DILLO TSA JEREMIA 3

₁Ke nna motho ya boneng mahlomola ka thupa ya bohale ba hae. ₂O ntsamaisitse, a nkisa lefifing, e seng leseding. ₃Ruri, a ema pela ka, a mphetolela letsoho la hae tsatsi lohle.

₄O fedisitse nama ya ka le letlalo la ka, o robile masapo a ka. ₅O mpatisitse ka motero, o nteetse hare ka mahloko le ka dikgathatso. ₆O ntudisitse dinqalong tse lefifi, jwaloka bafu ba shweleng kgale.

₇O nkopetse hare hore ke tle ke se ke ka tswa, ditlamo tsa ka o di entse boima. ₈Le hona ha ke howeletsa, mme ke meketsa, o thibela thapelo ya ka. ₉O nthibeletse tsela tsa ka ka majwe a betlilweng, o kgopamisitse mmila wa ka.

₁₀Ho nna ke bere e ntaletseng, ke tau e letsabeng. ₁₁O kgelositse ditsela tsa ka; a nkgarola, a nketsa ya makaditsweng. ₁₂A fula ka seqha sa hae, a mpea sebeo sa motsu.

₁₃O kentse metsu ya kgohlopo ya hae thekeng la ka. ₁₄Ke fetohile sesomo sa setjhaba sa ka kaofela, le pina ya sona tsatsi lohle. ₁₅O nkgorisitse tse babang, o ntahisitse ka lengana.

₁₆Hape, o kgephotse meno a ka ka lehlohlojane, o nkgataketse moloreng. ₁₇O timile moya wa ka kgotso, le lebetse hore na ho ba le lehlohonolo keng? ₁₈Ka re: Ke feletswe ke tshepo ya ka le ke tebello ya ka ho Jehova.

₁₉Hopola bosenyehi ba ka le hloreho ya ka; ke lengana feela le mahlomola. ₂₀Ke ntse ke ikgopotsa, mme moya wa ka o hlomohile ka ho nna. ₂₁Ke tsona tseo ke ntseng ke di losa pelong ya ka; ka baka leo, ke tla nne ke tshepe.

₂₂Ke mehauhelo ya Jehova e entseng hore re se ke ra timela, hobane mohau wa hae ha o fele; ₂₃e nne e be teng ka hosasa ho hong le ho hong. Botshepehi ba hae bo boholo. ₂₄Kabelo ya ka ke Jehova, ho rialo moya wa ka; ka baka leo, ke tla mo tshepa.

₂₅Jehova o molemo ho ya mo tshepang, ho moya o mmatlang. ₂₆Ho molemo ho motho ho lebella le ho dulela pholoso ya Jehova ka sebete. ₂₇Ho molemo ho motho ha a jara joko botjheng ba hae.

₂₈A ke a itulele a nnotshi, a ikgutsetse mohla Modimo o mo layang; ₂₉a ke a bee molomo wa hae leroleng ka ho re: Mohlomong tshepo e teng! ₃₀a ke a hlahise lerama la hae ho ya mo jabelang, le ho kgora dikgobo.

₃₁Hobane Morena a ke ke a lahla ka ho sa feleng. ₃₂Leha a hlomodisa, le hona o utlwela motho bohloko ka bongata ba mehauhelo ya hae. ₃₃Hobane pelo ya hae ha e rate ho utlwisa bohloko le ho hlomodisa bana ba batho.

₃₄Ha ba hata ba holehilweng bohle ba lefatshe ka maoto a bona, ₃₅ha ba sekamisa ho loka ha motho, pontsheng ho Mookamedi ya phahameng, ₃₆ha ba kgohlisa motho nyeweng ya hae, Morena na ha a bone na?

₃₇Ke mang ya ka bolelang taba e ka etsahalang, ha Morena a sa laele? ₃₈Ntho tse molemo le tse mpe na ha di hlahe ka molomo wa Mookamedi ya phahameng? ₃₉Na motho ya phelang a ka itshena na? Motho a mpe a ipelaetse ka sebe sa hae!

₄₀Re batlisiseng metsamao ya rona, re e nahane, re kgutlele ho Jehova! ₄₁A re emisetseng dipelo tsa rona le matsoho a rona ho Modimo, mahodimong! ₄₂Re sitilwe, ra ba ra ikgantsha, mme wena, ha o a ka wa rekolohela.

₄₃O ikapesitse ka kgalefo, wa re phallela; o bolaile, ha o a ka wa qenehela. ₄₄O ikwahetse ka leru, thapelo ya rona e tle e se ke ya finyella. ₄₅O re entse dithole le manyala hara ditjhaba.

₄₆Dira tsa rona kaofela di re ahlamiseditse melomo ya tsona. ₄₇Re hlahetswe ke thothomelo le ke lemena hammoho le tshenyo le timelo. ₄₈Leihlo la ka le tsholla dinoka tsa metsi, ka baka la tshenyeho ya moradi wa setjhaba sa ka.

₄₉Leihlo la ka le ntse le tsholla meokgo, ha le kgutse, ha ho kamoo le ka itshwarang kateng. ₅₀Jehova a be a nyarele, a bone a le lehodimong. ₅₁Leihlo la ka le hlomodisa moya wa ka, ka baka la baradi kaofela ba motse wa ka.

₅₂Ba ntlhoileng feela ba ile ba ntjhehela sefi, jwaloka hoja ke le nonyana. ₅₃Ba kgaoletse le bophelo ba ka sekoting; ba akgetse lejwe hodima ka. ₅₄Metsi a ba a nkapesa hlooho, ka re: Ke kgaoletswe.

₅₅Ka bitsa lebitso la hao, Jehova, ke le sekoting se tebileng tlase. ₅₆O utlwile lentswe la ka, ha ke itse: O se ke wa thibella ho fehelwa ha ka le mehoweletso ya ka tsebe ya hao. ₅₇O atametse tsatsing leo ke bitsitseng ho wena, wa re: O se ke wa tshaba.

₅₈Morena, o ile wa emela nyewe ya moya wa ka, wa lopolla bophelo ba ka. ₅₉Jehova, o bone botubo ba ka, o nkahlolele ka ho loka. ₆₀O bone boiphetetso bohle ba bona, le kamoo ba ntherileng kateng.

₆₁O utlwile dinyefolo tsa bona, Jehova, le merero yohle ya bona bakeng sa ka; ₆₂le dipolelo tsa ba ntsohelang matla, le merero ya bona bakeng sa ka tsatsi lohle. ₆₃O tadime ha ba dula leha ba tsoha, ke nna pina ya bona.

₆₄Jehova, o ba putse ka moputso o lekanang le mosebetsi wa matsoho a bona. ₆₅O ba nee pelo e thatathata, thohako ya hao e be ho bona. ₆₆O ba lelekise ka kgalefo, o ba timetse katlasa mahodimo, Jehova!