Ho kgalemelwa baporofeta ba bohata.
1Yaba lentswe la Jehova le ntlela, la re: 2Mora motho, porofetela baporofeta ba Iseraele ba porofetang, o bolelle bao e leng baporofeta ka thato ya dipelo tsa bona, o re: Mamelang lentswe la Jehova. 3Morena Jehova o re: Ho madimabe baporofeta ba mawatla, ba yang ka kelello tsa bona, ba buang ba sa ka ba bona letho. 4Oho Iseraele, baporofeta ba hao ba tshwana le diphokojwe tse dithakong. 5Ha le a hlwella dikgeong, ha le a haha lerako ho teela ntlo ya Iseraele hare, ho tiya ntweng, tsatsing la Jehova. 6Ba nang le dipono tsa lefeela le bonohe ba bohata, ba re: Ho itswe ke Jehova! athe Jehova ha a ba roma, mme ba tshepile hoba o tla tiisa mantswe a bona. 7Na ha le a bona pono ya lefeela, na ha le a bolela bonohe ba leshano, ha le re: Ho itswe ke Jehova! athe ha ke a ka ka bua?
8Ha ho le jwalo, Morena Jehova o re: Erekaha le bua taba tsa lefeela, mme le bona pono tsa leshano, ke ya tla le lwantsha: ho rialo Morena Jehova. 9Letsoho la ka le tla lwantsha boporofeta ba bonang mafeela, ba nohang mashano; ba ke ke ba eba le kopano le setjhaba sa ka, ha ba ka ke ba ngolwa bukeng ya ntlo ya Iseraele; ha ba ka ke ba kena naheng ya Iseraele, le tle le tsebe hoba ke nna Morena Jehova. 10Erekaha ba fela ba kgelosa setjhaba sa ka, ba re: Kgotso! athe ha ho kgotso, mme erekaha tjhaba sena se haha lerako, mme ba le dila ka seretse ... 11ere ho ba dubang seretse seo se dilang: Lerako le tla heleha! Dikgohola di tla matha, mme lona, majwe a sefako, le tla wa; moya wa difefo o tla puka. 12Mme bonang, ha lerako le heleha, ha ke re, ho tla thwe ho lona: Se kae seretse seo le le ditseng ka sona? 13Ha ho le jwalo, Morena Jehova o re: Kgalefong ya ka, ke tla pukisa moya wa difefo; bohaleng ba ka, dikgohola di tla matha, kgalefong ya ka, majwe a sefako a tla wa ho timeletsa ruri. 14Ke tla heletsa lerako leo le le ditseng ka seretse, ke le rapalatse fatshe, metheo ya lona e apolwe; le tla wa, mme lona le tla timeletswa kaofela hammoho le lona, le tle le tsebe hoba ke nna Jehova. 15Ke tla phethisa kgalefo ya ka ho lerako leo le ho ba le dilang ka seretse, ke ntoo re ho lona: Lerako ha le sa le yo, le ba neng ba le dila ha ba sa le yo; 16e leng baporofeta ba Iseraele, ba neng ba porofetela Jerusalema, ba neng ba mmonela dipono tsa kgotso, kanthe ha ho kgotso: ho rialo Morena Jehova.
17Haele wena, mora motho, lebisa sefahleho sa hao nqa ho baradi ba tjhaba sa heno ba porofetang ka ho rata ha dipelo tsa bona, o ba porofetele, 18o re: Morena Jehova o re: Ho madimabe ba rokang mesangwana ya ho apesa dinoko tsohle tsa letsoho, ba etsang mesamelo ya dihlooho tse boholo bofe le bofe, hore ho tshwaswe meya ya batho. Na le re, le ka tshwasa meya ya ba setjhaba sa ka, le ntse le pholositse meya ya lona na? 19Le ntlhompholotse pela setjhaba sa ka, ka baka la dikakolo tsa harese le dingwatho tsa bohobe, ka ho bolaya meya e neng e sa tshwanela ho shwa, le ka ho pholosa meya e neng e sa tshwanela ho phela, le ka ho thetsa setjhaba sa ka se mamelang leshano.
20Ha ho le jwalo, Morena Jehova o re: Ke hloile mesangwana ya lona eo le tshwasang meya ya batho ka yona, jwaloka hoja e le dinonyana; ke tla e hahola matsohong a lona, ke tle ke lokolle meya e tshwasitsweng, ke lokolle meya eo le e tshwasitseng jwaloka hoja e le dinonyana. 21Ke tla hahola le mesamelo ya lona, ke tle ke namolele setjhaba sa ka diatleng tsa lona, mme ha se sa tla ba matsohong a lona hore se tshwaswe ke lona, le tle le tsebe hoba ke nna Jehova. 22Erekaha le hlomodisitse ka bohata pelo ya ya lokileng eo ke neng ke sa mo hlomodise, mme le natlafaditse diatla tsa e mobe, hore a se ke a sokoloha tseleng ya hae e mpe, a tle a tsebe ho pholoswa, 23le hona ha le sa tla bona dipono tsa lefeela, ha le sa tla etsa bonohe. Ke tla namolela setjhaba sa ka diatleng tsa lona, le tle le tsebe hoba ke nna Jehova.
