DEUTERONOMA 14

₁Le bana ba Jehova, Modimo wa lona; le se ke la iphatsa, mme le se ke la ipeola pakeng tsa mahlo ka baka la mofu. ₂Hobane o setjhaba se kgethetsweng Jehova, Modimo wa hao, mme Jehova o o kgethile hara ditjhaba tsohle tse lefatsheng hore o tle o be setjhaba sa hae sa sebele.

₃O se ke wa ja ntho tse manyala.

₄Diphoofolo tseo le ka di jang ke tsena: Ke kgomo, nku, le podi, ₅kgama, tshephe, nare, none, letsa, tholo le phuthi. ₆Hara diphoofolo, le ka ja tsohle tse ditlhako di arohaneng, tse dikgola tse pedi, tse thuisang. ₇Empa le se ke la ja tse thuisang feela, leha e le tse ditlhako di arohaneng feela, jwaloka kamele, moutla, le pela; hobane di a thuisa, empa ha di na ditlhako tse arohaneng; tsena ke tse ditshila ho lona; ₈le yona kolobe, hobane leha tlhako tsa yona di arohane, ha e thuise; e be ditshila ho lona. Le se ke la ja nama ya tsona, mme le se ame ditopo tsa tsona.

₉Tseo le ka di jang ho tsohle tse metsing ke tsena: Le je tsohle tse nang le dipheonyana le makgakgapha. ₁₀Empa le se ke la ja tse se nang dipheonyana, leha e le makgakgapha; tsena e be tse ditshila ho lona.

₁₁Le ka ja dinonyana tsohle tse hlwekileng. ₁₂Empa tseo e ka kgonang le se ke la di ja, ke tsena: Ntsu, seodi, le seitlhwaeledi; ₁₃nkgodi, letlaka, le mohakajane, le mefuta ya tsona; ₁₄le makgwaba wohle ka mefuta ya wona; ₁₅le mpshe, kgohoyadira, letlakapipi, le phakwe ka mefuta ya yona; ₁₆sephooko, lehalanyane le lengangane; ₁₇moholodi, kokolofitwe, le seinodi, ₁₈mokotatsie le masianoke, ka mefuta ya tsona, le lehehemu, le mmankgane. ₁₉Le dikokwanyana tsohle tse rurang, e be tse ditshila ho lona; di se ke tsa jewa. ₂₀Jang dinonyana tsohle tse hlwekileng.

₂₁Le se ke la ja nama ya tse itjhweletseng; o mpe o e nee moditjhaba ya menyakong ya hao, a e je; mohlomong o reke ho moditjhaba ka yona; hobane wena o setjhaba se kgethetsweng Jehova, Modimo wa hao.

O se ke wa hladiya potsanyane lebeseng la mma yona.

₂₂O kgethisise karolo ya leshome ya dintho tsohle tse hlahiswang ke peo tsa hao, tse melang masimong a hao ka selemo se seng le se seng. ₂₃O je pela Jehova, Modimo wa hao, nqalong eo a tla ikgethela yona ho bea lebitso la hae teng, karolo ya leshome ya koro ya hao, le ya veine e ntjha ya hao, le ya ole ya hao, le matsibolo a dikgomo le a dinku tsa hao, o tle o ithute ho tshaba Jehova, Modimo wa hao, kamehla. ₂₄Empa etlare ha tsela e le telele haholo, mme o sitwa ho isa dintho tseo, kahobane mohlomong nqalo eo Jehova, Modimo wa hao, a tla ikgethela yona ho bea lebitso la hae teng, e tla ba hole le wena, mohla Jehova, Modimo wa hao, a o hlohonolofaditseng, ₂₅o tla reka tjhelete ka dintho tsena; o tla fupara tjhelete tseo matsohong a hao, o ye nqalong eo Jehova, Modimo wa hao, a tla e kgetha; ₂₆mme o tla reka ka tjhelete tseo tsohle tseo pelo ya hao e ka di lakatsang, dikgomo, dinku, kapa veine, kapa seno se seng se matla, leha e le ntho tsohle tseo pelo ya hao e ka di lakatsang, o di je hona teng, pela Jehova, Modimo wa hao, mme o thabe, wena, le ba ntlo ya hao; ₂₇le Molevi ya menyakong ya hao, o se ke wa mo tlohela, hobane ha a na kabelo le lefa jwaloka wena.

₂₈Qetellong ya dilemo tse tharo, o ntshe karolo yohle ya leshome ya tseo o di kotutseng tsa selemo seo, mme o e bokelle menyakong ya hao. ₂₉Jwale Molevi ya se nang kabelo le lefa jwaloka wena, le moditjhaba, le kgutsana, le mosadi wa mohlolohadi, ba metseng ya hao, ba tla tla, mme ba je, ba kgore; Jehova, Modimo wa hao, a tle a o hlohonolofatse mesebetsing yohle ya matsoho a hao, eo o e etsang.