Ho porofetelwa Baammone, Bamoabe, Baedomo, le Bafilesta dikahlolo.
1Lentswe la Jehova la boela la ntlela, la re: 2Mora motho, retelletsa sefahleho sa hao nqa ho bana ba Ammone, o ba porofetele; 3o re ho bana ba Ammone: Mamelang lentswe la Morena Jehova! Morena Jehova o re: Erekaha o itse: Haiaha! ka sehalalelo sa ka mohla se silafatswang, le ka lefatshe la Iseraele mohla le etswang nahathothe, le ka ba ntlo ya Juda mohla ba iswang kgolehong, 4ka baka leo, bona, ke tla o neela ho ruwa ke bana ba Botjhabela; ba tla bea metebo ya bona ha eno, ba hlome meaho ya bona ha eno; ke bona ba tla ja ditholwana tsa hao, ba nwe lebese la hao. 5Ke tla etsa Rabba makgulo a dikamele, naha ya bana ba Ammone e be metebo ya dinku; le tle le tsebe hoba ke nna Jehova. 6Hobane Morena Jehova o re: Erekaha o opile ka diatla le ho tila ka leoto, mme wa thabela kgeso ya lefatshe la Iseraele ka moya wohle wa hao, 7ka baka leo, bona, ke tla o otlollela letsoho la ka, ke tle ke o neele ho rusolelwa ke ditjhaba, ke o kgaole hara ditjhaba, ke o timetse dinaheng tsohle; ke tla o fedisa, o tle o tsebe hoba ke nna Jehova.
8Morena Jehova o re: Erekaha Moabe le Seire ba itse: Bonang, ntlo ya Juda e tshwana le ditjhaba tsohle; 9ha ho le jwalo, bona, ke tla phetla lehlakore la Moabe, ho tloha metseng ya hae e pheletsong ya hae, e etsang naha botle: Bethe-Jeshimothe, Baale-Meone, le ho ea fihla Kiriathaime; 10ke ya le phetlela bana ba Botjhabela ba futuhelang bana ba Ammone, ke tla ba neela lona ho ruwa ke bona, hore ho se ke ha hlola ho hopolwa bana ba Ammone hara ditjhaba, 11mme ke tla hlahisetsa Moabe dikahlolo tsa ka, ba tle ba tsebe hoba ke nna Jehova.
12Morena Jehova o re: Erekaha Baedomo ba entse phetetso e thata ka ntlo ya Juda, ba ikentse molato haholo ka ho iphetetsa ho yona, 13ka baka leo, Morena Jehova o re: Ke tla otlollela naha ya Edomo letsoho la ka, ke kgaole batho le dikgomo teng, ke be ke e etse nahathothe ho tloha Themane, mme ba tla dihuwa ke lerumo ho ya fihla Dedane. 14Ke tla iphetetsa ho Edomo ka setjhaba sa ka sa Iseraele; ba tla etsetsa Edomo ka bohale ba ka le ka kgalefo ya ka, mme ba tla tseba phetetso ya ka: ho rialo Morena Jehova.
15Hape, Morena Jehova o re: Erekaha Bafilesta ba entse phetetso, mme ba entse tefetso e thata ka baka la kgeso eo ba neng ba na le yona dipelong tsa bona, ba ratile ho timeletsa setjhaba sa ka ka hloyo e sa feleng; 16ka baka leo, Morena Jehova o re: Bonang, ke tla otlollela Bafilesta letsoho la ka, ke kgaole Bakerethe, ke timetse ba setseng pela lebopo la lewatle. 17Ke tla ba etsetsa ka ditefetso tse kgolo le ka dikgalemelo tsa kgalefo; ba tle ba tsebe hoba ke nna Jehova, mohla ke beang tefetso ya ka hodima bona.
