MATTHEU 24

₁Yare Jesu ha a etswa tempeleng, a itsamaela. Yaba barutuwa ba hae ba mo atamela, ho mmontsha mehaho ya tempele. ₂Empa Jesu a re: Le a di bona ntho tseo tsohle? Kannete ke re ho lona: Ha ho ka ke ha leswa teng lejwe hodima lejwe le leng, le sa heletswang.

₃Eitse hobane a dule thabeng ya Mehlwaare, barutuwa ba hae ba tla ho yena ba nnotshi, ba re ho yena: Re bolelle nako taba tseo di tla etsahala ka yona, le ntho eo e tla ba pontsho ya ho tla ha hao, le ya ho fela ha lefatshe. ₄Jesu a ba araba, a re: Iponeleng, le tle le se ke la thetswa ke motho. ₅Hobane ba bangata ba tla tla ka lebitso la ka, ba re: Ke nna Kreste. Mme ba tla thetsa ba bangata. ₆Le tla utlwa dintwa le medumo ya dintwa; le mpe le bone hore le se ke la tshoha; tseo tsohle e ka kgona di etsahale, empa le moo ha e eso ho be bona bofelo. ₇Hobane setjhaba se seng se tla tsohela setjhaba se seng matla, mmuso o mong o lwantshe mmuso o mong; ditlala di tla ba teng, le mafu a akaretsang, le ditshisinyeho tsa lefatshe ka nqa tse ngata. ₈Empa tseo tsohle e tla ba qalo feela ya tlokotsi. ₉Mohlang oo, le tla neelwa ho tshwenngwa, le tla bolawa, mme le tla hlouwa ke ditjhaba tsohle ka baka la lebitso la ka. ₁₀Ke moo ba bangata ba tla kgoptjwa, mme ba tla ekana, ba tla hloyana. ₁₁Ho tla hlaha baporofeta ba bohata ba bangata, mme ba tla thetsa batho ba bangata. ₁₂Mme lerato la ba bangata le tla tapa ka baka la ngatafalo ya bokgopo. ₁₃Empa ya tiisetsang ho fihlela qetellong, ke yena ya tla bolokeha. ₁₄Evangeli ena ya mmuso e tla bolelwa lefatsheng lohle, e tle e be bopaki ho ditjhaba tsohle; mme e tla ba hona bofelo bo hlahang.

₁₅Jwale, etlare ha le bona manyala a bofediso, a boletsweng ke moporofeta Daniele, a eme nqalong e halalelang — ya balang a lemohe! — ₁₆mohlang oo, ba leng Judea ba balehele dithabeng; ₁₇ya leng hodima ntlo, a se ke a theohela ho nka ntho tlung ya hae; ₁₈le ya leng masimong, a se ke a kgutlela hae ho nka kobo ya hae. ₁₉Ho tla ba madimabe basadi ba baimana, le ba anyesang mehleng eo. ₂₀Le rapele hore paleho ya lona e se hlahe mariha, leha e le ka Sabatha. ₂₁Hobane mohlang oo, mahlomola a tla ba maholo, haesale le tshimolohong ya lefatshe, ho fihlela jwale, tsietsi e kalo ha e eso ho ka e eba teng, mme ha e ka ke ya boela ya eba teng le ka mohla o le mong. ₂₂Le hojane matsatsi ao a se ke a kgutshofatswa palo, ho ne ho ke ke ha phonyoha motho; empa ka baka la bakgethwa, matsatsi ao a tla kgutshofatswa.

₂₃Mohlang oo, ha motho a ka re ho lona: Bonang, Kreste o mona, kapa Kreste o mane, le se ke la dumela. ₂₄Hobane ho tla hlaha bokreste ba bohata, le baporofeta ba bohata, mme ba tla etsa mehlolo e meholo le meeka e ka thetsang le bona bakgethwa, hola ke ntho e ka etswang. ₂₅Bonang, ke le boleletse pele, ditaba di eso ho hlahe. ₂₆Ka baka leo, ha ba re ho lona: Bonang, o nahathothe, le se ke la tswela teng; kapa ha ba re: Bonang, o phaposing ya ntlo, le se ke la dumela. ₂₇Hobane jwalokaha lehadima le hadima le etswa botjhabela, mme le benyetsa bophirimela, ho tla ha Mora motho ho tla ba jwalo. ₂₈Hobane moo setopo se leng teng, ke moo manong a tla bokana teng.

