BAGALATA 4

₁Hape ke re: Ha mojalefa e sa le ngwana, ha ho kamoo a sa tshwaneng le mohlanka kateng, leha e le yena monga ntho tsohle; ₂empa o sa le pusong ya balebedi le ya badisa, ho be ho fihle nako e beilweng ke ntatae. ₃Ka mokgwa o jwalo, le rona, enere ha re sa le bana, re ne re le pusong ya taba tsa qalo tsa lefatshe. ₄Empa nako ha di phethehile, Modimo o romile Mora wona, ya tswetsweng ke mosadi, a hlahetse pusong ya molao, ₅a tle a lopolle ba katlasa molao, re tle re bewe bana. ₆Mme erekaha le le bana, Modimo o rometse dipelong tsa lona Moya wa Mora wa wona, o howang, o re: Abba! Ntate! ₇Ke moo jwale o sa hloleng o le mohlanka, empa o mora; mme ha o le mora, hape o mojalefa wa Modimo ka Kreste.

₈Efela pele, ha le ne le eso ho tsebe Modimo, le ne le sebeletsa medimo e neng e se yona ka sebele; ₉empa jwale, ha le tsebile Modimo, mme haholo ha le tsebilwe ke Modimo, ana le kgutlela jwang ditabeng tsa qalo, tse fokolang, tse fumanehileng, tseo le ratang le ka boela la tlangwa ke tsona? ₁₀Le hlokomela matsatsi, le dikgwedi, le dinako, le dilemo. ₁₁Ke tshohile ka baka la lona, esere mohlomong ke sebeditse lefeela ho lona.

₁₂Le be jwaloka nna, hobane le nna ke jwaloka lona; ke a le rapela hle, banabeso. Ha le a ka la nketsa hampe ka letho.

₁₃Le a tseba hoba, mohla ke qalang ho le bolella Evangeli, e ne e le ka baka la phokolo ya nama. ₁₄Ha le a ka la nnyedisa, leha e le ho nkgana ka baka la moleko wa ka o nameng ya ka; la mpa la nkamohela jwaloka hoja ke le lengeloi la Modimo, le jwaloka hoja ke le Jesu Kreste. ₁₅Le kae jwale lehlohonolo leo le neng le re, le na le lona? Hobane nka le paka hoba le ka be le ikgontse mahlo ho nnea wona, hola ya be e le ntho e ka etswang. ₁₆Hleka ke fetohile sera ho lona, ka ho le bolella nnete na? ₁₇Bao leha ba le tjhesehetse, ha ba le tjhesehele hantle; ba mpa ba rata ho re kwallela ntle, hore le tle le ba tjhesehele. ₁₈Ke ntho e ntle ho tjhesehela botle kamehla, e seng mohla ke leng teng ho lona feela. ₁₉Bana ba ka ba banyenyane, lona bao ke boelang ke le utlwela bohloko ba ho tswala, Kreste a tle a be a bopelwe ka ho lona; ₂₀nka rata hore ke boele ke be teng hara lona, ke tle ke tsebe ho fetola lentswe la ka; hobane ke ferekane ka baka la lona!

₂₁Mpolelleng, lona ba ratang ho ba tlasa molao, hleka ha le utlwe molao na? ₂₂Athe ho ngodilwe hore Abrahama o bile le bara ba babedi, e mong e le wa mosadi ya rekilweng, e mong e le wa mosadi ya sa rekwang. ₂₃Empa eo e neng e le wa ya rekilweng, o tswetswe ka nama, mme eo e neng e le wa ya sa rekwang, yena o tswetswe ka pallo. ₂₄Mme taba tseo ke setshwantsho; hobane basadi bao ke dilekane tse pedi; se seng e le sa thaba ya Sinai, se tswalang ba rekwang; seo ke Agare — ₂₅hobane Agare ke Sinai, thaba ya Arabia — mme o tshwantsha le Jerusalema wa jwale; mme ke ya tlamilweng, le bana ba hae. ₂₆Empa Jerusalema wa hodimo ha a tlanngwa; ke yena e leng mma rona bohle; ₂₇hobane ho ngodilwe, ho tshwe: Ithabele, wena nyopa ya sa tswaleng; tlerola, o hoeletse, wena o neng o hloka pelehi; hobane bana ba ya tlohetsweng ba tla fetisa ba ya nang le monna ka bongata. ₂₈Haele rona, banabeso, re bana ba pallo, jwaloka Isaaka. ₂₉Mme jwalokaha, mohlang oo, ya tswetsweng ka nama a ne a hlorisa ya tswetsweng ka Moya, le jwale ho sa le jwalo. ₃₀Empa Lengolo le reng? Le re: Lelekisa ya rekilweng le mora wa hae; hobane mora wa ya rekilweng e ke ke ya eba mojalefa hammoho le mora wa ya sa rekwang. ₃₁Ka baka leo, banabeso, ha re bana ba ya rekilweng, empa re le ba ya sa rekwang.