JOBO 28

₁Silefera e na le moo e rafshwang teng, kgauta e na le moo e tjhekwang teng, hore e be e hlwekiswe; ₂tshepe e ntshwa mobung, mme koporo e ntshwa lejweng la yona ha le qhibidihiswa. ₃Motho o hlola lefifi, o qamakisisa ho fihlela dibakeng tse tebileng, hore a fumane lefika le patilweng lefifing le letsho, le tshabehang. ₄O tjheba sekoti hole le moo batho ba ahileng teng; teng o lebetswe ke batho bohle, o lepella a fanyehilwe ka marapo hole le batho, a ntse a akgelwa mane le mane. ₅Lefatshe le tswang dijo, ha le fuduwa bohareng ba lona, le tsekema jwaloka mollo. ₆Majweng a lona ho tswa safire le lerole la kgauta; ₇ha ho lenong le tsebang tsela ya teng, mahlo a letlaka ha a fihle teng; ₈ha e hatwe ke dibatana tse hlaha tsa naha, tau e purumang ha e fete teng. ₉Motho o kenya letsoho la hae lefikeng le thata, o ripitla dithaba ka metsong ya tsona; ₁₀o betla diforo mafikeng, leihlo la hae le bona dintho tsa bohlokwa kaofela; ₁₁o thibela metsi a dutlang; o hlahisetsa leseding tse neng di patilwe.

₁₂Empa bohlale bo fumanwa kae? Kutlwisiso e dutse nqalong efe? ₁₃Motho a ke ke a lekanya bohlokwa ba jona; ha bo fumanwe lefatsheng la ba phelang. ₁₄Bodiba bo re: Ha bo yo ho nna; lewatle le re: Ha ke na jona. ₁₅Kgauta e hlwekileng e ke ke ya bo reka; silefera e ke ke ya lekanyeletswa theko ya jona; ₁₆kgauta e hlwekileng a Ofire e ke ke ya lekana le jona; bo fetisa onikse le safire. ₁₇Kgauta le kristale ha di bapiswe le jona; leha e le dikgabiso tsa kgauta, di ke ke tsa bo reka; ₁₈diperela le berile di ke ke tsa bolelwa pela jona; hobane bohlale bo fetisa theko ya korale. ₁₉Topase ya Ethiopia ha e lekane le jona, bo ke ke ba theolwa ke kgauta e hlwekileng ka ho fetisa.

₂₀Ha ho le jwalo, bohlale bo tswa kae? Le yona kutlwisiso e dutse nqalong efe? ₂₁Bo patetswe mahlo a ba phelang kaofela, bo patetswe le manong a lehodimo. ₂₂Sekoti le lefu di re: Re utlwile modumo wa jona ka ditsebe feela. ₂₃Modimo ke wona o tsebang tsela ya jona, o tseba moo bo dulang teng; ₂₄hobane o bona ho isa pheletsong tsa lefatshe, o shadima tsohle tse tlasa lehodimo. ₂₅Mohla o laelang boima ba moya, o lekanyang metsi ka tekanyo, ₂₆mohla o beelang pula melao, o bontshang tladi e dumang tsela ya yona; ₂₇ebile hona o bo bonang, o bo bonahatsang; o bo tiisitse, wa ba wa bo leka. ₂₈Wa ntoo re ho motho: Bona, ho tshaba Morena ke bona bohlale; ho sesefa bobe ke yona kutlwisiso.