EKSODA 29

₁Ha o ba kgetha, hore ba etse mosebetsi wa boprista pela ka, o tla etsa ka mokgwa ona:

₂O nke pohwana le dipheleu tse pedi tse hlokang sekodi, le bohobe bo sa lomoswang, le dinkgwana tse se nang ditomoso, tse dubilweng ka ole, le maqebekwane a se nang ditomoso, a tlotsitwseng ka ole; o tle o di etse ka phofo e sefilweng ya koro; ₃o di kenye serotong, mme o di hlahise ka seroto, hammoho le pohwana le dipheleu tse pedi.

₄O ntoo atametsa Aarone le bara ba hae pela monyako wa tente ya pokano, o ba hlatswe ka metsi. ₅O tla nka diaparo, o apese Aarone kojwana, le kobo ya efoda, le efoda, le mokgajwana oo o tla o tlama hodima hae ka senyepa sa efoda; ₆o ntoo mo rwesa moqhwele hloohong, mme moqhweleng o bee lebenyane le kgethehileng. ₇O tla nka ole ya setlolo, o e tshollele hloohong ya hae, mme o mo tlotse jwalo. ₈Le bara ba hae o tla ba atametsa, o ba apese dikojwana; ₉o ntoo tlama Aarone le bara ba hae ka dinyepa, o ba rwese dikatiba; boprista e tla ba ba bona ka taelo ya kamehla, mme o kgethe Aarone le bara ba hae jwalo.

₁₀O atametse pohwana pela tente ya pokano, mme Aarone le bara ba hae ba tla bea matsoho a bona hloohong ya poho; ₁₁o ntoo hlaba poho pela Jehova, monyako wa tente ya pokano. ₁₂O nke madi a poho o a bee manakeng a aletare ka monwana; madi a mang kaofela o a tshollele fatshe pela aletare. ₁₃O ntoo nka mafura wohle a apesang mala, le maapara a hodima sebete, le diphio tse pedi, le mafura a tsona; o di tjheseletse aletareng. ₁₄Haele nama ya poho, le letlalo la yona, le moswang wa yona, o di tjhese kantle ho diahelo; ke sehlabelo sa sebe.

₁₅O tla nka pheleu e nngwe, mme Aarone le bara ba hae ba tla bea matsoho a bona hloohong ya pheleu; ₁₆o ntoo hlaba pheleu, mme o nke madi a yona, o a tshollele aletareng ka nqa tsohle. ₁₇O tla direla pheleu ka dikoto tsa yona, o hlatswe mala a yona le ditlhako tsa yona; o di bee dikotong tsa yona le hloohong ya yona; ₁₈mme o tjheseletse pheleu kaofela aletareng; ke setjheso sa Jehova se monko o monate, ke sehlabelo se tjheseditsweng Jehova.

₁₉O tla nka pheleu ya bobedi, mme Aarone le bara ba hae ba tla bea matsoho a bona hloohong ya pheleu; ₂₀o hlabe pheleu, o nke madi, mme ka wona o tlotse ntlha ya tsebe e tona ya Aarone, le dintlha tsa tsebe tse tona tsa bara ba hae, le menwana e metona ya matsoho a bona a matona, le menwana e metona ya maoto a bona a matona; madi a mang o a tshollele aletareng ka nqa tsohle. ₂₁O ntoo nka madi a aletareng, le ole ya setlolo; o fafatse Aarone le diaparo tsa hae, le bara ba hae le diaparo tsa bona, hammoho le yena; etlaba o kgethehile, yena le diaparo tsa hae, hammoho le bara ba hae le diaparo tsa bona. ₂₂O tla nka mafura a pheleu, le mohatla, le mafura a apesang mala, le maapara a hodima sebete, le diphio tse pedi, le mafura a tsona, le letsoho le letona (hobane ke pheleu ya peo), ₂₃le polokwe, le senkgwa se dubilweng ka ole, le leqebekwane, o di ntshe serotong sa mahobe a sa lomoswang se dutseng pela Jehova; ₂₄o di bee kaofela ha tsona diatleng tsa Aarone, le diatleng tsa bara ba hae, mme o di tsokotse pela Jehova, e le seabelo se tsokotswang; ₂₅o ntoo di tlosa matsohong a bona, mme o di tjheseletse aletareng, setjhesong, e be monko o monate pela Jehova; ke sehlabelo se tjheseditsweng Jehova. ₂₆O tla nka sefuba sa pheleu ya peo ya Aarone, mme o tla se tsokotsa pela Jehova, e le seabelo se tsokotswang; etlaba seabo sa hao. ₂₇O kgethe sefuba sa seabelo se tsokotswang le letsoho la hlokolo, e leng se tsokoditsweng le se hlokotsweng sa pheleu ya peo, sa ya Aarone le sa ya bara ba hae. ₂₈Hoo ho Aarone le bara ba hae e tla ba kabelo ya kamehla hara bana ba Iseraele; hobane ke seabelo sa hlokolo; seabelo sa hlokolo se tla ba teng sa bana ba Iseraele, sa mahlabelo a bona a teboho. Seabelo sa bona sa hlokolo e tla ba sa Jehova.

