Dilemo tsa Disabatha le sa Jubile. — Thekollo ya maruo le ya makgoba.
1Jehova a bua le Moshe thabeng ya Sinai, a re: 2Bolella bana ba Iseraele, o re ho bona: Etlare hobane le kene naheng eo ke le neang yona, lefatshe le tla lala, ebe Sabatha e hlomphang Jehova. 3Ka dilemo tse tsheletseng, o tla jala tshimong ya hao, o be o hlaole merara ya hao, mme o kotule ditholwana tsa yona. 4Empa selemo sa bosupa e tla ba Sabatha le phomolo, Sabatha e hlomphang Jehova; ka selemo seo o se ke wa jala letho tshimong ya hao; o se ke wa hlaola merara ya hao ka sona. 5O se ke wa kotula matshwabodi a koro ya hao, mme o se ke wa kga ditholwana tsa merara ya hao e sa kang ya hlaolwa; e tla ba selemo sa phomolo ya masimo. 6Empa ditholwana tsa Sabatha ya masimo e tla ba dijo tsa lona, tsa hao le tsa mohlanka wa hao e motona, le tsa e motshehadi, le tsa lekgoba la hao, le tsa moditjhaba ya ikahetseng ha eno, 7le tsa makgomo a hao, le tsa diphoofolo tse naheng ya hao. Ho beha hohle ha yona e tla ba dijo.
8O tla bala dilemo tse supileng tsa diSabatha, o bale hasupa dilemo tse supileng, mme matsatsi a Disabatha tseo tse supileng e tla ba dilemo tse mashome a mane a metso e robileng mono o le mong. 9O tla letsa terompeta e mantswe a phepa ka kgwedi ya bosupa, ka letsatsi la leshome la kgwedi; ka letsatsi la dipheko, le tla letsa diterompeta naheng yohle ya lona. 10Le tla halaletsa jwalo selemo sa mashome a mahlano, mme le tla tumisa tokoloho naheng ya lona ho baahi ba yona kaofela; e tla ba Jubile ho lona. E mong le e mong wa lona o tla kgutlela lefeng la hae, e mong le e mong a kgutlele mofuteng wa hae. 11Selemo seo sa mashome a mahlano e tla ba Jubile ho lona; le se ke la jala, le se ke la kotula matshwabodi a sona, le se ke la kga merara e sa kang ya hlaolwa. 12Hobane ke Jubile; e tla kgetheha ho lona; mme le tla ja dijo tse masimong. 13Ka selemo seo sa Jubile, e mong le e mong o tla kgutlela lefeng la hae. 14Ekare ha le ka rekisa ka tshimo ho wa habo lona, kapa leha le ka ithekela tshimo ho wa habo lona, le se ke la jana. 15O tla bala dilemo ho tloha ho Jubile, ha o ithekela ho wa heno, mme o tla o rekela ka ho lekanya palo ya dilemo tsa ho kotula. 16O tla phahamisa theko ka ho e bapisa le bongata ba dilemo tseo, o tla e fokotsa ka ho e bapisa le bonyenyane ba dilemo tseo; hobane o tla o rekela ka palo ya dilemo tsa ho kotula. 17Ho se ke ha eba e mong hara lona ya jang wa habo; o tshabe Modimo wa hao, hobane ke nna Jehova, Modimo wa lona.
18Le phethe melao ya ka, le boloke ditaelo tsa ka; le fele le di etse, mme le tla aha naheng ya lona ka boiketlo. 19Naha e tla beha ditholwana tsa yona; le tla ja, le be le kgore, mme le tla aha ho yona ka boiketlo. 20Empa ha le ka re: Re tla jang ka selemo sa bosupa, ha re sa jale, mme re sa kotule letho? 21bonang, ke tla le hlohonolofatsa ka selemo sa botshelela, se tle se le hlahisetse dijo tse lekanang dilemo tse tharo. 22Le tla jala ka selemo sa boroba meno e le mmedi, le ntse le itjella dinyase, ho isa selemong sa boroba mono o le mong, le ntse le lebeletse dikotulo tsa lona, le eja tsa kgale.
23Masimo a se ke a rekiswa ka ho ela ruri, hobane naha ke ya ka, etswe lona le le baditjhaba, le ba ikaheletseng ha ka. 24Naheng yohle eo le e ruileng, le tla nea motho tokelo ya ho rekolla tshimo ya hae.
25Ekare ha ngwaneno ya fumanehileng a ka rekisa ka fapha le leng la naha ya hae, eo e leng wa habo ka ho tswalwa, ya nang le tokelo ya ho rekolla, ha e be yena ya rekollang se rekisitsweng ke ngwanabo. 26Ekare ha e mong a se na motho ya nang le tokelo ya ho rekolla, empa a ipatletse e le yena seo a ka rekollang ka sona, o tla bala dilemo, ho tloha mohla ba rekaneng; 27se setseng sa theko, a se busetse ho eo a neng a rekane le yena, mme o tla kgutlela lefeng la hae. 28Empa ha a sitwa ho phetha seo a ka se busetsang ho yena, seo a se rekisitseng se tla dula matsohong a ya se rekileng, ho isa selemong sa Jubile, e be hona eo a tswang, le yane a kgutlelang lefeng la hae.
