Tsa ho kgutla ha Morena.
1Haele tsa ho tla ha Jesu Kreste Morena, le tsa ho phuthehela ha rona ho yena re a le rapela, banabeso, re re: 2Le se ke la phaka la sisinyeha pelong tsa lona, leha e le ho tshoha ke moya, mohlomong ke polelo, kapa ke lengolo leo ho thweng, le tswa ho rona, le ka reng: Letsatsi la Kreste le haufi. 3Le se ke la thetswa ke motho le ka mokgwa o le mong; hobane e ka kgona ho etsahale kweneho pele, mme ho hlahe motho eo wa sebe, mora tahleho; 4ya hanang, ya iphahamisang hodima hohle ho bitswang Modimo, leha e le ho kgumamelwang, mme o tla dula jwaloka Modimo tempeleng ya Modimo, a ipeile Modimo.
5Ana ha le hopole hobane, enere ha ke sa na le lona, nkile ka le bolella taba tseo na? 6Le jwale le tseba se mo thibelang, a tle a fele a bonahale nakong ya hae. 7Hobane sephiri sa bokgopo se se se sebetseha; feela, ya mo thibetseng e ka kgona a tloswe. 8Mme ke moo ho tla hlaha molotsana, eo Morena a tlang ho mo fedisa ka moya wa molomo wa hae, mme o tla mo timetsa ka ponahalo ya ho hlaha ha hae. 9Ke lekanya eo ho tla ha hae ho leng ka tshebetso ya Satane, ka matla wohle, le ka dipontsho, le ka mehlolo ya bohata, 10le ka thetso yohle ya bokgopo ho ba timelang; hobane ha ba ka ba amohela lerato la ho rata nnete, ba tle ba bolokehe. 11Ke ka baka leo Modimo o tlang ho ba romela moya wa thetso o sebetsang ka matla, ba tle ba dumele bohata; 12hore ho tle ho ahlolwe bohle ba sa kang ba dumela nnete, ba mpa ba thabetse bokgopo.
13Empa haele rona, re tshwanetse ho boka Modimo kamehla ka baka la lona, banabeso, baratuwa ba Morena, kahobane Modimo o le kgethile esale ho qaleng, hore le tle le bolokehe ke ho halaletswa ke Moya, le ke ho dumela nnete. 14O le bileditse hona ka Evangeli ya rona, le tle le rue kganya ya Morena wa rona Jesu Kreste.
15Ka baka leo, banabeso, le eme le tiile, mme le tiise dipolelo tseo le di rutilweng, leha e le ka molomo, leha e le ka lengolo la rona. 16Mme Morena wa rona Jesu Kreste, yena ka sebele, le Modimo, Ntata rona, o re ratileng, o re fileng ka mohau wa wona tshediso e sa feleng le tshepo e molemo, 17o tshedise dipelo tsa lona, mme o le tiise dipolelong tsohle le mesebetsing yohle e molemo!
