EKSODA 36

₁Jwale, Betsaleele le Oholiabe, le banna bohle ba masene bao Jehova a ba neileng bohlale le kutlwisiso ya tsebo le ya ketso, ba tla ho etsa mosebetsi wohle wa tshebeletso ya sehalalelo, kahohle kamoo Jehova a laetseng kateng.

₂Yaba Moshe o bitsa Betsaleele le Oholiabe, le banna bohle ba masene bao Jehova a kentseng bohlale pelong tsa bona, e leng bohle ba kgannilweng ke pelo tsa bona ho tla etsa mosebetsi. ₃Ba nka ho Moshe dikabelo tsohle tse abetsweng Jehova, tse tlisitsweng ke bana ba Iseraele ho etsa mesebetsi ya tshebeletso ya sehalalelo. Le jwale, ka ho rata, ba ne ba ntse ba tlisa dikabelo ka hosasa ho hong le ho hong. ₄Yaba banna bohle ba masene, ba sebetsang mesebetsi yohle ya sehalalelo, ba tlohela e mong le e mong mosebetsi oo a o sebetsang, ba tla, ba re ho Moshe: ₅Setjhaba se se se tlisitse ho fetisa ho lekaneng mesebetsi eo Jehova a e laetseng hore e etswe. ₆Yaba Moshe o laela hore ho tumiswe diahelong taba e reng: Banna le basadi ba se ke ba hlola ba tlisa dikabelo tse abetsweng mosebetsi wa sehalalelo. Setjhaba sa thibelwa kahoo ho nna se tlisa; ₇hobane dintho tsa ho sebetsa mosebetsi wohle di ne di se di lekane; le ho sala di ne di tla sala.

₈Banna bohle ba masene, ba sebetsang mesebetsi, ba sebetsa tabernakele ka masela a leshome a lene e ntle e lohilweng, a purepera le sekarelata, le krimsone; a etswa a homilweng ka dikerubime, ka mokgwa wa mosebetsi o etswang ka masene; ₉bolelele ba lesela ya eba tswe tse mashome a mabedi a metso e robileng meno e le mmedi; bophara ba lesela ya eba tse nne; masela wohle a etswa ka tekanyo e le nngwe. ₁₀Ha rokellwa masela a mahlano hammoho, mme ha rokellwa masela a mang a mahlano. ₁₁Ha etswa mahokelo a purepera mophethong wa lesela le leng, ntlheng ya masela a rokeletsweng; ha etswa jwalo hape mophethong wa lesela, le ntlheng ya masela a mang a rokeletsweng. ₁₂Ha etswa mahokelo a mashome a mahlano leseleng le leng, hape ha etswa mahokelo a mashome a mahlano ntlheng ya lesela le qetellang a mang a rokeletsweng, hore mahokelo a bape. ₁₃Ha etswa dikgoketsane tse mashome a mahlano tsa kgauta, ha kopanngwa masela hammoho ka dikgoketsane; ka mokgwa o jwalo tabernakele ya eba ntho e phethehileng.

₁₄Hape, ha etswa masela a boya ba podi a ho etsa tente ya tabernakele; ha etswa masela e leshome le motso o mong. ₁₅Bolelele ba lesela ya eba ditswe tse mashome a mararo; bophara ba lesela ya eba ditswe tse nne; masela ao a leshome le motso o mong a etswa ka tekanyo e le nngwe. ₁₆Ha rokellwa masela a mahlano hammoho, ha boela ha rokellwa masela a tsheletseng kahosele. ₁₇Ha etswa mahokelo a mashome a mahlano mophethong wa lesela le ntlheng ya masela a mang a rokeletsweng hammoho; hape, ha etswa mahokelo a mashome a mahlano mophethong wa lesela le qetellang masela a mang a rokeletsweng hammoho. ₁₈Hape, ha etswa dikgoketsane tsa koporo ho kopanya tente, hore e etse ntho e le nngwe.

₁₉Tente ya etsetswa sekgurumetso sa matlalo a dipheleu a tlotsitsweng ka bofubedu; le sona sa apeswa ka sekgurumetso sa matlalo a diqibi.

₂₀Ha etswa dipolanka tsa tabernakele ka fate tsa leoka, hore e tsebe ho ema; ₂₁bolelele ba polanka ya eba ditswe tse leshome, bophara ba polanka ya eba setswe se nang le halofo. ₂₂Polanka e nngwe le e nngwe ya etsetswa dimapo tse pedi tse bapileng. Dipolanka tsohle tsa tabernakele tsa etswa jwalo le tsona. ₂₃Ha etswa dipolanka tsa tabernakele tse mashome a mabedi ka nqa borwa; ₂₄ha etswa didulwana tsa silefera tse mashome a mane, tsa bewa tlasa dipolanka tse mashome a mabedi; polanka e le nngwe ya eba le didulwana tse pedi le dimapo tse pedi tsa tsona, mme polanka e nngwe ya eba le didulwana tse pedi le dimapo tse pedi tsa tsona. ₂₅Lehlakore la bobedi la tabernakele, le ka nqa leboya, la etsetswa dipolanka tse mashome a mabedi, ₂₆le didulwana tsa tsona tsa silefera tse mashome a mane; polanka e nngwe ya eba le didulwana tse pedi, e nngwe hape polanka ya eba le didulwana tse pedi. ₂₇Haele motseo wa tabernakele, ka nqa bophirimela, wa etsetswa dipolanka tse tsheletseng. ₂₈Le dikgutlo tsa tabernakele tse motsheo, tsa etsetswa dipolanka tse pedi. ₂₉Tsa kopanngwa katlase, hape tsa kopanngwa le kahodimo ka mofapo; dipolanka tse pedi tsa dikgutlo tse pedi tsa etswa jwalo. ₃₀Ha ho le jwalo, ha etswa dipolanka tse robileng meno e le mmedi le didulwana tsa tsona tsa silefera; didulwana tsa eba leshome le metso e tsheletseng, tsa eba ka bobedi tlasa polanka e le nngwe, tsa eba ka bobedi tlasa polanka e nngwe hape. ₃₁Hape, ha etswa maballo a sefate sa leoka, ha etswa a le mahlano dipolankeng tsa lehlakore le leng la tabernakele; ₃₂hape, maballo a eba mahlano lehlakoreng la bobedi la tabernakele; le motsheo ka nqa bophirimela, maballo a eba mahlano dipolankeng tsa tabernakele. ₃₃Ha etswa le leballo le mahareng, ho tiisa dipolanka mahareng a tsona le ho di kopanya. ₃₄Dipolanka tsa manehwa ka kgauta, le mehwele ya tsona ya etswa ka kgauta, mme tsa kenngwa maballo a tsona; le wona maballo a manehwa ka kgauta.

₃₅Yaba ho etswa lesira la purepera le sekarelata, le krimsone, le lene e ntle e lohilweng, ka mokgwa wa mosebetsi o homilweng ka dikerubime; ₃₆la etsetswa tshiya tse nne tsa sefate sa leoka, mme tsa manehwa ka kgauta; tsa eba le dikgoketsane tsa kgauta, mme tsa tshollelwa didulwana tse ne tsa silefera.

₃₇Monyako wa tente wa etsetswa lesela le lepeletseng, la purepera, le sekarelata, le krimsone le lene e ntle e lohilweng, ₃₈e le mosebetsi o homilweng; ha etswa le ditshiya tsa lona tse hlano le dikgoketsane tsa tsona, mme ha manehwa dihlooho tsa tsona le dithupa tsa tsona ka kgauta, mme didulwana tsa tsona tse hlano tsa etswa ka koporo.