1Mora motho, porofetela Gogo, o re: Morena Jehova o re: Bona, ke tla ho wena, Gogo, morena wa Roshe, Mesheke le Tubale. 2Ke tla o kgutlisa, ke o hulanye, ke o nyolle pheletsong ya leboya, ke o tlise ho lwantsha dithaba tsa Iseraele. 3Ke tla phamole seqha sa hao letsohong la hao le letshehadi, ke dihe metsu ya hao letsohong la hao le letona. 4O tla wela dithabeng tsa Iseraele, e le wena le makgotla wohle a hao, le ditjhaba tse leng ho wena. Ke tla o neela manong le tsohle tse fofang le diphoofolo tsa naha, ho ba dijo tsa tsona. 5O tla wela naheng; efela ke nna ke boletseng: ho rialo Morena Jehova. 6Ke tla romela mollo naheng ya Magogo le hodima bohle ba ahileng dihlekehlekeng ba iketlile; mme ba tla tseba hoba ke nna Jehova. 7Ke tla tumisa lebitso la ka le kgethehileng hara setjhaba sa ka sa Iseraele, ha ke sa tla dumela hore ho hlomphollwe lebitso la ka le kgethehileng; mme ditjhaba di tla tseba hoba ke nna Jehova Mohalaledi wa Iseraele.
8Bonang, taba eo e se e ya tla, le ho etsahala: ho bolela Morena Jehova. Ke lona letsatsi leo ke le boletseng. 9Ba ahileng metseng ya Iseraele ba tla tswa, ba bese mollo, ba tle ba tjhese dibetsa, le dithebe, le dithejana, le diqha, le metsu, le marumo, le dikwebe; ba tla di besa ka dilemo tse supileng. Ha ba sa tla rwalla patsi naheng; 10ha ba sa tla ya rema merung, ba mpa ba tla besa dibetsa; ba tla hlobodisa ba ba hlobidisitseng, ba tlatlape ba ba tlatlapileng: ho bolela Morena Jehova.
11Tsatsing leo, ke tla nea Gogo setsha sa mabitla Iseraeleng, kgohlong ya baeti, ka nqa botjhabela ho lewatle, mme se tla thiba tsela ya baeti. Ke hona moo ho tla epelwa Gogo le bongata bohle ba hae, lebitso la teng le tla rewa Kgohlo ya bongata ba Gogo. 12Ka kgwedi tse supileng, ba ntlo ya Iseraele ba tla ba epela, hore ba hlaphole lefatshe; 13setjhaba sohle sa lefatshe se tla epela, mme hoo e tla ba botumo ho bona tsatsing leo ke tla itlotlisa ka lona: ho bolela Morena Jehova. 14Ho tla kgethwa batho ba tla nne ba solle le naha, ba ntse ba epela ditopo tse setseng naheng, ba tlatsana le baeti, hore ba e hlaphole. Ba tla qala ho batla qetellong ya kgwedi tse supileng. 15Le bona baeti ba tla solla le naha; ya tla bona masapo a motho o tla emisa sefika sa lejwe pela wona, ho be ho fihle baepedi ba a epelang Kgohlong ya bongata ba Gogo. 16Esita le lebitso la motse wa teng e tla ba la Hamona (bongata). Ba tla hlaphola lefatshe jwalo.
17Haele wena, mora motho, Morena Jehova o re: Ere ho dinonyana, ho tsohle tse nang le dipheo, le ho diphoofolo tsohle tsa naha: Phuthehang, le tle. Phuthehang nqa tsohle, le tle sehlabelong sa ka, sehlabelong se seholo seo ke le hlabelang sona dithabeng tsa Iseraele, le tle le je nama, le nwe madi. 18Le tla ja nama tsa diqhenqha, le tla nwa madi a marena a lefatshe: e leng dipheleu, le dikonyana, le diphooko, le dipoho; kaofela ha tsona e le tse nontshitsweng Bashane. 19Le tla ja nama, le be le kgore, le tla nwa madi, le be le tahwe, sehlabelong sa ka seo ke le hlabelang sona. 20Tafoleng ya ka, le tla kgora dipere le tse bofshwang, diqhenqha le bohle banna ba ntwa: ho bolela Morena Jehova.
21Ke tla itlotlisa ditjhabeng; ditjhaba di tla bona kahlolo ya ka eo ke tla e etsa, le letsoho la ka leo ke tla le bea ho tsona. 22Ho qala tsatsing leo le ho isa pele, ba ntlo ya Iseraele ba tla tseba hoba ke nna Jehova, Modimo wa bona. 23Ditjhaba di tla tseba hoba ba ntlo ya Iseraele ba ne ba isitswe kgolehong ka baka la bokgopo ba bona, le kahobane ba ne ba ntshitetswe: ke ne ke ba patele sefahleho sa ka ke hona ka ba neela matsohong a dira tsa bona, ba ba ba dihuwa ke lerumo kaofela ha bona. 24Ke ba entse ka ditshila tsa bona le ka meikgantsho ya bona, ka ba patela sefahleho sa ka ke hona.
25Ha ho le jwalo Morena Jehova o re: Jwale, ke tla kgutlisa ba isitsweng kgolehong ba Jakobo, ke utlwele ntlo yohle ya Iseraele bohloko, ke boulelle lebitso la ka le kgethehileng. 26Ba tla lebala sekgobo sa bona le tshito ya bona eo ba ntshitetsweng ka yona, mohla ba ahang naheng ya bona ba iketlile, ho se ya ba tshabisang; 27e le mohla ke ba kgutlisang ditjhabeng, ke ba phuthang dinaheng tsa dira tsa bona, ke ikgalaletsang ka bona pontsheng ya ditjhaba tse ngata. 28Ba tla tseba hoba ke nna Jehova, Modimo wa bona, ke na beng ke ba isitse ditjhabeng kgolehong, ke boelang ke ba bokellela naheng ya bona, mme mane nke ke ka siya le a mong wa bona. 29Mme ha ke sa tla boela ke ba patele sefahleho sa ka, kahobane etlaba ke tsholletse moya wa ka tlung ya Iseraele: ho bolela Morena Jehova.
