kgelosa Iseraele ho Jehova, a ba kenya sebeng se seholo. ₂₂Bana ba Iseraele ba tsamaya dibeng tsohle tseo Jeroboame a di entseng; ba se ke ba di furalla. ₂₃Jehova a ba a tlosa Iseraele pela mahlo a hae, jwalokaha a ne a boletse ka bahlanka ba hae bohle, baporofeta. Baiseraele ba tloswa lefatsheng la bona, ba iswa Assiria kgolehong, ho fihlela tsatsi la kajeno.

₂₄Yaba morena wa Assiria o nka batho Babilona, le Kutha, le Avva, le Hamathe, le Sefarvaime, a ba bea metseng ya Samaria tulong tsa bana ba Iseraele; ya eba bona ba ruang Samaria, ba dulang metseng ya teng. ₂₅Ha ba sa qala ho dula teng, ba ne ba sa tshabe Jehova; ebile Jehova o romela ditau hara bona, tsa bolaya ba bang. ₂₆Yaba ho tsebiswa morena wa Assiria, ha thwe: Ditjhaba tseo o di faladitseng, wa di bea metseng ya Samaria, ha di tsebe mokgwa wa modimo wa lefatshe la teng; jwale, o ba rometse ditau, mme ke tsena di a ba bolaya, kahobane ha ba tsebe mokgwa wa modimo wa lefatshe la teng. ₂₇Ebile morena wa Assiria o laela, a re: Ha ho iswe monna e mong wa baprista bao le ba tlositseng teng; a ke a ye, a dule teng, a ba rute mokgwa wa modimo wa lefatshe leo. ₂₈Yaba e mong wa baprista ba neng ba tlositswe Samaria o tla, a dula Bethele, a ba ruta kamoo ba tshwanetseng ho tshaba Jehova kateng. ₂₉Leha ho le jwalo, setjhaba se seng le se seng sa nna sa iketsetsa medimo ya sona, sa e emisa nqalong tse diphahameng tse neng di entswe ke Basamaria, setjhaba se seng le se seng sa e bea metseng eo se ahileng ho yona. ₃₀Batho ba Babilona ba etsa Sukkothe-Benothe; batho ba Kuthe ba etsa Nergale, batho ba Hamathe ba etsa Ashmina; ₃₁ba Avva ba etsa Nibkase le Tharthake; ba Sefarvaime ba nna ba tjhesetsa Adrammeleke le Anammeleke medimo ya Sefarvaime, bara ba bona ka mollo. ₃₂Ba tshaba Jehova jwalo, ba nna ba iketsetsa baprista ba nqalo tse diphahameng, bao ba ikgethetseng bona hara bona, ya eba bona ba ba hlabelang matlung a nqalong tse diphahameng. ₃₃Ba tshaba Jehova jwalo, ba sebeletsa le medimo ya bona ka mokgwa wa ditjhaba tseo ba neng ba tlositswe hara tsona.

₃₄Le kajeno ba sa etsa ka mekgwa ya bona ya pele; ha ba tshabe Jehova, ha ba etse le ka melao yohle ya bona, leha e le ka mekgwa yohle ya bona, leha e le ka molao le ka taelo eo Jehova a e laetseng bara ba Jakobo, eo a mo reileng Iseraele; ₃₅bao Jehova a neng a entse selekane le bona, a ba laetse, a re: Le se ke la tshaba medimo esele, le se ke la e kgumamela, leha e le ho e sebeletsa, leha e le ho e hlabela.

₃₆Empa haele Jehova ya le nyolotseng fatsheng la Egepeta ka matla a maholo le ka letsoho le otlolohileng, yena le mo tshabe, le mo kgumamele, le mo hlabele. ₃₇Haele ditshwanelo, le mekgwa, le molao, le taelo tseo a le ngoletseng tsona, le di boloke, le ye ka tsona kamehla; le se ke la tshaba medimo esele. ₃₈Le selekane seo ke se hlabileng le lona, le se ke la se lebala, mme le se ke la tshaba medimo esele. ₃₉Empa Jehova, Modimo wa lona, ke yena eo le tshwanetseng ho mo tshaba: ke yena ya tla le namolela matsohong a bohle bao e leng dira ho lona. ₄₀Leha ho le jwalo, ha ba ka ba utlwa, empa ba entse ka mekgwa ya bona ya pele.

₄₁Haele ditjhaba tseo, tsa tshaba Jehova jwalo, tsa mpa tsa sebeletsa le ditshwantsho tsa bona; le bana ba bona le ditloholo tsa bona ba ntse ba etsa le kajeno jwalokaha ho nnile ha etsa bontata bona.