JOBO 21

₁Yaba Jobo o fetola, a re: ₂Mamelang, mamelang dipolelo tsa ka, mme le mpheng tshediso eo. ₃Nteseng, ke bue, mme ha ke se ke buile, o ntoo tseba ho soma!

₄Na le re, ke itlaleha ho batho na? Ebe e tla ba keng ha ke sa fele pelo? ₅Tlisang mahlo ho nna, mme le tla makala, le bee letsoho molomong. ₆Leha ke hopola hoo, ke ye ke timellwe ke mehopolo, mme nama ya ka e sisimohe. ₇Na ba bolotsana ba phela keng? Ba tsofala, ba atelwa ke menono jwang? ₈Lesika la bona le tiiswa keng pela bona le mabapa le bona, mme ditloholo tsa bona di atleha keng pela bona? ₉Matlo a bona a dutse kgotsong, a sireleditswe ho se tshabo, thupa ya Modimo ha e dule hodima bona. ₁₀Poho ya bona e a hwela, ha e lale; dithole tsa bona di a tswala, ha di folotse. ₁₁Bana ba bona ba tswa tlung ba ka ka mohlape, bana ba banyenyane ba bona ba thala. ₁₂Ba bina meloding ya moropa le harepa, ba ithabisa ka phala. ₁₃Ba qeta matsatsi a bona menyakeng, ba theohela nqalong ya bafu hanghang. ₁₄Leha ho le jwalo, ba re ho Modimo: Tloha ho rona! ha re rate ho tseba ditsela tsa hao; ₁₅Ya matla wohle keng, ha re tla mo sebeletsa? Re tla ruang ka ho mo rapela? ₁₆Bonang! leseho la bona ha le matsohong a bona. Maikutlo a ba bolotsana a be hole le nna.

₁₇Ke mohlomong feela lebone la ba bolotsana le tingwang, ha ba atise ho welwa ke tshenyeho; Modimo ha o atise ho ba abela maswabi kgalefong ya wona, ₁₈ba tle ba be jwaloka dinono tse fefolwang ke moya, leha e le jwaloka mooko o nkwang ke sefefo.

₁₉Empa le re: Modimo o bolokela bana ba molotsana dikotlo tsa bokgopo ba hae. O mpe o ke o otle yena, a tle a utlwe. ₂₀Ho bone yena ka mahlo a hae ho wa ha hae, a noswe kgalefo ya Ya matla wohle; ₂₁hobane ha a re letho ka ntlo ya hae kamora hae, ha palo ya dikgwedi tsa hae e se e fetile.

₂₂Na Modimo o ka rutwa tsebo, e le wona o ahlolang meya e lehodimong? ₂₃E mong mona o ye a shwe a ntse a dutse naleng, a iketlile, a ena le kgotso e monate. ₂₄Lebese le tletse merifi ya hae, moko wa masapo a hae o tshwehla kamehla. ₂₅Athe e mong o ye a shwe mahlomoleng a moya wa hae, a sa ka a ja leseho. ₂₆Ba robala leroleng ba bapile, diboko di ba apesa ba babedi.

₂₇Bonang, ke tseba kamoo le hopolang kateng, le kamoo le nkahlolang kateng ka ho se loke; ₂₈hobane le re: E kae ntlo ya motubi? E kae tente eo ba bolotsana ba neng ba ahile ho yona? ₂₉Na ha le a ka la botsa baeti? Le sitwa keng ho dumela bopaki bo tliswang ke bona, ₃₀ha ba re: Molotsana o sirelwa ka letsatsi la tshenyeho; ka letsatsi la phetetso o tloswa pela yona? ₃₁Ke mang ya tlang ho mo kgalemela mahlong hodima metsamao ya hae? O tla buseletswa ke mang seo a se entseng na? ₃₂O iswa lebitleng, o lokisetswa qubu ya majwe. ₃₃Makote a sekgutlo a bobebe hodima hae; batho kaofela ba kolokile kamora hae, ba etellang pele ha ba na palo. ₃₄Ha ho le jwalo, le ntlhahiselletsang matshediso a lefeela? Ho setseng dikarabong tsa lona ke bolotsana feela.