29Ekare ha e mong a reka ka ntlo e hahilweng motseng o dikilweng ka marako, thekollo ya yona e ka etswa selemo se eso ho fele seo ho rekanweng ka sona; tokelo ya hae ya ho rekolla ke ya lemo se le seng feela. 30Empa ntlo eo e ka motseng o dikilweng ka marako, ha e sa rekollwe, selemo se eso ho fele, e tla dula kamehla ho ya e rekileng, ho isa ditloholong tsa hae; e ke ke ya tswa ho yena le ka Jubile. 31Empa matlo a metse e sa dikwang ka marako, a tla tadingwa jwaloka masimo; a ka rekollwa, mme ba a rekileng ba tla tswa ho wona ka Jubile.
32Haele metse ya Balevi, le matlo ao ba tlang ho ba le wona teng, Balevi ba tla ba le tokelo ya ho a rekolla kamehla. 33Ha e mong a reka ntlo e neng e rekiswa motseng wa Balevi, o tla tswa ho yona ka Jubile; hobane matlo a metse ya Balevi ke lefa la bona hara bana ba Iseraele. 34Mme masimo a teetseng metse ya Balevi hare a ke ke a rekwa; ke leruo la bona ka ho sa feleng.
35Ekare ha ngwaneno ya pela hao a fumaneha, mme letsoho la hae le fokola mosebetsing, o mo thole; o etse jwalo le ho motho wa setjhaba sesele, leha e le ho moeti, a tle a phele ha eno. 36O se ke wa mo ja ka katiso, o se ke wa rua ka yena; o tshabe Modimo wa hao, ngwaneno a tle a phele ha eno. 37O se ke wa mo adima tjhelete ya hao ka ho batla katiso, leha e le tse jewang tsa hao ka ho bitsa ka ho fetisa. 38Ke nna Jehova, Modimo wa lona, ya le ntshitseng naheng ya Egepeta ho le fa naha ya Kanana, ke tle ke be Modimo wa lona.
39Ekare ha ngwaneno a fumaneha pela hao, mme a ithekisa ho wena, o se ke wa mo sebedisa ka tshebetso ya lekgoba, 40empa o tla dula ho wena jwaloka mohlanka, kapa moeti; o tla dula tshebeletsong ya hao ho isa selemong sa Jubile. 41O tla tswa ho wena, yena le bana ba hae, mme o tla kgutlela mofuteng wa hae, le lefeng la bontatae. 42Hobane ke bahlanka ba ka bao ke ba ntshitseng naheng ya Egepeta; ho se ke ha rekwa ka bona jwalokaha ho rekwa ka makgoba. 43O se ke wa mmusa ka thata, o mpe o tshabe Modimo wa hao. 44Mohlanka e motona, leha e le e motshehadi, bao o tla ba rua, o tla ba nka ditjhabeng tse le kopileng; le ka ithekela ho tsona bahlanka ba batona le ba batshehadi. 45Le ka ithekela le ho bana ba baditjhaba ba ikahetseng hara lona, le mefuteng ya bona e ho lona, ba tswaletsweng naheng ya lona, mme le tla ba rua; 46le tla ba siya ka mokgwa wa lefa ho bara ba lona kamora lona, e be leruo; le tla ba boloka ka ho sa feleng tshebeletsong ya lona jwaloka makgoba. Empa haele ka banababo lona, e leng bana ba Iseraele, ho se be motho ya busang ka thata hodima ngwanabo.
47Etlare ha moditjhaba, ya ahileng ha eno, a ka rua, mme ngwaneno a fumaneha pela hae, mme a ithekisa ho moditjhaba ya ikahetseng ha eno, leha e le ho setloholo sa moditjhaba, 48thekollo ya hae e ka etswa; e mong wa banababo a ka mo rekolla, 49kapa ngwanabo ntatae, kapa mora wa ngwanabo ntatae, kapa e mong wa mofuta wa hae ya haufi le yena ho tswalweng; kapa ha a na le matla, a ke a ithekolle e le yena. 50O tla bala le moreki wa hae, a qale ka selemo seo a ithekisitseng ka sona, ho isa selemong sa Jubile; tjhelete ya thekollo e tla lekanngwa ka palo ya dilemo: dilemo di balwe jwaloka tsa motho ya lefjwang. 51Ekare ha ho setse dilemo tse ngata, o tla lefa thekollo ya hae ka ho e bapisa le palo ya dilemo tseo, le ka tekanyo eo a neng a ruilwe ka yona; 52ha ho setse dilemo di se kae ho isa ho Jubile, o tla di bala; a lefe thekollo ya hae ka tekanyo ya dilemo tseo. 53O tla dula ho yena jwaloka motho ya lefjwang. A ke ke a mmusa ka thata mahlong a hao. 54Ekare ha a sa rekollwe ka mokgwa oo, o tla tswa ka selemo sa Jubile, yena le bana ba hae. 55Hobane Baiseraele ke bahlanka ba ka; ke bahlanka ba ka bao ke ba ntshitseng naheng ya Egepeta. Ke nna Jehova, Modimo wa lona.
