JEREMIA 38

₁Shefathia, mora Matthane, le Gedalia, mora Pashkure, le Jukale, mora Shelemia, le Pashkure, mora Malkia, ba utlwa mantswe ao Jeremia a neng a ntse a a bolella setjhaba kaofela, a re: ₂Ho itswe ke Jehova: Ya salang motseng ona o tla shwa ke lerumo, kapa ke tlala, kapa ke lefu le sewa; empa ya tswelang ho Bakalde o tla phela, mme bophelo ba hae o tla ikgapela bona, a tle a nne a phele. ₃Ho itswe ke Jehova: Motse ona o tla neelwa ruri matleng a makgotla a morena wa Babilona, mme o tla o kena.

₄Yaba baholo ba re ho morena: Motho eo a ke a bolawe; hobane o ntse a fokodisa matsoho a bahlabani ba sa setseng motseng ona, le matsoho a setjhaba kaofela, ka ho ba bolella taba tse jwalo; hobane motho eo ha a batlele setjhaba sena molemo, empa e le kotsi. ₅Yaba morena Tsedekia o re: Bonang, o matsohong a lona, hobane morena a ke ke a ba le matla ho lona. ₆Ba tshwara Jeremia, ba mo lahlela lemeneng la Malkia, mora morena, le neng le le lebaleng la ntlo ya teronko; ba theolela Jeremia teng ka marapo; ho ne ho se metsi lemeneng, empa le le seretse, mme Jeremia a tetebela seretseng.

₇Yaba Ebede-Meleke, Moethiopia, molebedi ya neng a le ka tlung ya morena, o utlwa hobane ba lahletse Jeremia lemeneng; mme morena o ne a dutse monyako wa Benjamine. ₈Yaba Ebede-Meleke o tswa tlung ya morena, a ya bua le morena, a re: ₉Monga ka, morena, batho bao ba entse hampe ha ba entse moporofeta Jeremia jwalo, ba mo lahletse lemeneng; o se a ya shwa ke tlala moo a leng teng, hobane ho se ho se le bohobe motseng. ₁₀Yaba Morena o laela Ebede-Meleke, Moethiopia, a re: Inkele batho ba mashome a mararo mona, o nyolle moporofeta Jeremia lemeneng, a eso ho shwe. ₁₁Yaba Ebede-Meleke o inkela batho bao, a ya ka tlung ya morena, katlasa kamore ya polokelo, a inkela ditsiba le dikatana tse onetseng, mme a di theolela ho Jeremia, ka lemeneng, ka marapo. ₁₂Mme Ebede-Meleke, Moethiopia, a bolella Jeremia, a re: Hlo o bee ditsiba le dikatana tse onetseng katlasa mahafi a hao, katlasa marapo. Jeremia a etsa jwalo. ₁₃Yaba ba hula Jeremia ka marapo, ba mo nyolla lemeneng; mme Jeremia a dula lebaleng la ntlo ya teronko.

₁₄Yaba morena Tsedekia o romela ho lata moporofeta Jeremia, a mmiletsa ho yena monyakong wa boraro wa ntlo ya Jehova. Yaba morena o bolella Jeremia, a re: Ke sa o botsa taba, o se ke wa mpatela letho. ₁₅Jeremia a bolella Tsedekia, a re: Ha nka o bolella taba, ha ke re, o tla mpolaya na? Leha nka o eletsa, ha ke re, o tla hana ho nkutlwa na? ₁₆Yaba morena Tsedekia o hlapanyetsa Jeremia ka sephiring, a re: Ka Jehova ya phelang, ya re neileng bophelo, nke ke ka o bolaya, leha e le ho o neela matleng a batho ba batlang bophelo ba hao. ₁₇Yaba Jeremia o bolella Tsedekia, a re: Ho itswe ke Jehova, Modimo wa makgotla, Modimo wa Iseraele: Ha o tswa hona jwale ho ya ineela balaodi ba morena wa Babilona, moya wa hao o tla phela, le motse ona o ke ke wa tjheswa ka mollo; o tla phela, wena le ntlo ya hao. ₁₈Empa ha o sa tswe ho ya ineela balaodi ba morena wa Babilona, motse ona o tla neelwa matleng a Bakalde, ba o tjhese ka mollo; le wena o ke ke wa phonyoha matsohong a bona. ₁₉Morena Tsedekia a bolella Jeremia, a re: Ke mpa ke tshabana le Bajuda ba ineetseng Bakalde, esere ka neelwa matsohong a bona, ba bapala ka nna. ₂₀Jeremia a mo araba, a re: O ke ke wa neelwa matsohong a bona. O mpe o mamele lentswe la Jehova, lona leo ke o bolellang lona, mme ho tla ba molemo ho wena, moya wa hao o phele. ₂₁Empa ha o ka hana ho tswa, ke lona lentswe leo Jehova a ntshenoletseng lona. ₂₂Bona, basadi kaofela ba sa setseng ka tlung ya morena wa Juda ba tla iswa ho balaodi ba morena wa Babilona, mme ba tla re: O hlile wa phongwa, wa hlolwa ke ba neng ba o tshepisa kgotso; maoto a hao ha a tetebetse seretseng, bona ba boela kasanthao. ₂₃Basadi ba hao kaofela le bana ba hao ba tla iswa ho Bakalde, le wena o tla sitwa ho phonyoha matsohong a bona, o mpa o tla tshwarwa ke letsoho la morena wa Babilona, mme motse ona o tla tjheswa ka mollo ka baka la hao. ₂₄Tsedekia a re ho Jeremia: Ho se ke ha eba motho ya tsebang taba tseo, mme o ke se ke wa shwa. ₂₅Ekare ha baholo ba utlwa hobane ke buile le wena, mme ba ka tla ho wena, ba re ho wena: Ako re tsebise seo o se boleletseng morena, o se ke wa re patela sona, mme re ke ke ra o bolaya, hape le seo morena a o boleletseng sona, o re bolelle sona; ₂₆o ba arabe, o re: Tjhe, nkile ka bea thapelo ya ka pela morena, hore ke se ke ka busetswa ka tlung ya Jonathane ho shwela teng.

₂₇Baholo kaofela ba tla ho Jeremia, mme ba mmotsa; yaba o ba bolella ditaba tseo tsohle, kamoo morena a mo laetseng kateng. Yaba ba ikgutsetsa, ba mo tlohela, hobane taba e ne e sa ka ya utluwa ke motho.

₂₈Jeremia a nna a dula lebaleng la ntlo ya teronko, ho fihlela tsatsi leo Jerusalema a kenwang ka lona; o ne a ntse a le teng, ha Jerusalema a kenwa.