MAREKA 11

₁Ha ba se ba atametse Jerusalema, le Bethefage, le Bethania, thabeng ya Mehlwaare, a roma barutuwa ba hae ba le babedi, ₂a re ho bona: Eyang motsaneng oo le o lebileng; etlare le sa kena ho wona, le tla fumana petsana e holehilweng, e esong ho kallwe ke motho; e lokolleng, le e tlise. ₃Ha motho a re ho lona: Le etsetsang jwalo? Le re: Morena o a e hloka; mme o tla be a phakise a e romele kwano.

₄Yaba ba ya, ba fumana petsana e holehilwe monyako, kantle, mateanong a tsela tse pedi; mme ba e lokolla. ₅Ba bang ho ba emeng moo, ba re ho bona: Ha le lokolla petsana eo, ke ho etsang na? ₆Ba ba bolella jwalokaha Jesu a ba laetse; mme ba ba lesa, ba ya. ₇Jwale ba tlisa petsana ho Jesu; ba ala dikobo tsa bona hodima yona, mme Jesu a e kalla. ₈Ebile ba bangata ba ala dikobo tsa bona tseleng, ba bang ba rema makala difateng, mme ba a ala tseleng. ₉Ba eteletseng pele le ba latelang ba ne ba howa, ba re: Hosanna! ho bokwe ya tlang ka lebitso la Morena! ₁₀Ho rokwe mmuso wa ntata rona Davida, o tlang ka lebitso la Morena! Hosanna mahodimong a hodimodimo!

₁₁Jesu a kena Jerusalema le tempeleng; mme yare ha a qamakile kahohle, ha e se e le nako ya mantsiboya, a tswa, a ya Bethania a ena le ba leshome le metso e mmedi.

₁₂Yare ka hosasane, ha ba etswa Bethania, a lapa. ₁₃A bonela hole sefate sa feiye se nang le mahlaku, a ya ka ho re, mohlomong a ka fihlela ho hong ho sona; empa, ha a fihla ho sona, a se ke a fumana letho, haese mahlaku feela; hobane e ne e se nako ya difeiye. ₁₄A bua, a re ho sona: Ho qala jwale, ho se be motho ya sa tla hlola a eja tholwana tsa hao le ka ho sa feleng! Mme barutuwa ba hae ba utlwa.

₁₅Yaba ba fihla Jerusalema. Jesu, ha a kene tempeleng, a qala ho leleka ba bapatsang le ba rekang ka tempeleng; a diha ditafole tsa ba ananyang ditjhelete, le ditulo tsa ba bapatsang ka maeba. ₁₆O ne a sa dumelle motho ho feta ka tempeleng a jere phahlo. ₁₇Mme a ruta, a re ho bona: Ha ke re, ho ngodilwe, ho thwe: Ntlo ya ka e tla bitswa ntlo ya thapelo ya ditjhaba tsohle? athe lona, le e entse lehaha la mashodu! ₁₈Bangodi le baprista ba baholo ha ba utlwa a rialo, ba batla kamoo ba ka mo timetsang kateng; hobane ba ne ba mo tshaba, kahobane setjhaba sohle se ne se tsota thuto ya hae.

₁₉Yare mantsiboya, a tswa motseng.

₂₀Hosasa, ha ba feta, ba bona sefate sela sa feiye se omeletse hohle, ho qala ka metso. ₂₁Yaba Petrose o elellwa, a re ho yena: Rabbi, bona sefate sa feiye seo o se rohakileng, se omeletse. ₂₂Jesu a araba, a re ho bona: Le be le tumelo ho Modimo. ₂₃Hobane kannete ke re ho lona: E mong le e mong ya ka reng ho thaba ena: Tloha, o itihele lewatleng, a sa belaele pelong ya hae, a mpa a dumela hoba tseo a di bolelang di ka etswa, o tla etsetswa tsona. ₂₄Ka baka leo, ke re ho lona: Se seng le se seng seo le se kopang ka thapelo, dumelang hoba le se bone, mme se tla ba ho lona. ₂₅Mme ha le ema le rapela, enore ha le ena le taba le e mong, le mo tshwarele, hore le yena Ntata lona ya mahodimong a le tshwarele ditlolo tsa lona. ₂₆Hobane ekare ha le sa tshwarele ba bang, Ntata lona ya mahodimong le yena a ke ke a le tshwarela ditlolo tsa lona.

₂₇Ba boela ba tla Jerusalema; mme ha a itsamaela tempeleng, ha tla ho yena baprista ba baholo, le bangodi, le baholo; ₂₈ba re ho yena: Ntho tseo o di etsa ka matla afe na? Matla ao o a neilwe ke mang, ha o etsa ntho tseo? ₂₉Jesu a mpa a re ho bona: Ke tla le botsa taba e le nngwe le nna; le nkarabe; ke tla ntoo le bolella matla ao ke etsang ntho tseo ka wona. ₃₀Kolobetso ya Johanne hleka e ne e tswa lehodimong, kapa bathong na? Nkarabeng. ₃₁Mme ba eletsana hammoho, ba re: Ha re re: E ne e tswa lehodimong, o ya re: Ha ho le jwalo, ha le a ka la e dumela keng? ₃₂Ha re re: E ne e tswa bathong, — teng ba ne ba tshaba setjhaba, hobane bohle ba ne ba re, Johanne ke moporofeta wa sebele. ₃₃Yaba ba araba, ba re ho Jesu: Ha re tsebe. Jesu a re ho bona: Le nna, nke ke ka le bolella matla ao ke etsang ntho tseo ka wona.