1Mme jwale, ke sesomo ho ba banyenyane ho nna, bao nka beng ke nyatsitse ho bea bontata bona hara dintja tsa mehlape ya ka. 2Efela ke ne ke tla etsang ka matla a matsoho a bona? Ke ba shwetsweng ke matla; 3ba omile ke ho hloka le ke tlala, ba lelera feelleng nqalong tse furaletsweng, tse senyehileng; 4ba kga dimela tse babang tsa meru; metso ya dihlahla ke dijo tsa bona; 5ba lelekwa hara batho; ho howeletswa kamora bona, jwalokaha ho howeletswa kamora mashodu; 6ba ikgaheletse dikgutlong tse tshabehang, mahaheng le mafarung a lefatshe; 7ba lla hara dihlahla, ba botha hammoho tlasa meutlwa; 8ke bana ba mahlanya, ke bana ba ba se nang lebitso; ba lelekilwe lefatsheng hara batho.
9Mme jwale, ke fetohile pina ya bona le maele a bona; 10ba mphema, ba mpalehela, ha ba tshabe ho tshwela fahleho sa ka ka mathe. 11Ha ba sa itshwara, ba nkokobetsa; ba ineetse ho bua tsohle pela ka. 12Mofuta oo o mobe o mpatisa letsohong la ka le letona, ba kgarametsa maoto a ka, ba kata ditsela tsa ho tla ntshenya. 13Ba senya tsela ya ka, ba eketsa tshenyehelo ya ka, athe ke ba sa tsotellweng ke motho. 14Ba ntlela jwaloka hola ba kena ka sekheo se ahlameng, ba itihela ka lerata la tshenyo. 15Matshabeho kaofela a mphihletse; a tlosa bokgabane ba ka jwaloka sefefo, mme lehlohonolo la ka le fetile jwaloka leru.
16Mme jwale, moya wa ka o itshollela kahare ho nna, matsatsi a tlokotsi a ntshwere; 17bosiu bo roba masapo a ka, bohloko bo nkokonang ha bo kgutse. 18Ka matla a bohloko kobo ya ka e sohlokantswe, e mpatisa jwaloka kojwana. 19Modimo o ntihetse seretseng, ke tshwana le lerole le melora. 20Ke howeletsa ho wena, ha o nkarabe. Ke eme mona, o ntonela mahlo; 21ho nna o fetohile sera se se nang mohau, o ntwantsha ka letsoho la hao le matla; 22o nkukile ka moya wa sefefo, o ya le nna, hore ke tle ke dikele mororong wa moya. 23Hobane ke tseba hoba o nkisa lefung, tlung eo ba utlwang kaofela ba tshwanetseng ho phuthehela ho yona.
24Leha ho le jwalo, ha ke re, ya wang o ye a otlolle letsoho la hae, mme timelong ya hae, ha ke re, a ka howelletsa thuso na? 25Kapa o re, na ke ne ke sa lle hodima ya neng a dutse tlokotsing, na moya wa ka o ne o sa hauhele mafutsana? 26Ke ne ke lebeletse lehlohonolo, mme ke tletswe ke kotsi; ke ne ke lebeletse lesedi, mme lefifi le fihlile. 27Mala a ka a bela, a sa kgutse; ke fihletswe ke matsatsi a matswalo. 28Ke hlahlathela ke le motsho, empa e seng ka letsatsi; ke ema hara bongata, ke howelletsa thuso. 29Ke se ke le ngwanabo phokojwe le molekane wa mpshe. 30Letlalo la ka le ntshofetse, le a foforeha, masapo a ka a tjhesa ke febere. 31Jwale, harepa ya ka e fetohile sekgapha, phala ya ka e ntsha molodi wa dillo.
