1Yaba lentswe la Jehova le ntlela, la re: 2Mora motho, porofeta, o re: Morena Jehova o re: Bokollang! Jo! tshiu e ya tla! 3Efela tshiu eo e haufi: e, e haufi, tshiu ya Jehova; e tla ba tshiu e lefifi, e tla ba tshiu ya ditjhaba. 4Lerumo le tla tlela Egepeta, Kushe a bidikane ke bohloko, mohla ba bolawang, ba welang fatshe Egepeta, le mohla ho tshwarwang bongata ba batho ba teng, mme metheo ya teng e epollwang. 5Bakushe, Baputhe, Balude, le Baarabia kaofela, le Bakube le bana ba lefatshe la selekane, ba tla wa ka lerumo hammoho le bona. 6Jehova o re: Haele ba tshetlamisang Egepeta, ba tla wa, boikgohomoso bo matla ba teng bo kokobetswe; ho tloha Migdole ho isa Siene, batho ba tla wa ka lerumo: ho bolela Morena Jehova. 7Ba tla dula ba senyeditswe dinaheng tse senyehileng, mme metse ya bona e tla balwa le metse e entsweng dithako; 8ba tle ba tsebe hoba ke nna Jehova, mohla ke besang mollo Egepeta, mme batlatsi bohle ba teng ba robehang. 9Tsatsing leo, ho tla tloha ho nna ka dikepe manqosa, a tla ya tshosa Kushe ya iketlileng, mme ba tla kudupana ke bohloko jwaloka mohla kotlo ya Egepeta; bonang, hoo ho fela ho ya tla.
10Morena Jehova o re: Ke se ke ya fedisa bongata ba batho ba Egepeta ka letsoho la Nebukadresare, morena wa Babilona. 11Yena hammoho le setjhaba sa hae, e leng setjhaba se thata hara ditjhaba, ba ya tliswa ho timetsa lefatshe; ba tla tsomola marumo a bona ho lwantsha Egepeta, ba tlatse lefatshe ka ba bolawang. 12Ke tla pshesa dinoka, ke be ke neele lefatshe matsohong a ba babe; ka matsoho a baditjhaba ke tla senya lefatshe le tsohle tse ho lona: ke nna Jehova ya boletseng hoo.
13Morena Jehova o re: Ke tla timetsa le ditshwantsho, ke fedise medimo ya lefeela naheng ya Nofe; ha ho sa tla ba morena eo e leng wa naha ya Egepeta, mme ke tla hasa letsoso naheng ya Egepeta. 14Ke tla etsa Pathrose lesupi, ke tjhese Tsowane; ke tla hlahisetsa No dikahlolo. 15Ke tla tshela kgalefo ya ka hodima Sine, qhobosheane ya Egepeta, ke kgaole bongata ba batho ba No. 16Ke tla besa mollo Egepeta; Sine o tla kudupana, No a heletswe, Nofe a kenwe ke dira motshehare. 17Bahlankana ba Afene le ba Pi-Besethe ba tla wa ka lerumo, batho ba teng ba ye kgolehong le bona. 18Haele Takpanese, motshehare o tla fetoha lefifi, mohla ke robang joko ya Egepeta teng, mme boikgohomoso ba teng bo matla bo felang. Leru le letsho le tla apesa motse oo, mme barwetsana ba teng ba tla ya kgolehong. 19Ke tla hlahisa dikahlolo Egepeta, ba tle ba tsebe hoba ke nna Jehova.
20Eitse ka selemo sa leshome le motso o mong, ka kgwedi ya pele, ka la bosupa la kgwedi, lentswe la Jehova la ntlela, la re: 21Mora motho, ke robile letsoho la Faro, morena wa Egepeta, mme bona, ha le a ka la tlamellwa ka dihlare leha e le ka lesela, hore le tle le natlafalle ho tshwara lerumo. 22Ka baka leo, Morena Jehova o re: Bona, ke se ke ya tla ho Faro, morena wa Egepeta, ke robe matsoho a hae, le leng e leng le matla, le leng e leng le robehileng; mme ke tla wesa lerumo letsohong la hae; 23ke tla qhalanyetsa Baegepeta hara ditjhaba, ke ba hase dinaheng. 24Ke mpa ke tla natlafatsa matsoho a morena wa Babilona, ke tla bea lerumo la ka letsohong la hae, ke robe matsoho a Faro, a fehelwe pela hae ka mefehelo ya motho ya hlabilweng. 25Ke tla natlafatsa matsoho a morena wa Babilona, mme matsoho a Faro a tla keba, ba tle ba tsebe hoba ke nna Jehova, mohla ke beang lerumo la ka letsohong la morena wa Babilona, mme a le otlollelang lefatshe la Egepeta. 26Ke tla qhalanyetsa Baegepeta ditjhabeng, ke ba hasanyetse dinaheng, ba tle ba tsebe hoba ke nna Jehova.