₂₉Hanghang kamora mahlomola a mehla eo, letsatsi le tla fifala, kgwedi e tla hloka lesedi, dinaledi di tla wa lehodimong, mme tse matla tsa lehodimo di tla sisinyeha. ₃₀Mohlang oo, pontsho ya Mora motho e tla hlaha lehodimong; ke moo ditjhaba tsohle tsa lefatshe di tla iteta difuba, mme di tla bona Mora motho a etla ka maru a lehodimo, ka matla a maholo le ka kganya e kholo. ₃₁O tla roma mangeloi a hae a letsang diterompeta tse modumo o moholo, hore a bokelle bakgethwa ba hae meyeng e mene, ho qala pheletsong e nngwe ya mahodimo ho isa ho e nngwe. ₃₂Ithuteng ho lekanya ditaba ka sefate sa feiye. Lekala la sona ha le se le le bonolo, mme le se le hlahisa mahlaku, le tseba kahoo hobane lehlabula le haufi. ₃₃Le lona, etlare ha le bona tseo tsohle, le tsebe hoba Mora motho o haufi, o monyako. ₃₄Kannete ke re ho lona: Moloko wona o ke ke wa feta, tseo tsohle di eso ho etsahale. ₃₅Lehodimo le lefatshe di tla feta, empa dipolelo tsa ka di ke ke tsa feta.

₃₆Haele letsatsi leo le hora eo, ha ho ya tsebang; esita le mangeloi a lehodimo ha a tsebe, leha e le Mora; empa ho tseba Ntate a nnotshi. ₃₇Empa jwalokaha ho bile mehleng ya Nowe, le ho tleng ha Mora motho ho tla ba jwalo. ₃₈Hobane jwaloka mehleng e bileng teng pele ho morwallo wa metsi, ha batho ba ne ba eja, ba enwa, ba nyala, ba nyadisa, ha ba ha fihla tsatsi leo Nowe a keneng arekeng ka lona; ₃₉ha ba ka ba lemoha, ha ba ha fihla morwallo, mme ba nkwa bohle ke wona: ho tla ba jwalo le ho tleng ha Mora motho. ₄₀Mohlang oo, ho banna ba babedi ba tla beng ba le tshimong, e mong o tla nkwa, e mong a siuwe; ₄₁ho basadi ba babedi ba tla beng ba sila lelwaleng, e mong o tla nkwa, e mong a siuwe. ₄₂Lebelang hle; hobane ha le tsebe nako eo Morena wa lona a tla tla ka yona. ₄₃Le mpe le tsebe hobane monga ntlo, hola a ka tseba nako eo senokwane se tla tla ka yona, a ka lebela, mme a ke ke a dumela hoba ntlo ya hae e phunngwe. ₄₄Le lona, itokiseng ke hona; hobane Mora motho o tla tla ka nako eo le sa e hopolang.

₄₅Ana ke mang mohlanka ya kgabane, ya bohlale, eo morena wa hae a mmeileng moalosi wa bahlanka ba hae ho ba nea dijo nakong ya teng? ₄₆Ho lehlohonolo mohlanka eo morena wa hae, mohla a fihlang, a tla mo fumana a etsa jwalo. ₄₇Kannete ke re ho lona: O tla mmea moalosi wa mesebetsi ya hae kaofela. ₄₈Empa ekare ha mohlanka eo a le kgopo, mme a ipolella pelong, a re: Morena ka o diehile ho fihla; ₄₉mme a qala ho otla balekane ba hae ba bohlanka, a eja, a enwa le matahwa; ₅₀morena wa mohlanka eo o tla fihla ka letsatsi leo a sa mo lebellang, le ka nako eo a sa e tsebeng. ₅₁O tla mo pomahanya dikoto, a mo nee kabelo e le nngwe le baikaketsi; ke moo dillo di tla ba teng le ditsikitlano tsa meno.