LEVITIKE 8

₁Jehova a bua le Moshe, a re: ₂Nka Aarone le bara ba hae, le diaparo, le ole ya tlolo, le pohwana ya sehlabelo sa sebe, ₃le dipheleu tse pedi, le seroto sa mahobe a se nang ditomoso, mme o biletse monyako wa tente ya pokano phutheho kaofela.

₄Moshe a etsa kamoo Jehova a mo laetseng kateng, mme phutheho yohle ya phuthehela monyako wa tente ya pokano. ₅Yaba Moshe o re ho phutheho: Ke sena seo Jehova a laetseng ho se etsa.

₆Yaba Moshe o atametsa Aarone le bara ba hae, mme a ba hlatswa ka metsi, a apesa Aarone kojwana; ₇a mo tlama ka senyepa, a mo apesa kobo, a mo apesa le efoda, eo a e tlamileng ka senyepa se homilweng se efoda eo a mo apesitseng yona. ₈A ntoo mo apesa mokgajwana, mme mokgajwaneng a bea Urime le Thummime. ₉A mo rwesa moqhwele hloohong, mme moqhweleng, kapele ho wona, a hloma diadema ya kgauta, e leng lebenyane le kgethehileng, jwalokaha Jehova a ne a laetse Moshe.

₁₀Moshe a ntoo nka ole ya tlolo, mme a tlotsa tente ya pokano, le dintho kaofela tse neng di le kateng, mme a di kgetha jwalo; ₁₁a foka hasupa ka yona aletareng, mme a tlotsa aletare le dintho tsa yona, le morifi, le sedulwana sa wona, ho di kgetha. ₁₂A tshollela hloohong ya Aarone ole ya tlolo, a mo tlotsa, a tle a kgethwe. ₁₃Moshe a atametsa le bara ba Aarone; le bona a ba apesa dikojwana, a ba tlama ka dinyepa, mme a ba hokella dikatiba, kamoo Jehova a neng a laetse Moshe kateng.

₁₄A atametsa pohwana ya sehlabelo sa sebe, mme Aarone le bara ba hae ba bea matshoho a bona hloohong ya pohwana ya sehlabelo sa sebe. ₁₅Moshe a e hlaba, a nka madi a yona, a a bea ka monwana wa hae manakeng a aletare ka nqa tsohle; kahoo a hlwekisa aletare; madi a setseng a a tshollela fatshe aletareng, mme a e kgetha jwalo, ho tle ho etswe pheko teng. ₁₆Moshe a nka mafura kaofela a mohlehlo, le mafura a kguto a katlasa sebete, le diphio tse pedi le mafura a tsona, mme a di tjhesa aletareng. ₁₇A ntoo tjhesa kantle ho diahelo pohwana, le letlalo la yona, le nama ya yona le moswang wa yona jwalokaha Jehova a ne a laetse Moshe. ₁₈Moshe a atametsa pheleu ya setjheso, mme Aarone le bara ba hae ba bea matsoho a bona hloohong ya pheleu. ₁₉Moshe a e hlaba, mme a tshollela madi a yona aletareng ka nqa tsohle. ₂₀Ha direlwa pheleu ka dikoto tsa yona, mme Moshe a tjhesa hlooho, le dikoto, le mafura a yona. ₂₁Diteng tsa yona le ditlhako tsa yona tsa hlatsuwa ka metsi, mme pheleu kaofela Moshe a e tjhesa aletareng; ya eba setjheso le sehlabelo se tjhesitsweng ka mollo, se monko o monate ho Jehova, kamoo Jehova a neng a laetse Moshe kateng.

₂₂A atametsa pheleu ya bobedi, pheleu ya peo; Aarone le bara ba hae ba bea matsoho a bona hloohong ya pheleu eo. ₂₃Moshe a e hlaba, a nka madi a yona, mme a tlotsa ka wona ntlha ya tsebe e tona ya Aarone, le monwana o motona wa letsoho la hae le letona, le monwana o motona wa leoto la hae le letona. ₂₄Moshe a atametsa le bara ba Aarone, mme ka madi ao a ba tlotsa ntlha ya tsebe e tona, le monwana o motona wa letsoho le letona, le monwana o motona wa leoto le letona; mme Moshe a tshollela aletareng ka nqa tsohle madi a setseng. ₂₅A nka mafura, le mohatla, le mafura kaofela a apesang mala, le mafura a kguto a katlasa sebete, le diphio tse pedi le mafura a tsona, le letsoho le letona. ₂₆Serotong sa mahobe a se nang ditomoso, se neng se le pela Jehova, a nka senkgwa se sa lomoswang, le polokwe e dubilweng ka ole le leqebekwane, mme tseo a di bea hodima mafura le hodima letsoho le letona. ₂₇Ntho tseo kaofela a di bea matsohong a Aarone, le matsohong a bara ba hae, mme a di tsokotsa pela Jehova. ₂₈Moshe a tlosa ntho tseo matsohong a bona, a di tjhesa aletareng, hodima setjheso, e le sehlabelo sa peo, sehlabelo se tjhesitsweng ka mollo, se monko o monate pela Jehova. ₂₉Moshe a nka pheleung ya peo sefuba, a se tsokotsa pela Jehova; ya eba kabelo ya Moshe, kamoo Jehova a neng a laetse Moshe kateng.

₃₀Moshe a nka ole ya tlolo, le madi a neng a le aletareng, a foka Aarone le diaparo tsa hae ka wona, hammoho le bara ba hae, le diaparo tsa bona; a kgetha jwalo Aarone le diaparo tsa hae, hammoho le bara ba hae le diaparo tsa bara ba hae.

₃₁Moshe a re ho Aarone le ho bara ba hae: Apehang dinama monyako wa tente ya pokano, le di je hona teng, le bona bohobe bo serotong sa peo, kamoo ke laetseng kateng, ka re: Aarone le bara ba hae ba tla di ja. ₃₂Se ka salang sa nama le sa bohobe, le tla se tjhesa ka mollo. ₃₃Ka matsatsi a supileng, le ke ke la tloha monyako wa tente ya pokano, ho fihlela matsatsi a peo ya lona a ba a phetheha; hobane matsatsi a peo ya lona a supile. ₃₄Se entsweng kajeno, Jehova o laetse hore se etsetswe pheko ya lona. ₃₅Le tla hlola le dutse motshehare le bosiu ka matsatsi a supileng, monyako wa tente ya pokano, mme le tla etsa seo Jehova a le laetseng sona, hore le se etse, hore le se tlo shwa; hobane ke laetswe jwalo. ₃₆Aarone le bara ba hae ba etsa tsohle tseo Jehova a neng a di laetse ka Moshe.