Pauluse ha a le Masedonia le naheng ya Bagerike. — O ya le Troase, moo a tsosang Eutike. — O feta Mileta, o kgothatsa baholo ba Efese. — O fihla Tire le Ptolemaise, le Sesarea. — Boporofeta ba Agabuse. — O fihla Jerusalema.
1Eitse hobane moferefere ona o kokobele, Pauluse a bitsa barutuwa, a ba dumedisa, a ntoo tloha, a ya Masedonia. 2Ha a se a qetile naha eo, mme a kgothaditse baena ka dipolelo tse ngata, a ya naheng ya Bagerike. 3A dula teng kgwedi tse tharo; mme ha a se a ya tloha ka sekepe ho ya Siria, a eletswa ho kgutla ka la Masedonia, kahobane Bajuda ba ne ba mo laletse. 4A felehetswa ho ya fihla Asia ke Sopatere wa Berea, le Aristarke le Sekundo le Gaiuse bao e leng ba Thesalonika; le Timothea wa Derba, le Tikike, le Trofime, bao e leng ba Asia. 5Bao ba re etella pele, ba ya re emela Troase. 6Haele rona, ra kena sekepeng motseng wa Filipi, matsatsi a mahobe a se nang ditomoso ha a se a fetile, mme ra ya ba fihlela Troase kamora matsatsi a mahlano, ra ba ra dula teng matsatsi a supileng.
7Ka la pele la veke, eitse ha barutuwa ba phuthehile ho ngwatha bohobe, Pauluse ha a tla tsamaya hosasane, a buisana le bona, a isa halelele, ya ba ya eba bosiu bo boholo. 8Athe dilampi di ne di le ngata tlung eo e kahodimo moo re neng re phuthehetse teng. 9Pauluse ha a ntse a isa halelele, mohlankana ya bitswang Eutike, ya neng a dutse sefensetereng, a tshwarwa ke boroko bo boholo, mme ha a se a hlotswe ke boroko, a wela fatshe a le tlung eo e kahodimo, e leng ya boraro, a ba a nkwa a shwele. 10Empa Pauluse a theoha, a inama hodima hae, a mo hamarela, a re: Se tshoheng, hobane moya wa hae o sa le ka ho yena. 11A boela a nyoloha, a ngwatha bohobe, mme eitse hobane ba je, a boela a ba kgothatsa, ha ba ha esa, a ntoo tloha. 12Mme ba boya le mohlankana eo a phela, mme ba tshediswa haholo ke hoo.
13Haele rona, ra kena sekepeng, ra sesisetsa Asone, moo re neng re tshwanetse ho teana le Pauluse; hobane o ne a laetse jwalo, ka ho re, yena o tla tsamaya ka maoto. 14Eitse hobane re boele re teane Asone, ra mo nka, ra ya le yena Mitilene. 15Ha re tloha teng ka sekepe, hosasane ra fihla mabapa le Kio; ka le hlahlamang ra tshwara lebopo la Samose; yare hobane re dule hanyenyane Trogillo, ka le hlahlamang ra fihla Mileta. 16Pauluse o ne a rerile ho feta Efese, a tle a se ke a dieha Asia; kahobane a ne a itlhahanetse, a tle a be Jerusalema ka tsatsi la Pentekonta, haekaba ho ka etswa jwalo.
17Ha a se a le Mileta, a romela Efese ho ya bitsa baholo ba kereke. 18Eitse hobane ba fihle ho yena, a re ho bona: Le tseba mokgwa oo ke nnileng ka etsa ka wona hara lona, haesale ke fihla Asia; 19kamoo ke sebeleditseng Morena kateng, ka boikokobetso bohle, le ka meokgo e mengata, le ka meleko e ntlhahetseng ka baka la merero ya Bajuda; 20le kamoo ke sa kang ka pata taba kateng, leha e le nngwe, ya tse le tshwanelang; ke sa kang ka phetsa le ho le bolella le ho le ruta tsona pontsheng le ka matlung a lona; 21ke ntse ke kgothaletsa Bajuda le Bagerike ho sokolohela ho Modimo, le ho dumela ho Jesu Kreste, Morena wa rona.
22Mme bonang, jwale, ke ya Jerusalema, ke tlamilwe ke Moya; empa ha ke tsebe ditaba tse tla ntlhahela teng; 23haese hobane, motseng o mong le o mong, Moya o Halalelang o ntse o nkomela hore ditlamo le dihloriso di ntebeletse. 24Empa ha ke re letho ka tsona, le bophelo ba kaha ke bo hlokomele, ke re, ke mpe ke qete leeto la ka ka thabo, le tshebetso eo ke e laetsweng ke Morena Jesu, e leng ho tiisa Evangeli ya mohau wa Modimo.
25Mme jwale bonang, ke a tseba hobane, haele lona kaofela, bao ke tsamaileng ke bolela Evangeli hara lona, ha ho e mong ya tla boela a bone sefahleho sa ka. 26Ka baka leo, ke le pakela kajeno hobane ha ke na molato mading a lona bohle. 27Hobane ha ke a ka ka tswafa ho le bolella morero wohle wa Modimo. 28Jwale, lona, hlong le itise, le dise le mohlape kaofela, oo Moya o Halalelang o le beileng balebedi ba wona, ho alosa kereke ya Modimo eo o ithuetseng yona ka madi ao e leng a wona ka sebele. 29Hobane ke a tseba hobane, ha ke se ke tlohile, ho tla kena ho lona diphiri tse bohale, tse sa tlong ho qenehela mohlape; 30le hobane ho tla tswa hara lona batho ba tla bolela ditaba tse kgopo, ho ikgulela barutuwa. 31Lebelang ke hona, le elellwe hobane ka dilemo tse tharo ha ke a ka ka phetsa bosiu le motshehare ho eletsa e mong le e mong wa lona ka meokgo.
32Mme jwale, banabeso, ke le laeletsa ho Modimo, le ho lentswe la mohau wa wona, o nang le matla a ho le hahisa, le ho le nea lefa hammoho le bahalaledi bohle. 33Ha ke a ka ka lakatsa silefera, leha e le kgauta, leha e le kobo ya e mong. 34Mme le a tseba e le lona hobane matsoho ana a sebeditse se neng se hlokwa ke nna le ke bao ke neng ke na le bona. 35Ke le bontshitse nthong tsohle hobane ke ka ho sebetsa jwalo ho tshwanetsweng ho thuswa bafokodi, le ho elellwa taba ya Morena Jesu, eo a e boletseng ka sebele sa hae, ha a re: Ho nea ke leseho le fetisang la ho fuwa.
36Eitse hobane a bolele taba tseo, a kgumama ka mangwele, a rapela le bona bohle. 37Yaba ba tshwarwa bohle ke ho lla haholoholo; ba itihela molaleng wa Pauluse, ba mo aka. 38Haholo ba ne ba hlomohile ke taba eo a ba boleletseng yona, ha a itse, ba ke ke ba boela ba bona sefahleho sa hae. Mme ba mo felehetsa ho fihla sekepeng.
