LEVITIKE 18

₁Jehova a boela a bua le Moshe, a re: ₂Bolella bana ba Iseraele, o re ho bona: ₃Ke nna Jehova, Modimo wa lona. Le se ke la lekisa se etswang naheng ya Egepeta, moo le kileng la aha teng, leha e le se etswang naheng ya Kanana eo ke ya le kenya ho yona, mme le se ke la latela mekgwa ya bona. ₄Le tla ya ka ditaelo tsa ka, le boloke melao ya ka ho ya ka yona. Ke nna Jehova, Modimo wa lona. ₅Le tla boloka ke hona melao ya ka le ditaelo tsa ka; motho ya tlang ho ya ka tsona, o tla phela ke tsona. Ke nna Jehova.

₆Ho se ke ha eba ya atamelang ho mosadi e leng wa madi a le mang le yena ho apola bofeela ba hae. Ke nna Jehova.

₇O se ke wa apola bofeela ba ntatao, ke hore bofeela ba mmao; ke mmao, o se ke wa apola bofeela ba hae.

₈O se ke wa apola bofeela ba mosadi wa ntatao; ke bofeela ba ntatao.

₉O se ke wa apola bofeela ba kgaitsedi ya hao, moradi wa ntatao, leha e le moradi wa mmao, ya tswaletsweng hae, kapa e leng letlalepepilwe.

₁₀O se ke wa apola bofeela ba moradi wa mora wa hao, leha e le ba moradi wa moradi wa hao, hobane ke bofeela ba hao.

₁₁O se ke wa apola bofeela ba moradi wa mohatsa ntatao ya tswetsweng ke ntatao, hobane ke kgaitsedi ya hao; o se ke wa apola bofeela ba hae.

₁₂O se ke wa apola bofeela ba rakgadiao, hobane ke madi a ntatao.

₁₃O se ke wa apola bofeela ba ngwanabo mmao, hobane ke madi a mmao.

₁₄O se ke wa apola bofeela ba ngwanabo ntatao, ke ho re o se ke wa atamela mosadi wa hae, hobane ke mmangwanao.

₁₅O se ke wa apola bofeela ba ngwetsi ya hao, hobane ke mosadi wa mora wa hao; o se ke wa apola bofeela ba hae.

₁₆O se ke wa apola bofeela ba mohatsa ngwaneno, ke bofeela ba ngwaneno.

₁₇O se ke wa apola bofeela ba mosadi le ba moradi wa hae; o se ke wa nka moradi wa mora hae, leha e le moradi wa moradi wa hae ho apola bofeela ba bona; hobane e ntse e le ba madi a le mang; ke polao.

₁₈O se ke wa nyala ngwanabo mosadi wa hao ho baka lefufa, ka ho apola bofeela ba hae mabapa le mosadi wa hao, ha a sa ntse a phela.

₁₉O se ke wa atamela mosadi ya idileng, ho apola bofeela ba hae.

₂₀O se ke wa bokana le mosadi wa wa heno ho itshela sesila le yena.

₂₁O se ke wa neela ngwana leha a le mong wa bana ba hao hore a abelwe Moloke, o tle o se ke wa nyefola lebitso la Modimo wa hao. Ke nna Jehova.

₂₂O se ke wa robala le monna, jwalokaha ho robalwa le mosadi: ke ntho e manyala.

₂₃O se ke wa kopano le phoofolo ho itshela sesila ka yona. Mosadi a se ke a emela phoofolo ho robala le yona: ke manyala a tshabehang.

₂₄Le se ke la itshela sesila ka efe le efe ya ntho tseo, hobane ke ka dintho tseo kaofela ditjhaba tseo ke yang ho di lelekisa pela lona di itshetseng ditshila. ₂₅Ke ka tseo ba di entseng naha e silafetseng; jwale, ke tla e otla ka manyala a yona, mme e tla hlatsa baahi ba yona. ₂₆Le boloke ke hona melao le ditaelo tsa ka, mme le se ke la etsa leha le le leng la manyala ao, leha e le ya tswaletsweng ha eno, leha e le moditjhaba ya jakileng hara lona. ₂₇Hobane ke wona manyala wohle ao a kileng a etswa ke batho ba naha eo, ba neng ba ahile teng pele, mme naha e kile ya silafala. ₂₈Iponeleng hore naha e se ke ya le hlatsa, ha le e silafatsa, jwalokaha e hlatsitse ditjhaba tse neng di le ho yona pele. ₂₉Hobane bohle ba tlang ho etsa leha le le leng la manyala ao, ba tla tloswa hara setjhaba sa ba habo bona. ₃₀Le boloke melao ya ka, mme le se ke la etsa leha o le mong wa mekgwa e manyala e neng e etswa le eso ho kene, mme le se ke la itshela ditshila ka yona. Ke nna Jehova, Modimo wa lona.