₂₉Diaparo tse kgethehileng tsa Aarone e tla ba tsa bara ba hae, ha a se a le siyo, hore ba tle ba di apare mohla ba tlotswang, le mohla ba kgethelwang boprista. ₃₀Mora wa hae, eo e tla ba moprista tulong tsa hae, ya tla kena tenteng ya pokano ho etsa tsa tshebeletso sehalalelong, o tla di apara ka tshiu tse supileng.

₃₁O tla nka pheleu ya peo, o apehe nama ya yona nqalong e halalelang; ₃₂Aarone le bara ba hae ba tla ja nama ya pheleu le bohobe bo leng serotong, monyako wa tente ya pokano; ₃₃ba je tseo pheko e entsweng ka tsona ho ba kgethela tshebeletso, le ho ba hlwekisa; di se ke tsa jewa ke moditjhaba, hobane ke ntho tse kgethehileng. ₃₄Leha ho ka salla hosasane nama e nngwe ya kgethelo, le bohobe bo bong, ho setseng o tla ho tjhesa; ho se ke ha jewa, hobane ho kgethehile.

₃₅O tla etsetsa Aarone le bara ba hae jwalo, o ye ka tsohle tseo ke o laetseng tsona, o tle o ba kgethele tshebeletso ka tshiu tse supileng. ₃₆Hape, ka tsatsi le leng le le leng, o tla hlaba poho ya sehlabelo sa sebe ho etsa pheko; o tla hlwekisa aletare ka ho e etsetsa pheko, o e tlotse hore o tle o e kgethele tshebeletso. ₃₇Ka ditshiu tse supileng, o tla etsetsa aletare pheko, o be o e kgethele tshebeletso, mme aletare e tla ba ntho e kgethehileng haholo; eng le eng e ka amang aletare e kgethehile.

₃₈Tseo o tla di hlabela aletareng ke konyana tse pedi tse lemo se le seng, ka tsatsi le leng le le leng, kamehla yohle. ₃₉Konyana e nngwe o tla e hlaba hosasa, konyana ya bobedi o e hlabe mantsiboya; ₄₀o hlahise konyana e nngwe le e nngwe e na le tekanyo ya leshome ya phofo e sefilweng, e dubilweng tekanyong ya bone ya hine ya ole e hlwekileng, le tshelo ya karolo ya bone ya hine ya veine. ₄₁Konyana ya bobedi o tla e hlaba mantsiboya; o e hlahise e na le nyehelo le tshelo, jwaloka ya hosasa, e tle e be monko o monate le sehlabelo se tjheseditsweng Jehova. ₄₂E tla ba sona setjheso sa kamehla sa meloko yohle ya lona, se hlahiswang monyako wa tente ya pokano pela Jehova, moo ke tla teana le lona, hore ke tle ke bue le wena teng. ₄₃Ke tla teana teng le bana ba Iseraele, mme tente e tla kgetheha ka kganya ya ka; ₄₄ke tla kgetha tente ya pokano le aletare, ke kgethe le Aarone le bara ba hae, hore ba etse mosebetsi wa boprista pela ka. ₄₅Ke tla aha hara bana ba Iseraele, ke be Modimo wa bona; ₄₆ba tla tseba hoba ke Jehova, Modimo wa bona, ya ba ntshitseng lefatsheng la Egepeta, hore ke tle ke ahe hara bona: Ke nna Jehova, Modimo wa bona.